ფინანსური ტექნოლოგიების მსოფლიო ლიდერი Mastercard-ი საქართველოში ტურისტული ინდუსტრიის მხარდასაჭერად შექმნილი ინიციატივის მეორე ეტაპს აანონსებს და ქართულ ციფრულ სარესტორნო პლატფორმასთან Rezto სტრატეგიულ პარტნიორობას იწყებს, რომლის ფარგლებშიც საქართველოში შემოსული უცხოელი ტურისტები, რომლებიც Mastercard-ის ბარათებით გადაიხდიან, Rezto-ს პარტნიორ რესტორნებში ექსკლუზიურ ფასდაკლებებსა და სპეციალურ შეთავაზებებს მიიღებენ. 

Mastercard-ის ვიცე-პრეზიდენტი საქართველოსა და სომხეთში დავით ზღუდაძე აცხადებს, რომ Mastercard-ის ერთ-ერთ ფოკუსს საქართველოში საერთაშორისო ტურისტების მოზიდვა წარმოადგენს. 

„ფაქტობრივად ეს არის შემდგომი ეტაპი ტურიზმის მიმართულებით ჩვენი მრავალწლიანი აქტივობის. ზოგადად, Mastercard-ის ძირითადი ფოკუსი არის, რომ საქართველოში საერთაშორისო ტურიზმი მოვიზიდოთ, განვავითაროთ. საქართველოში მუდმივად ვეძებთ პარტნიორებს. დღეს, საფუძველი ეყრება ჩვენს ახალ პარტნიორობას კომპანია Rezto-სთან და სურვილი გვაქვს, რომ ტურისტულ ინდუსტრიას დავეხმაროთ, რომ შეძლოს ციფრული არხებით იგივე სხვადასხვა რესტორანში, ან სასტუმროში ჯავშნების განხორციელება. ეს ხელს შეუწყობს, რომ ამ ინდუსტრიის გაციფრულება უფრო აქტიურად დაიწყოს და ჩვენ, ჩვენის მხრივ შევეცდებით, რომ აღნიშნული პარტნიორობის ქვეშ მოვახდინოთ ამ პარტნიორობის საერთაშორისო მიმართულებით პოპულარიზაცია და მოვიზიდოთ უფრო პრემიალური და მაღალი ხარისხის ტურისტი“, - აცხადებს დავით ზღუდაძე.

მისი თქმით, საქართველოს ტურიზმის კუთხით საკმაოდ დამაიმედებელი მაჩვენებლები და პროგნოზები აქვს. 

„დღეს, კიდევ ერთხელ შევამოწმე რიცხვები, როგორ ვითარდება ტურიზმი საქართველოში. რადგან მე ორ ქვეყანას ვკურირებ: სომხეთს და საქართველოს, გეტყვით, ნამდვილად დამაიმედებელი მაჩვენებლები არის საქართველოში. საკმაოდ კარგად ვიზრდებით. წინა წელს სომხეთმა ოდნავ გადაგვისწრო, თუმცა ჩვენი ტურისტული პოტენციალი რასაც ჩვენ ვუყურებთ, იგივე გადახდების ნაწილში სამჯერ დიდია, ვიდრე გვერდით რესპუბლიკაში. მომხმარებელს სურვილი აქვს, ვიდრე ქვეყანაში ჩამოვა უკვე მომზადებული ჰქონდეს, ვთქვათ სად მიდის, როგორ მიდის, მით უმეტეს როდესაც უკვე ჩვევად გადაიქცა, რომ წინასწარ დაჯავშნო ესა თუ ის სასტუმრო იქნება თუ რესტორანი. შესაბამისად, ვფიქრობთ რომ ასეთი ციფრული არხებით წინასწარი მხარდაჭერა და წინასწარი სერვისების შეთავაზება უფრო დიდ ბუსტს მისცემს, რომ საქართველოში ელ.კომერცია განვითარდეს, უფრო მეტი რესტორანი ჩაერთოს ამ მიმართულებით და უფრო სტაბილური შექმნას ის მოთხოვნა, რომელიც ყველას დღეს შეიძლება არ ჰქონდეს. ეს არის ალბათ ძირითადი აქცენტი, რასაც ჩვენ ვაკეთებთ“, - განაცხადა დავით ზღუდაძემ.

Mastercard-ის საერთაშორისო ბარათის მფლობელი ტურისტები Rezto-ს პლატფორმის მეშვეობით: 

• მიიღებენ ექსკლუზიურ ფასდაკლებები www.rezto.ge-ის პარტნიორ რესტორნებში
• შეძლებენ წინასწარ შეუკვეთონ სასურველი კერძები და მიიღონ დამატებითი ბენეფიტები
• სწრაფად და მარტივად დაჯავშნიან სასურველ ადგილს ციფრული პლატფორმის მეშვეობით
• მიიღებენ მრავალენოვან მხარდაჭერას ჯავშნისა და შეკვეთის პროცესში

Mastercard-ის მონაცემებით, საქართველოში ბოლო წლების განმავლობაში როგორც საბარათე, ასევე, ციფრული გადახდების მაჩვენებლები მზარდი ტენდენციით ხასიათდება. ეს მიუთითებს როგორც ტურიზმის, ასევე ბარათების გამოყენების კულტურის განვითარებაზე. 

Mastercard-ის და Rezto-ს პარტნიორობის პირველი ეტაპი მოიცავს თბილისის ცენტრალურ რაიონებში მდებარე 50-მდე რესტორნის ჩართვას. www.rezto.ge, რომელიც სულ რამდენიმე თვეა, რაც ქართულ ბაზარზე გამოჩნდა და მალევე მოიპოვა ცნობადობა, გაფართოებას საქართველოს სხვადასხვა ტურისტულ ცენტრებში, მათ შორის ბათუმში, მცხეთაში, გუდაურსა და ბაკურიანში გეგმავს. შესაბამისად გაფართოვდება Mastercard-ის და Rezto-ს პარტნიორობის არეალიც და სულ მალე, მთელს საქართველოს დაფარავს. 

​