სებ-ის პრეზიდენტის თქმით ცენტრალური ბანკი საფინანსო სექტორთან აქტიურად კონტაქტობს და ნებისმიერი რეგულაცია, წინასწარ განხილვისთვის ეგზავნება ბანკებს. აღნიშნული შესახებ განცხადება ნათია თურნავამ  გადაცემა „იმედის დილაში“, რუბრიკა Business Insider Georgia-ში კითხვის პასუხად გააკეთა, რომელიც ბიზნესისა და ეროვნული ბანკი თანამშრომლობას შეეხებოდა. აღსანიშნავია, რომ რამდენიმე დღის წინ BAG-ის კონფერენციაზე პრემიერ-მინისტრთან და მთავრობის წევრებთან ერთად ბიზნესთან შეხვედრაში მონაწილეობას სებ-ის პრეზიდენტიც იღებდა. 

„არ შემიძლია არ აღვნიშნო ძალიან წარმატებული პანელი, სადაც თქვენ გიორგი მოდერატორი ბრძანდებოდით. გილოცავთ ასეთ წარმატებულ პანელს. მართლაც ძალიან წარმატებული პანელი იყო, ეკონომიკური გუნდი ვიყავით სრულიად წარმოდგენილები: ფინანსთა მინისტრი, ეკონომიკის მინისტრი, სებ-ის პრეზიდენტი და ორი წამყვანი ბანკის ხელმძღვანელი პირები. მაგრამ მანამდე ძალიან კარგი ფორმატი და ძალიან კარგი მსჯელობის საშუალება მოგვეცა ყველას და მათ შორის ბიზნესს, საქართველოს ბიზნეს ასოციაციის ინიციატივით, როდესაც პრემიერ-მინისტრთან და მთავრობასთან უშუალოდ დიალოგის შესაძლებლობა გვქონდა. ეს იმას ნიშნავს, რომ ძალიან უშუალო საუბარი იყო და ძალიან სასარგებლო. რაც შეეხება ჩვენი ჩართულობა და თუნდაც ასეთი ფორმატებით საფინანსო ინდუსტრიასთან კონტაქტი, ჩვენ ისედაც ძალიან ხშირად ვკონტაქტობთ. წესი გვაქვს მიღებული, რომ ნებისმიერი რეგულაცია წინასწარ იყოს ბიზნესთან განხილვისთვის გადაგზავნილი, წარმოდგენილი, მოვისმინოთ მათი კომენტარები, აქ უნდა ითქვას, რომ საბანკო ასოციაციაც გვეხმარება. ახლა სხვა არასაბანკო ბიზნესებიც წამოვიდა ვისთანაც ვცდილობთ, რომ მაქსიმალური კომუნიკაცია გვქონდეს, იქნება ეს საგადახდო  სისტემის ოპერატორ/პროვაიდერები, თუ ვირტუალური აქტივების პროვაიდერები, ვისაც ასევე ვარეგულირებთ, ვარეგისტრირებთ და ვზედამხედველობთ. ზოგადად აქ არის დიალოგის საფუძველი იმიტომ, რომ ბანკები თავის მოწოდებით ცდილობენ, რომ თავისი პორტფელი მაქსიმალურად გაზარდონ და რაც შეიძლება მეტი სესხი გასცენ. ჩვენი ამოცანა არის, რომ ზედამხედველობა გავუწიოთ და დავაკვირდეთ ხომ არ იწვევს ეს უპასუხისმგებლო ჭარბვალიანობას და ამ კუთხით გვაქვს ხოლმე ერთმანეთში საქმიანი კამათი. პრინციპში კონსესუსსაც ვნახულობთ. ძალიან მნიშვნელოვანია, რომ თითოეული სესხი იყოს დასაბუთებული, არ შეიცავდეს გადახდის რისკებს და არ იწვევდეს ჭარბვალიანობას. დღესდღეობით ჩვენ ამის ნიშნებს ზოგადად ვერ ვხედავთ, თუმცა ყოველთვის აუცილებელია ზედამხედველობა.

რაც შეეხება ჩვენი საფინანსო სისტემის მდგომარეობას, დღესდღეობით ის არის ძალიან გამძლე, მედეგი სხვადასხვა შოკის მიმართ და აქ ჩვენი სიმკაცრეც თავის სიტყვას ამბობს. იმიტომ, რომ ჩვენ ვთხოვთ და თავისი ნებაყოფლობითაც ბანკები ინარჩუნებენ საკმაოდ მაღალ კაპიტალის ბუფერებს. ეს ის რეზერვია, რომელიც მათ უნდა ჰქონდეთ ყოველთვის, მაღალ ლიკვიდობას. და აქტივების ხარისხი, სესხების ხარისხი რასაც ჰქვია ძალიან მაღალია. სულ 2,5% არის ე.წ. უმოქმედო სესხების პორტფელი, რაც რეგიონში ერთ-ერთი ყველაზე დაბალია. უნდა გავაგრძელოთ ჩვენ რა თქმა უნდა მკაცრი ზედამხედველობა ამ თვალსაზრისით“, - განაცხადა ნათია თურნავამ.