ძალიან ბევრ ქვეყანას ენატრება მსგავსი ძლიერი ზრდა, - ასე აფასებს სებ-ის პრეზიდენტი აპრილში ეკონომიკის 7,5%-იან ზრდას. ნათია თურნავას თქმით, 7.5%-ი არის ერთ-ერთი ყველაზე მაღალი ზრდა.

ქვეყნის მთავარი ბანკირის განმარტებითვე, როდესაც ეკონომიკური ზრდა არის მაღალი დაკრედიტებისას ზრდის ტემპიც არ შეიძლება მუდმივად იზრდებოდეს.

„ჩვენ განებივრებულები ვართ ძალიან მაღალი თითქმის ორნიშნა ეკონომიკური ზრდით და ამიტომ 7,5%-ი შეიძლება ვიღაცას მოეჩვენოს უფრო დაბალი. მერწმუნეთ, რომ ძალიან ბევრ ქვეყანას ენატრება მსგავსი ძლიერი ზრდა. 7.5 % არის ერთ-ერთი ყველაზე მაღალი ზრდა. ეკონომიკური ზედა არის ძალიან ძლიერი. ხდება ეკონომიკური ზრდის ნორმალიზება და შესაბამისად დაკრედიტების ნორმალიზებაც. როდესაც ეკონომიკური ზრდა არის მაღალი დაკრედიტებისას ზრდის ტემპიც არ შეიძლება მუდმივად იზრდებოდეს. ეს არ იქნება ჯანსაღი და არ იქნება მდგრადი. ამიტომ 15%-იან დაკრედიტების ზრდას, საკრედიტო პორტფელის ზრდას ჩვენ ვეძახით მდგრად ზრდას და ეს არის საკმარისი იმისთვის, რომ განაპირობოს ეკონომიკური ზრდა და განაპირობოს ფინანსებზე ხელმისაწვდომობა. აქედან გამომდინარე, ჩვენ აქ რაიმე საგანგაშოს ვერ ვხედავთ. პირიქით, ამას ვეძახით ნორმალიზებას და ეს არის ციკლური მოვლენა. 15%-ი და მეტი საკრედიტო პორტფელის ზრდა არის საკმაოდ ნორმალური იმისთვის, რომ მაღალი ეკონომიკური ზრდა უზრუნველყოს“, - აღნიშნა ნათია თურნავამ.

მისივე თქმით, სფერო არ შეიძლება მუდმივად იზრდებოდეს ერთი და იგივე მაღალი ტემპით.

„​რაც შეეხება დეველოპმენტს, ესეც ციკლური ასე ვთქვათ სფერო არის ანუ არ შეიძლება მუდმივად იზრდებოდეს ერთი და იგივე მაღალი ტემპით. გარკვეულწილად ხდება გაჯერება ხოლმე ბაზრის, ნორმალიზდება ეს ტემპი, მერე კვლავ იზრდება. თქვენ უნდა დააკვირდეთ კომპლექსში მათ შორის გაცემული ნებართვების რაოდენობას, რომელიც მზარდია. ეს იმას ნიშნავს, რომ ახალი პროექტები არის ფაიფლაინში, ანუ განხილვაში, ახალი პროექტები გრძელდება. აქედან გამომდინარე ჩვენ რაიმე საყურადღებოს ამ კუთხით ვერ ვხედავთ, ვერც დაჩქარების და ვერც შენელების მიმართულებით. ეს არის საკმაოდ მდგრადი ვითარება“, - აღნიშნა სებ-ის პრეზიდენტმა.