საპენსიო სააგენტოს, რომელსაც მიმდინარე თვიდან სახელი შეეცვალა და საპენსიო ფონდის სახელით განაგრძობს ოპერირებას, აქტივების მოცულობა ყოველთვიურად იზრდება. როგორც რადიო სივრცის ეთერში გადაცემა Business Insider Georgia-ში სტუმრობისას საპენსიო ფონდის მთავარი საინვესტიციო ოფიცრის მოვალეობის შემსრულებელმა ანა ნაჭყებიამ განაცხადა, 2025 წლის 30 აპრილის მდგომარეობით, ფონდის აქტივების მოცულობამ 6.7 მილიარდ ლარს, ხოლო ჯამურმა დაგენერირებულმა ამონაგებმა 1.6 მილიარდ ლარს მიაღწია.

„ჩვენი აქტივების მოცულობა ყოველთვიურად იზრდება. როგორც იცით ვაერთიანებთ დაახლოებით 1.4 მლნ მონაწილეს, რომლებიც ყოველთვიურად თავიანთი შემოსავლისას დაახლოებით 6%-ს ფონდში რიცხავენ. აპრილის მდგომარეობით, ჩვენი აქტივების მოცულობამ 6.7 მლრდ ლარი შეადგინა. აღნიშნული 6.7 მლრდ-დან კი 1.6 მლრდ ლარი არის ჩვენს მიერ დაგენერირებული ამონაგები, ხოლო დანარჩენი შენატანები, რომელსაც ვიღებთ კომპანიებისგან“, - აცხადებს ანა ნაჭყებია.

მისივე თქმით, ყველას აქვს საშუალება, რომ თავად გადაწყვიტოს თუ რომელ პორტფელში სურს მოახდინოს საკუთარი ფინანსების ინვესტირება.

„როგორც იცით კანონის შესაბამისად, ჩვენ ვმართავთ სამი განსხვავებული რისკისა და შემოსავლების მქონე პორტფელს. ეს არის კონსერვატიული პორტფელი, დაბალანსებული პორტფელი და დინამიკური პორტფელი.

მთავარი სხვაობას ამ პორტფელებს შორის განსაზღვრავს კანონი და მთავარი სხვაობა არის აქტივების განაწილება.

კონსერვატიული პორტფელის ძირითადი ნაწილი, ანუ დაახლოებით 80%-ი არის ინვესტირებული საქართველოში, ადგილობრივ ფასიან ქაღალდებში. აქ არის ძირითადად დეპოზიტები ქართულ ბანკებში და ასევე გვაქვს სახელმწიფო ფასიანი ქაღალდები, ხოლო 20%-ი არის განთავსებული საერთაშორისო აქციებში.

დინამიკური პორტფელი, რომელიც ამ კონსერვატიულიდან ყველაზე განსხვავებული პორტფელია სხვანაირად არის მოწყობილი და აქ აქტივების ძირითადი ნაწილი, 55%-ი არის ინვესტირებული საზღვარგარეთ აქციებში, ხოლო 45%-ი ადგილობრივ ობლიგაციებში.

შესაბამისად, დაბალანსებული პორტფელი არის ამ ორს შორის პორტფელი და ეს საშუალებას აძლევს ყველა მონაწილეს თავად გადაწყვიტოს როგორ დააინვესტიროს თავისი აქტივები. ყველას უჩანს საპენსიო გვერდზე თავისი აქტივების მოცულობა და თვითონ შეუძლია, რომ მოვიდეს საპენსიო ფონდში, ან იუსტიციის სახლში და გადაწყვიტოს, რომელი არის მისთვის შესაფერისი საინვესტიციო პორტფელი“, - აცხადებს ანა ნაჭყებია.