საერთაშორისო ინვესტორები ხედავენ, რომ სუვერენული რისკები შემცირებულია და ეს კუპონის პროცენტშიც აისახა, - ამის შესახებ სებ-ის პრეზიდენტმა ნათია თურნავამ ევრობონდების ემისასთან დაკავშირებით განაცხადა. მისივე განმარტებით, ეს ყველაფერი აისახა მოთხოვნაზეც, 

„ჩვენ, ეროვნული ბანკის გუნდი, ფინანსთა სამინისტროსთან ერთად, ამ თვეების განმავლობაში საერთაშორისო ინვესტორებთან არაერთ შეხვედრაში ვმონაწილეობდით და ვხედავდით ძალიან მაღალ ინტერესს. რეალობამ ყოველგვარ მოლოდინს გადააჭარბა. მართლაც ასეთი მაღალი ინტერესი აღმოჩნდა ჩვენი სამთავრობო ობლიგაციების მიმართ. პრაქტიკულად 5,5-ჯერ აჭარბებდა შეთავაზებას ინტერესი, 100-ზე მეტმა საერთაშორისო ინვესტორმა მიიღო მონაწილეობა ამ პროცესში და ეს ცალსახად ნიშნავს ერთ რამეს, რომ ხედავენ, რომ რისკები არის შემცირებული და ეს კუპონის პროცენტშიც აისახა, რომ ჩვენი სუვერენული რისკები უფრო შემცირებულია ინვესტორების თვალში, ვიდრე 2021 წელს, როდესაც ევრობონდები პირველად გამოიშვა და გარდა ამისა, ენდობიან ჩვენს ეკონომიკას, ეკონომიკურ განვითარებას, სამთავრობო პოლიტიკას და იმ მშვიდობიან გარემოს, რომელიც შენარჩუნდა ქვეყანაში მიუხედავად ძალიან დიდი გამოწვევებისა მთლიანად რეგიონში“, - აღნიშნა თურნავამ.

შეგახსენებთ, რომ საქართველოს მთავრობამ წარმატებით განახორციელა 500 მილიონი აშშ დოლარის ოდენობის ევროობლიგაციების გამოშვება ლონდონის საფონდო ბირჟაზე - კუპონის განაკვეთი დაფიქსირდა 5.125% ოდენობით. ფინანსთა სამინისტროს ცნობით, მიმდინარე გამოშვებისას დაფიქსირებული კუპონი, ევროობლიგაციების ბაზრისთვის ყველაზე დაბალი განაკვეთია საქართველოს მსგავსი და ერთი საფეხურით მაღალი საკრედიტო რეიტინგის მქონე სუვერენული ევროობლიგაციებისთვის, ბოლო 4 წელიწადში.

ახლად გამოშვებული ევროობლიგაციებით განხორციელდა 2021 წლის ობლიგაციების რეფინანსირება. გარდა მოზიდული ფინანსური რესურსისა, ახალი ევროობლიგაციის გამოშვება, მნიშვნელოვანია ორი ფაქტორის გამო: ის განსაზღვრავს ქვეყნის რისკის დონეს, ზომავს საერთაშორისო ინვესტორების დაინტერესებასა და ნდობას ქვეყნისა და მისი ეკონომიკის მიმართ.