Kursi.ge - ვალუტის გაცვლის პირველი ონლაინ პლატფორმა საქართველოში, რომელიც მომხმარებლებს საშუალებას აძლევს ისარგებლონ საუკეთესო კურსით და დაზოგონ დრო.
როგორც Business Insider Georgia-სთან საუბარში კომპანიის დამფუძნებელმა, ნინო კუპრაშვილმა განაცხადა, Kursi.ge უახლოეს მომავალში მობილურ აპლიკაციას წარადგენს და რამდენიმე ახალ სერვისსაც დაამატებს.

„ჩვენი აპლიკაცია ამ ეტაპზე სატესტო რეჟიმშია და სექტემბრიდან იქნება ხელმისაწვდომი მომხმარებლებისთვის. წლის ბოლომდე ვგეგმავთ ახალი სერვისების, დამატებითი ბანკებისა და ვალუტების ჩართვას,“ - აცხადებს ნინო კუპრაშვილი.
მისივე თქმით, პლატფორმას მალე დაემატება ახალი ვალუტები, მათ შორის თურქული ლირა, ჩინური იუანი და ბრიტანული ფუნტი.

კომპანიის მონაცემებით, ტრანზაქციებისა და კლიენტების რაოდენობა სტაბილურად მზარდია.

„გასული წლის ანალოგიურ პერიოდთან შედარებით ტრანზაქციების რაოდენობის მნიშვნელოვანი ზრდა გვაქვს. მხოლოდ მაისის მაჩვენებელთან შედარებით ტრანზაქციების ორჯერადი ზრდა ფიქსირდება. რეალურად ტრანზაქციები ყოველთვიურად მატულობს,“ - აღნიშნავს კომპანიის დამფუძნებელი.

ტურისტული სეზონის პარალელურად პლატფორმაზე უცხოურ ვალუტაზე მოთხოვნა მნიშვნელოვნად გაიზარდა.

„თუ წინა თვეების განმავლობაში კერძო პირების ტრანზაქციებში ლარი დომინირებდა, ამ ეტაპზე მნიშვნელოვნად მომატებულია უცხოური ვალუტის ყიდვის წილი,“ - ამბობს ნინო კუპრაშვილი.
Kursi.ge-ზე თანხის კონვერტაციის ლიმიტი კერძო პირებისთვის 100 000 ლარია, ხოლო კომპანიებისთვის - 300 000 ლარი.

„კორპორატიული კლიენტებისთვის ლიმიტი 300 000 ლარს შეადგენს, ფიზიკური პირებისთვის კი - 100 000 ლარს. თანხის მაქსიმალური გადახურდავება სწორედ ამ ლიმიტებში ხორციელდება. ამ ეტაპზე გვყავს საკმაოდ მსხვილი კლიენტები — მათ შორის კოკა-კოლა, არქი და სხვა კომპანიები. ისინი უკვე სარგებლობენ ჩვენი პლატფორმის მომსახურებით. მიუხედავად იმისა, რომ 300 000-ლარიან ლიმიტს არ არღვევენ, ხშირად ახორციელებენ რამდენიმე ტრანზაქციას“, - განმარტავს კუპრაშვილი.
Kursi.ge-ს უკვე 60,000-ზე მეტი მომხმარებელი ჰყავს, მათ შორის 4,000-ზე მეტი იურიდიული პირია.