BARTA-ს ჯილდოს გადმოცემა დამატებითი დასტურია იმისა, რომ კორპორაციული გამჭვირვალობა და ანგარიშვალდებულება ქვეყანაში დაფასებულია, - ამის შესახებ BARTA 2025-ში გამარჯვების შემდეგ მიკრობანკ „კრისტალის“ სამეთვალყურეო საბჭოს თავმჯდომარე არჩილ ბაკურაძემ განაცხადა.

აღსანიშნავია, რომ „საუკეთესო წლიური ანგარიშისა და გამჭვირვალობის ჯილდოს“ (BARTA) მეშვიდე დაჯილდოების ცერემონიაზე 2025 წლის კონკურსის გამარჯვებულები გამოვლინდნენ.

მსხვილი საფინანსო კომპანიების კატეგორიაში გამარჯვება სამმა ფინანსურმა ინსტიტუტმა მოიპოვა.

· საპატიო ჯილდო: ბაზისბანკი
· გამარჯვებული: სს საქართველოს ბანკი
· საუკეთესო მდგრადობის ანგარიში: სს მიკრობანკი „კრისტალი“

„ეს, რა თქმა უნდა, დიდი სტიმულია უფრო მაღალგანვითარებული და საერთაშორისო ნდობით აღჭურვილი კორპორაციული სექტორის განვითარებისთვის. მოგეხსენებათ, საბანკო სექტორი ჩვენს ქვეყანაში საკმაოდ წინწაწეული და განვითარებულია. ამ მხრივ კრისტალი გამონაკლისი არ არის. გვახარებს, რომ ჩვენი კომპანიის მრავალწლიანი ძალისხმევა ანგარიშგების სისტემის დახვეწაში კვლავ საინტერესო, მნიშვნელოვანი და აღიარების ღირსი ხდება“, - აცხადებს არჩილ ბაკურაძე.

BARTA-ს ჯილდო მიზნად ისახავს კომპანიების წახალისებას საუკეთესო პრაქტიკების დანერგვის მიმართულებით, რასაც შედეგად უფრო გამჭვირვალე და კონკურენტული ბიზნესგარემოს შექმნა მოჰყვება.

წლევანდელი ღონისძიების ორგანიზატორია BARTA-ს კომიტეტი, რომელიც საქართველოს ეროვნული ბანკის (NBG), სსიპ საქართველოს დაზღვევის სახელმწიფო ზედამხედველობის სამსახურის (ISSSG), ბუღალტრული აღრიცხვის, ანგარიშგებისა და აუდიტის ზედამხედველობის სამსახურის (SARAS) და ბუღალტრული აღრიცხვის რეფორმის დაინტერესებულ მხარეთა ფონდის (RSF) წარმომადგენლებისგან არის დაკომპლექტებული. ღონისძიების მხარდამჭერები არიან მსოფლიო ბანკი და საქართველოს ბიზნეს ასოციაცია.