ჩვენ ყოველთვის ვიყენებთ ხოლმე ასეთი ტიპის საერთაშორისო პლატფორმებს რაც შეიძლება მეტ ინვესტორს მივაწოდოთ ინფორმაცია საქართველოში მიმდინარე ეკონომიკურ პროცესებზე და ვისაუბროთ ჩვენს საინვესტიციო მიმზიდველობაზე, - ამის შესახებ  Business Insider Georgia-სთან სებ-ის პრეზიდენტმა ნათია თურნავამ ლონდონში EBRD-ის ყოველწლიური შეხვედრაზე მონაწილეობისას განაცხადა. თურნავას თქმით, ვიზიტის ფარგლებში საქართველოს დელეგაცია ხვდება საინვესტიციო ფონდებს და იმ ინვესტორებს, ვინც მსხვილი პროექტებით არიან დაინტერესებულნი. 

„ჩვენ ყოველთვის ვიყენებთ ხოლმე ასეთი ტიპის საერთაშორისო პლატფორმებს საერთაშორისო შეხვედრებს იმისთვის, რომ არამხოლოდ უშუალოდ ევროპის რეკონსტრუქციისა და განვითარების ბანკის წლიურ შეხვედრაში მივიღოთ მონაწილეობა, არამედ რაც შეიძლება მეტ ინვესტორს მივაწოდოთ ინფორმაცია საქართველოში მიმდინარე ეკონომიკურ პროცესებზე და ვისაუბროთ ჩვენს საინვესტიციო მიმზიდველობაზე. ამ ორი დღის განმავლობაში ჩვენ სწორედ ასეთი შესაძლებლობა მოგვეცა. გუშინაც მთელი დღე ვხვდებოდით სხვადასხვა ინსტიტუციურ კერძო ინვესტორს, საინვესტიციო ფონდებს ძირითადად და ასევე ინვესტორებს, ვინც დაინტერესებულია ჩვენი მსხვილი პროექტებით. ვესაუბრებოდით საქართველოზე და დღეს ერთი ასეთი მსხვილი შეხვედრა ასევე იყო ორგანიზებული Bank Of America -ს მიერ. შეიკრიბნენ ინვესტორები ვინც დაინტერესებულია საქართველოში ფასიანი ქაღალდების შეძენით, ინვესტირებით და მათ გავაცანით ჩვენი მაკროეკონომიკური გარემო. განსაკუთრებით მნიშვნელოვანია და მიმზიდველია მათთვის ის სტაბილური მაკროეკონომიკური ვითარება, რაც საქართველოში არის. მაღალი, თითქმის ორნიშნა ეკონომიკური ზრდის ფონზე, დაბალი ინფლაცია ძალიან ისეთი ეფექტური ეკონომიკური და მათ შორის მონეტარული პოლიტიკა, რაზეც ჩვენ ვესაუბრებოდით. ის რომ ჩვენი სავალუტო ბაზარიც არის საკმაოდ სტაბილური, არის საკმაოდ ძლიერი შემოდინებები უცხოური ვალუტის დაწყებული პირდაპირი უცხოური ინვესტიციებით და დასრულებული ტურიზმით. იგივე ექსპორტი, რომელიც არის მზარდი. სულ ახლახან გამოქვეყნდა საგარეო ვაჭრობის სტატისტიკა და ესეც კიდევ ერთხელ ცხადყოფს რომ საგარეო ვაჭრობა და ექსპორტი კერძოდ არის ძალიან მნიშვნელოვანი „დრაივერი“ ჩვენი ეკონომიკური ზრდის და ამის შესახებ ვუყვებით ინვესტორებს. ვხედავთ მომატებულ ინტერესს, ვხედავთ ახალ სახეებს იმიტომ რომ არამხოლოდ ის ინვესტორები გვხვდებიან ვისაც უკვე აქვს გამოცდილება საქართველოში და საქართველოს კაპიტალის ბაზარზე მონაწილეობის არამედ სრულიად ახალი საინვესტიციო ჯგუფები, გლობალური ჯგუფები, როგორც დასავლეთიდან ასევე აზიიდანაც და გამოხატავენ მზარდ ინტერესს“, - აცხადებს ნათია თურნავა  Business Insider Georgia-სთან.

შეგახსენებთ, რომ საქართველოს ეროვნული ბანკის პრეზიდენტმა ნათია თურნავამ და ფინანსთა მინისტრმა ლაშა ხუციშვილმა, ქართული დელეგაციის სხვა წევრებთან ერთად, ლონდონში EBRD-ის ყოველწლიური შეხვედრის და ბიზნეს ფორუმის ფარგლებში, საერთაშორისო ინვესტორებთან შეხვედრა გამართეს.

შეხვედრა Bank of America-ს ორგანიზებით შედგა.

შეხვედრას ასევე ესწრებოდნენ სებ-ის მაკროეკონომიკისა და სტატისტიკის დეპარტამენტის უფროსი თამთა სოფრომაძე და ფინანსთა მინისტრის მოადგილე ეკატერინე გუნცაძე.