არაჰეჯირებული უცხოური ვალუტის სესხების ზღვარი 500 000-დან 750 000 ლარამდე ზრდა ლარიზაციის პროცესის დაჩქარებისთვის გადადგმული ნაბიჯია, - მიიჩნევს საქართველოს საბანკო ასოციაციის პრეზიდენტი ალექსანდრე ძნელაძე. ძნელაძის თქმით, აღნიშნული გადაწყვეტილება შედარებით ნაკლებ მომხმარებელს შეეხება, ვიდრე სებ-ის წინა გადაწყვეტილებების დროს იყო.

„არაჰეჯირებული უცხოური ვალუტის სესხების ზღვრის 750 000 ლარამდე ზრდა ცალსახად ხელს შეუწყობს და კიდევ ერთხელ არის ლარიზაციის პროცესის დაჩქარებისთვის გადადგმული ნაბიჯი, რაც კიდევ უფრო მეტად უწყობს ხელს ეროვნული ბანკის ეროვნული ვალუტის სტაბილურობას და ლარიზაციის პროცესის უფრო მეტ ინტეგრაციას. მაგრამ მეორე კუთხით შეგვიძლია ვთქვათ, რომ აღნიშნული ზღვრის 750 000 ლარამდე ზრდა უფრო ნაკლებ მომხმარებელს შეეხება, ვიდრე ყველა წინა გადაწყვეტილება. აღნიშნული კიდევ ერთხელ ხაზს უსვამს, რამდენად მდგრადი არის ეკონომიკა და რამდენად მომავალშიც კიდევ უფრო ვუწყობთ ხელს ამ მდგრადობის განვითარებას“, - აღნიშნა საქართველოს საბანკო ასოციაციის პრეზიდენტმა.

არაჰეჯირებული უცხოური ვალუტის სესხების ზღვარი 500 000-დან 750 000 ლარამდე იზრდება. აღნიშნული ცვლილება კი ძალაში 2025 წლის 1 აგვისტოდან შევა. ამის შესახებ სებ-ის ფინანსური სტაბილურობის კომიტეტის გადაწყვეტილებაშია აღნიშნული.

„ეროვნული ბანკი განაგრძობს მუშაობას ფინანსური დოლარიზაციის მაღალი დონით გამოწვეული სტრუქტურული რისკების შესამცირებლად. სებ-ის მიერ გატარებული ღონისძიებების ფონზე დოლარიზაციის მნიშვნელოვანი შემცირების მიუხედავად, ეს უკანასკნელი და მასთან დაკავშირებული სტრუქტურული რისკები ფინანსური სექტორისთვის ერთ-ერთ მნიშვნელოვან გამოწვევად რჩება. ეროვნული ბანკი, გაცხადებული პოლიტიკის შესაბამისად, ინდუსტრიასთან კოორდინაციითა და მაკროეკონომიკური გარემოსა და რისკების გათვალისწინებით, დედოლარიზაციის გრძელვადიანი გეგმის განხორციელებას განაგრძობს. ფინანსური სტაბილურობის კომიტეტის გადაწყვეტილებით არაჰეჯირებული უცხოური ვალუტის სესხების ზღვარი 500 000-დან 750 000 ლარამდე გაიზარდა. ცვლილება ძალაში 2025 წლის 1 აგვისტოდან შევა“, - აღნიშნულია სებ-ის მიერ გავრცელებულ პრესრელიზში.