მსგავსი ემისიები წარმოადგენს საორიენტაციო წერტილს ადგილობრივი კაპიტალის ბაზრისთვის, - ამის შესახებ Business Insider Georgia-ს Galt & Taggart-ის გენერალური დირექტორის მოადგილემ ქეთევან თოიძემ განუცხადა. მისივე განმარტებით, ასეთი განთავსებები ეხმარება კომპანიებსა და ფინანსურ ინსტიტუტებს, უკეთ დაგეგმონ საკუთარი დაფინანსების სტრატეგია.

„Galt & Taggart-მა მონაწილეობა მიიღო საქართველოს სახელმწიფო სუვერენული ევრობონდის ემისიის ტრანზაქციაში, როგორც  განთავსების თანაწამყვანმა მენეჯერმა, საერთაშორისო ბუქრანერებთან: Citi, J.P. Morgan, ICBC და Société Générale  თანამშრომლობით. მსგავსი ემისიები წარმოადგენს საორიენტაციო წერტილს ადგილობრივი კაპიტალის ბაზრისთვის და ეხმარება კერძო კომპანიებსა და ფინანსურ ინსტიტუტებს, უკეთ დაგეგმონ საკუთარი დაფინანსების სტრატეგია და შეაფასონ ინვესტორების მოლოდინები.

ვულოცავთ ტრანზაქციის წარმატებით განხორციელებას ყველა ჩართულ მხარეს. ჩვენ, როგორც წამყვანი საინვესტიციო ბანკი საქართველოში, ვაგრძელებთ მუშაობას კაპიტალის ბაზრის განვითარებისთვის. ჩვენი მიზანია, კერძო კომპანიებსა და ფინანსურ ინსტიტუტებს მივცეთ შესაძლებლობა, დაგეგმონ და განახორციელონ დაფინანსების მოზიდვა როგორც ადგილობრივ, ისე საერთაშორისო კაპიტალის ბაზრებზე“ - აცხადებს Galt & Taggart-ის გენერალური დირექტორის მოადგილე ქეთევან თოიძე.

შეგახსენებთ, რომ საქართველოს მთავრობამ წარმატებით განახორციელა 500 მილიონი აშშ დოლარის ოდენობის ევროობლიგაციების გამოშვება ლონდონის საფონდო ბირჟაზე - კუპონის განაკვეთი დაფიქსირდა 5.125% ოდენობით. ფინანსთა სამინისტროს ცნობით, მიმდინარე გამოშვებისას დაფიქსირებული კუპონი, ევროობლიგაციების ბაზრისთვის ყველაზე დაბალი განაკვეთია საქართველოს მსგავსი და ერთი საფეხურით მაღალი საკრედიტო რეიტინგის მქონე სუვერენული ევროობლიგაციებისთვის, ბოლო 4 წელიწადში.

ახლად გამოშვებული ევროობლიგაციებით განხორციელდა 2021 წლის ობლიგაციების რეფინანსირება. გარდა მოზიდული ფინანსური რესურსისა, ახალი ევროობლიგაციის გამოშვება, მნიშვნელოვანია ორი ფაქტორის გამო: ის განსაზღვრავს ქვეყნის რისკის დონეს, ზომავს საერთაშორისო ინვესტორების დაინტერესებასა და ნდობას ქვეყნისა და მისი ეკონომიკის მიმართ.