ტრამპის ახალმა სავაჭრო პოლიტიკამ გავლენა იქონია ჩვენი პორტფელების მომგებიანობაზე - ამის შესახებ რადიო „სივრცის“ ეთერში გადაცემა Business Insider Georgia-ში სტუმრობისას საპენსიო ფონდის მთავარი საინვესტიციო ოფიცრის მოვალეობის შემსრულებელმა ანა ნაჭყებიამ განაცხადა. მისი თქმით, ფონდი ასეთი მერყეობებისთვის მზად არის, რადგანაც წარმოადგენს გრძელვადიან ინვესტორს.

„ზოგადად აქციების ბაზართან არის დაკავშირებული მერყეობა. ისტორიასაც, რომ ვუყურებთ ამერიკის აქციების ბაზარი 100 წელია არსებობს და მეტი მერყეობის ეპიზოდები ჰქონდა. მაგალითად, 2008 წელს ფასები მნიშვნელოვნად შემცირდა, კოვიდის დროსაც მნიშვნელოვნად შემცირდა. წელს, 2025 წლის აპრილში, ჩვენ რაც ვარსებობთ ყველაზე დიდი მერყეობა ვნახეთ. ეს ტრამპის მიერ გამოცხადებულმა ტარიფებმა მნიშვნელოვანი შემცირება გამოიწვია ფასებში, რამაც რა თქმა უნდა გავლენა იქონია ჩვენი პორტფელების მომგებიანობაზეც. ყველაზე მეტად ამ მერყეობას დინამიკური პორტფელი გრძნობს, ვინაიდან მას მეტი ინვესტიცია აქვს განაწილებული აქციებში. თუმცა კონსერვატიულ პორტფელსაც ჰქონდა ეს მერყეობა. მაგალითად, ეხლა 2024 წლის განმავლობაში ყველაზე კარგი მომგებიანობა დინამიკურმა პორტფელმა აჩვენა, სწორედ იმიტომ რომ აქციების ბაზარი ძალიან მომგებიანი იყო. წელს ვუყურებდით, რომ აპრილის რაღაც მომენტში დინამიკურმა პორტფელმა მართლაც მნიშვნელოვანი შემცირება ნახა, თუმცა ახლა კიდევ არ არის გამოქვეყნებული მონაცემები. ჩვენ 30 აპრილის მდგომარეობით გვაქვს მონაცემები გამოქვეყნებული, მაგრამ 12 მაისის მდგომარეობით ისე გაიზარდა ფასები, რომ თითქმის დაუბრუნდა წლის დასაწყის მდგომარეობას დინამიკური პორტფელი. ანუ მერყეობებისთვის, როგორც გრძელვადიანი ინვესტორი მზად ვართ და ვიცით, რომ ასეთი მერყეობის ეპიზოდები იქნება. თუმცა ჩვენ ვართ სტრატეგიული ინვესტორი, არ ვაპირებთ ამ მერყეობების დროს ისეთი გადაწყვეტილებების მიღებას, რომელიც მნიშვნელოვნად შეცვლის ჩვენს სტრატეგიას. ჩვენ ინვესტირებას ვაკეთებთ 30 წლის განმავლობაში. ვუყურებთ ჩვენი მონაწილეების ასაკობრივ განაწილებასაც და მონაწილეების დიდი ნაწილი არის საკმაოდ ახალგაზრდა. საშუალო ასაკი არის 37 წელი, რაც ნიშნავს იმას, რომ დაახლოებით 20 წელი გვაქვს საინვესტიციო ჰორიზონტი სანამ ეს ადამიანები შეძლებენ საპენსიო დანაზოგები გაიტანონ.

შესაბამისად, საინვესტიციო ჰორიზონტიც ჩვენი ძალიან გრძელია და მსგავსი მერყეობები არ გვაშინებს. მოკლედ მიუხედავად იმისა, რომ ცოტა ვნერვიულობთ ჩვენ მაინც გრძელვადიანად ვუყურებთ და ინვესტირებას ამ პრინციპით ვახორციელებთ“, - აღნიშნა ანა ნაჭყებიამ.