მიკრობანკმა “კრისტალმა” ახალი სარეიტინგო სააგენტოსგან SCOPE Ratings B+/სტაბილური საკრედიტო შეფასება მიიღო. როგორც მიკრობანკის მიერ სოციალურ ქსელში განთავსებულ ინფორმაციაშია აღნიშნული, აღნიშნული შეფასებით დადასტურდა, რომ „კრისტალი“ საქართველოს უმსხვილესი მიკრობანკია.

„მოხარულები ვართ გაცნობოთ, რომ SCOPE Ratings-მა მიკრობანკ კრისტალს B+/სტაბილური საკრედიტო რეიტინგი მიანიჭა, რითაც დაადასტურა მისი, როგორც საქართველოს უმსხვილესი მიკრობანკის პოზიციონირება, ფოკუსით მიკროდაკრედიტებაზე, სოფლის მეურნეობისა და მცირე და საშუალო ბიზნესის დაფინანსებაზე.

მიკრობანკმა კრისტალმა საკრედიტო შეფასების მიმართულებით პარტნიორობა სააგენტო SCOPE Ratings-თან დაიწყო, რაც კრისტალის ინსტიტუციური განვითარების გზაზე კიდევ ერთი წინ გადადგმული ნაბიჯია.

გადაწყვეტილება SCOPE Ratings-თან თანამშრომლობის დაწყების შესახებ, რომელიც კრისტალის მიკრობანკად წარმატებულ ტრანსფორმაციას მოჰყვა, ნათლად გამოხატავს კომპანიის სწრაფვას მის სტრატეგიაში ახალი პერსპექტივები და შესაძლებლობები შეიტანოს და ბაზრის უფრო სიღრმისეულ ცოდნას დაეყრდნოს.

რეიტინგი აჩვენებს კრისტალის მყარ შემოსავლიანობას, სანდო აქტივების ხარისხსა და სტაბილურ ლიკვიდობას, რაც განპირობებულია მჭიდროდ ორგანიზებული რისკების მართვითა და წამყვანი ინსტიტუციური აქციონერების ზედამხედველობით.

Scope ხაზს უსვამს კრისტალის მნიშვნელოვანი ზრდის პოტენციალს მიკრობანკის ლიცენზიის მიღების შემდეგ და ადასტურებს მის პოზიციას, როგორც მდგრადი, მომავალზე ორიენტირებული და სოციალური პასუხისმგებლობის მქონე ინსტიტუტი საქართველოს ფინანსურ სექტორში.

SCOPE Ratings, წამყვანი ევროპული სარეიტინგო სააგენტო, განვითარებად ბაზრებზე ფინანსური ინსტიტუტების შეფასების დიდი გამოცდილებით გამოირჩევა. მისი მზარდი საქმიანობა საქართველოს მიკროსაბანკო სექტორში კიდევ უფრო ამყარებს კრისტალის ხედვას, ითანამშრომლოს პარტნიორთან, რომელსაც გლობალურ სტანდარტებთან ერთად, ადგილობრივი ბაზრის სიღრმისეული ცოდნა აქვს“, - აღნიშნულია „კრისტალის“ მიერ გამოქვეყნებულ ინფორმაციაში.