ეს საკმაოდ მნიშვნელოვანი მოვლენა იყო და ერთ-ერთი მთავარი მიზეზი რეიტინგის პერსპექტივის გაუმჯობესების სწორედ რეზერვების შევსება იყო, - აღნიშნულის შესახებ გადაცემა „იმედის დილაში“ რუბრიკა Business Insider Georgia-ში სტუმრობისას საქართველოს ეროვნული ბანკის პირველმა ვიცე-პრეზიდენტმა ეკატერინე მიქაბაძემ Fitch-ის რეიტინგზე საუბრისას განაცხადა. 
მისივე თქმით,  Fitch დადებითად აფასებს საქართველოს ეკონომიკურ ტენდენციებს.

„Fitch-მა სულ ახლახან საქართველოს სუვერენული რეიტინგი „bb“ დონეზე შეინარჩუნა, ხოლო პერსპექტივა „სტაბილურამდე“ გააუმჯობესა. ეს საკმაოდ მნიშვნელოვანი მოვლენა იყო და ერთ-ერთი მთავარი მიზეზი რეიტინგის პერსპექტივის გაუმჯობესებისა სწორედ რეზერვების შევსება, დაგროვება იყო. სარეიტინგო კომპანია აღნიშნავს თავის ანგარიშში, რომ სებ-მა ხელსაყრელი სავალუტო შემოდინებების, ეკონომიკური ზრდის და დედოლარიზაციის/ლარიზაციის პირობებში შეძლო და ძალიან მასშტაბური, მნიშვნელოვანი ინტერვენციები განახორციელა, რამაც მისცა საფუძველი Fitch-ის პერსპექტივის გაუმჯობესებისა. გარდა ამისა Fitch საკმაოდ დადებითად აფასებს ზოგადად ეკონომიკურ ტენდენციებს საქართველოში, ინფლაციის მიმართულებითაც საკმაოდ პოზიტიური შეფასებებია. მათი პროგნოზით 2026-2027 წლებში ინფლაციის საშუალო მაჩვენებელი 3,2% იქნება და ეკონომიკური ზრდა მიმდინარე წელს, მათი პროგნოზის მიხედვით, 7,3%-ი იქნება. ასევე სტაბილურობაზე, როგორც ყოველთვის ძალიან დიდი ყურადღებას ამახვილებს Fitch და მათი შეფასებით ქართული საბანკო სექტორი სტაბილურია, გამოირჩევა კაპიტალის და ლიკვიდურობის მაღალი ბუფერებით, მომგებიანობით და ასევე აქტივების მაღალი ხარისხით“, - აღნიშნა სებ-ის პირველმა ვიცე-პრეზიდენტმა.

„დედოლარიზაცია-ლარიზაცია ჩვენი ერთ-ერთი მნიშვნელოვანი პრიორიტეტია და ამ მხრივ საკმაოდ პოზიტიური ტენდენციები გაქვს. გასულ წელს დაფიქსირებული. საკმაოდ მაღალი ზრდის შემდგომ დედოლარიზაციის პროცესი გაგრძელდა, საკმაოდ აქტიური ტემპით მიმდინარეობს და უკვე მიმდინარე მონაცემებით დეპოზიტების დოლარიზაციამ 48,8% შეადგინა. დოლარიზაცია დაახლოებით 4%-ით არის შემცირებული პიკიდან. კიდევ უფრო კარგი ტენდენციებია სესხების ლარიზაციის მიმართულებით. სესხებში დოლარიზაცია მხოლოდ 42%-ს შეადგენს. ეს ერთ მნიშვნელოვნად მიუთითებს ლარის ნდობის მიმართულებით. ის, რომ ლარში დაზოგვა უფრო და უფრო სანდო ხდება საქართველოს საზოგადოებისთვის“, - განაცხადა ეკატერინე მიქაბაძემ. 

საკრედიტო-სარეიტინგო კომპანია Fitch Ratings-მა საქართველოს სუვერენული რეიტინგი ‘BB’ დონეზე შეინარჩუნა, ხოლო პერსპექტივა - სტაბილურამდე გააუმჯობესა. 

პერსპექტივის გაუმჯობესების მთავარ ფაქტორად საკრედიტო სარეიტინგო კომპანია საერთაშორისო სავალუტო რეზერვების ზრდას ასახელებს.

როგორც Fitch-ის მიერ გავრცელებულ ანგარიშშია აღნიშნული, საქართველოს საერთაშორისო რეზერვები 2024 წლის ოქტომბრის დაბალ ნიშნულთან შედარებით 37.2%-ით გაიზარდა და 2025 წლის ოქტომბრის მდგომარეობით ისტორიულ მაქსიმუმს 5.6 მლრდ აშშ დოლარს მიაღწია. 

სარეიტინგო კომპანია ასევე ხაზს უსვამს, რომ რეზერვების ზრდა სებ-ის პოლიტიკის შედეგია, რაც წლის დასაწყისიდან განხორციელებულ შესყიდვებს, ოქროს ფასის გადაფასებას და 2024 წლის ბოლო სარეზერვო მოთხოვნების ზრდას უკავშირდება. მათივე განმარტებით, თავის მხრივ, საგარეო შემოდინებებმა და დეპოზიტების დედოლარიზაციამ წვლილი შეიტანა რეზერვების ზრდაში.

“საქართველოს საბანკო სექტორი სტაბილურია, მაღალი მომგებიანობით (სექტემბრის მდგომარეობით ROE 22.7%), მაღალი კაპიტალიზაციით (პირველადი კაპიტალის კოეფიციენტი 20%) და აქტივების მაღალი ხარისხით (უმოქმედო სესხების წილი 2.6%).“ პოზიტიურია დედოლარიზაციის ტენდენციები“ - ნათქვამია Fitch-ის ანგარიშში. 

Fitch პროგნოზით, 2026-2027 წლებში ინფლაცია მიზნობრივ მაჩვენებელთან ახლოს - საშუალოდ 3.2% იქნება, ხოლო ეკონომიკური ზრდა ძლიერი და 2025 წელს 7.3%-ს, 2026 წელს კი 5.3%-ს მიაღწევს.