ქართული ეროვნული ვალუტა იუბილარია. ლარი ხდება 30 წლის. როგორც სებ-ის პრეზიდენტმა განაცხადა, ღონისძიებები მთელი წლის განმავლობაში გაიმართება, თუმცა მაისის ბოლოს გრანდიოზული ღონისძიება იგეგმება, რომელსაც სსფ-ს წარმომადგენლები და სხვადასხვა ქვეყნების ცენტრალური ბანკების წარმომადგენლები დაესწრებიან.

„ტრადიციულად ცენტრალური ბანკები აღნიშნავენ ხოლმე ეროვნული ვალუტების ესეთ იუბილეს. ჩვენც რა თქმა უნდა არ ვართ გამონაკლისი. ჩვენ მთელი რიგი ღონისძიებები გვაქვს მთელი წლის განმავლობაში დაგეგმილი. საიუბილეო წელია, მაგრამ ერთ-ერთი ცენტრალური ღონისძიება მაისის ბოლოს გვაქვს დაგეგმილი, როდესაც დიდი საერთაშორისო კონფერენცია გაიმართება, სადაც ბევრი ჩემი კოლეგა, ცენტრალური ბანკების ხელმძღვანელები გვყავს მოწვეული და ბევრმა დაგვიდასტურა კიდეც დასწრება. ისინი გამოვლენ კიდევაც ამ კონფერენციაზე და თავის მოსაზრებებსაც გაგვიზიარებენ. ამ კონფერენციაზე, ცნობილი ეკონომისტები, საერთაშორისო ინვესტორებიც გვეყოლება. საერთაშორისო სავალუტო ფონდიც გვყავს მოწვეული და ასევე გვიდასტურებენ და მისიას ემთხვევა და ჩვენ პატივი გვექნება, რომ დაესწრებიან. ძალიან მაღალი ინტერესია და ისევ და ისევ ამ მაღალ ინტერესს მე ვუკავშირებ ჩვენს ძალიან კარგ, ძალიან მყარ ეკონომიკურ მდგომარეობას. იმიტომ, რომ ყველას უჩნდება სურვილი რა ხდება ასეთი ამ საქართველოში, რომ მიუხედავად ასეთი გარე სირთულეებისა და გამოწვევებისა აქ ამდენად კეთილსაიმედო ეკონომიკური მდგომარეობაა და ხდება ის, რომ არის სწორი ეკონომიკური პოლიტიკა, არის მშვიდობა რაც მთავარია და არის სურვილი, რომ კიდევ უფრო მეტად გავამყაროთ ურთიერთობები ჩვენს საერთაშორისო პარტნიორებთან და ამ გზავნილებს ვაწვდით ყველას და გვაქვს პოზიტიური პასუხიც“, - აღნიშნა ნათია თურნავამ