2026 წლის განმავლობაში ვგეგმავთ, რომ გავაფართოოთ ჩვენი მომსახურების არეალი და დავამატოთ ახალი სერვისები, რათა მომხმარებლებისთვის Kursi.ge-ს მომსახურება უფრო კომფორტული გახდეს, - ამის შესახებ Business Insider Georgia-სთან საუბარში კომპანიის დამფუძნებელმა ნინო კუპრაშვილმა განაცხადა. Kursi.ge-ს დამფუძნებელი აცხადებს, რომ 2026 წელს იგეგმება როგორც ახალი ვალუტების დამატება, ასევე საერთაშორისო ბაზარზე გასვლა.

„რა თქმა უნდა, ვაპირებთ ახალი ვალუტების დამატებას - ლირა და იუანი ის ვალუტებია, რომელთა დამატებას ამ ეტაპზე აქტიურად განვიხილავთ. ასევე ვგეგმავთ ქვეყნის ფარგლებს გარეთ გასვლას. განვიხილავთ როგორც დსთ-ის სივრცის ქვეყნებს, ასევე ისეთ ევროპულ ქვეყნებს, რომლებიც არ არიან ევროზონასა და ევროკავშირში, რადგან იქ კონვერტაციის საჭიროება ბევრად უფრო მაღალია. ამ ეტაპზე შერჩეული გვაქვს სამი ქვეყანა, რომელთაგან ერთ-ერთში 2026 წელს შესვლა ძალიან გვინდა“, - აცხადებს ნინო კუპრაშვილი.

Kursi.ge-ს დამფუძნებელი 2025 წელს კომპანიის ოპერირებას წარმატებულად აფასებს და აცხადებს, რომ Kursi.ge-მ მომხმარებლებს უკვე 20 მლნ ლარზე მეტი დააზოგინა.

„2025 წელი ჩვენთვის აქტიური ზრდის წელი იყო. დღეისათვის გვყავს 120 ათასზე მეტი მომხმარებელი, აქედან 5 ათასზე მეტი კომპანიაა, ხოლო დანარჩენი ფიზიკური პირები არიან. მომხმარებლებს 20 მლნ ლარზე მეტი დავაზოგინეთ, რაც ძალიან გვეამაყება. ბაზარზე შეიქმნა რეალური კონკურენციის მაგალითი და მომხმარებლებს ხელსაყრელი კურსის მიღება შეუძლიათ როგორც ვალუტის ყიდვის, ისე გაყიდვის დროს.

2025 წელს ასევე ჩავუშვით აპლიკაცია, რომელიც ამ ეტაპზე ტესტირების რეჟიმშია, თუმცა ყველა მომხმარებელს აქვს შესაძლებლობა ჩამოტვირთოს და ისარგებლოს Kursi.ge-ს აპლიკაციით. აპლიკაციის ფარგლებში მუშაობს ღია ბანკინგიც, რაც ნიშნავს იმას, რომ მომხმარებლებს ერთი კლიკით შეუძლიათ თანხის გადმორიცხვა და დაპირებისამებრ 15 წუთში ან უფრო ნაკლებ დროში დაკონვერტირებული ვალუტის მიღება.

ყველაზე მნიშვნელოვანი ცვლილება, რაც ამ ბაზარზე მოხდა და რაც ჩვენი მიღწევაცაა, ის არის, რომ სებ-მა ივლისში გამოსცა რეგულაცია, რომლის მიხედვითაც ონლაინ სავალუტო ვაჭრობა ცალკე, ლიცენზირებადი მიმართულებაა. Kursi.ge-მ ეს ლიცენზია პირველად მიმდინარე წლის ოქტომბერში მიიღო, რაც ძალიან გვახარებს, რადგან ეს ინდუსტრიის ახალი მიმართულების ჩამოყალიბებას ნიშნავს და გვჯერა, რომ მსგავსი ნაბიჯები მომხმარებლებისთვის ვალუტის ონლაინ კონვერტაციას კიდევ უფრო ხელმისაწვდომს გახდის“, - აცხადებს Kursi.ge-ს დამფუძნებელი.