2025 წელი გამოირჩეოდა იმით, რომ მაკროეკონომიკური სტაბილურობა იყო შენარჩუნებული და ამ ფონზე გაუმჯობესება გვქონდა ბევრი მიმართულებით, - ამის შესახებ რადიო „სივრცის“ ეთერში გადაცემა Business Insider Georgia-ში სტუმრობისას Galt & Taggart-ის მთავარმა ეკონომისტმა ლაშა ქავთარაძემ განაცხადა. 

მისი თქმით, 2025 წლის დასაწყისიდან ქვეყნის მაკრო ეკონომიკური პარამეტრები შეიცვალა ისე, რომ Galt & Taggart-ს საკუთარი პროგნოზის გადახედვა რამდენრემე მოუწია. 

„რომ დავიწყოთ 2025 წლის შეფასება მაკროეკონომიკურ ჭრილში, წლის დასაწყისი,  უფრო პესიმისტური განწყობები იყო. იყო პროგნოზები გაკეთებული, რომ ეკონომიკური ზრდა იქნება ძალიან დაბალი, იყო ზოგიერთის პროგნოზით უარყოფითიც შეიძლება ყოფილიყო ეკონომიკური ზრდა. საერთაშორისო ორგანიზაციები ზოგადად გამოირჩევიან კონსერვატიული მიდგომებით და მათი პროგნოზებიც წლის დასაწყისში მოკრძალებული იყო.  წლის დასაწყისში ჩვენი საბაზისო სცენარი იყო, რომ საქართველოს ეკონომიკა 2025 წელს 5%-ით გაიზრდებოდა. თუმცა შემდგომ მოვლენები სრულიად რადიკალურად შეიცვალა - პირველი კვარტლის ბოლოს, როდესაც დავინახეთ, რომ წინასწარი შეფასებები ეკონომიკური ზრდის საკმაოდ მაღალი იყო - იანვარში, თებერვალში - უკვე გარკვეული ინდიკატორები მარტის მონაცემებზეც მიანიშნებდა და ამან ბიძგი მისცა, რომ ეკონომიკური პროგნოზები ზრდის მიმართულებით ყოფილიყო გადახედილი. ჩვენ ვიყავით პირველი, რომელმაც მნიშვნელოვნად გადახედა ეკონომიკური ზრდის პროგნოზს. მახსოვს 5-დან 6.8%-მდე გავზარდეთ და ასევე შემდგომ გვქონდა კიდევ ერთი გადახედვა წლის პირველი ნახევრის ბოლოს, 7.5%-მდე გავზარდეთ ეკონომიკური ზრდის პროგნოზი და აი ამ პროგნოზით სხვებთან შედარებით, როგორც საერთაშორისო ორგანიზაციებთან, ისე ადგილობრივ კვლევით ორგანიზაციებთან შედარებით, ყველაზე მაღალი პროგნოზი გვქონდა“, - აღნიშნა ლასა ქავთარაძემ.

მისივე განმარტებით, 11 თვეში საქართველოს ეკონომიკა 7.5%-ით არის გაზრდილი და შემდგომ კვირაში დაიდება უკვე დეკემბრის მაჩვენებლები და ამის შემდეგ წლიური შეფასებაც გვექნება.

„სხვა პარამეტრებიც მნიშვნელოვანია. ყურადღება მინდა გავამახვილოთ სავალუტო შემოდინებებზე, რომელიც საკმაოდ ძლიერი დარჩა 2025 წელს წინა წლებთან შედარებით. მაგალითად, თუ შევხედავთ ჩვენ ტურიზმს, ტურიზმის შემოსავლები 4.7 მილიარდი იყო 2025 წელს. ეს არის 6%-იანი წლიური ზრდა. ფულადი გზავნილები 3.6 მილიარდს გაუტოლდა. ასევე რეკორდული მაჩვენებელი იყო ვაჭრობის კუთხით, ექსპორტი რეკორდულად გაიზარდა 7.9 მილიარდამდე. ასევე მაღალი იყო იმპორტიც და იმპორტის მაღალი დონე იმაზე მიუთითებდა, რომ შიდა მოთხოვნა იყო მაღალი და მთლიანობაში ფაქტობრივად სავალუტო შემოდინებები საკმაოდ სოლიდური იყო.

ასევე სოლიდური იყო პირდაპირი უცხოური ინვესტიციები, რაც ცხრა თვის მონაცემი გვაქვს და ის, რომ სავალუტო შემოდინებები მაღალ დონეზე იყო შენარჩუნებული, ამან ხელი შეუწყო იმას, რომ ეროვნულ ბანკს რეზერვები დაეგროვებინა, რომელიც რეკორდულად ასევე გაიზარდა 2025 წლის ბოლოს - 6.2 მილიარდი არის.

გაცვლითი კურსი გამყარდა დაახლოებით 4.2%-ით წლის 2025 წლის დასაწყისიდან. რაც შეეხება ინფლაციას, ინფლაცია იყო ერთ-ერთი მაჩვენებელი, რომელმაც ზრდა დაიწყო მარტიდან მოყოლებული და შემდგომ წლის მეორე ნახევარში 4%-ს გადააჭარბა და მაღალი იყო, ფაქტობრივად პიკს მიაღწია ოქტომბერში, თუმცა შემდგომ დაიწყო შენელება და წლის ბოლოს 4%-ზე ჩამოვიდა. საშუალო წლიური ინფლაციით 2025 წელი დასრულდა 3.9%-ის ფარგლებში.

ის, რომ ასე ვთქვათ ინფლაციამ ზრდა დაიწყო და ამავდროულად მნიშვნელოვანი იყო, რომ ეროვნულ ბანკს რეზერვები დაეგროვებინა, მას  მოუხდა ფრთხილი მონეტარული პოლიტიკის გატარება, რაც ნიშნავდა იმას, რომ მონეტარული პოლიტიკის განაკვეთი ფაქტობრივად წლის განმავლობაში უცვლელად 8%-ის დონეზე შეინარჩუნა. და კიდევ თუ მაკროეკონომიკურ ჭრილში თუ შევხედავთ ფისკალურ პარამეტრებს, აქ გაუმჯობესება გვქონდა როგორც მიმდინარე, მთავრობის ვალის კუთხით, ასევე ფისკალური დეფიციტის კუთხით. არ არის საბოლოო მაჩვენებელი ბიუჯეტის დეფიციტის, თუმცა ჩვენი ვარაუდით ეს 2.5%-ზე დაბალი იქნება მთლიანი შიდა პროდუქტის მიმართ. და რაც შეეხება მთავრობის ვალს, მისი დონე მოსალოდნელი არის მთლიანი შიდა პროდუქტის 34%-ის დონეზე - რაც მნიშვნელოვნად გაუმჯობესებული მაკროეკონომიკური მაჩვენებელი არის. მთლიანობაში რომ ვთქვათ, 2025 წელი გამოირჩეოდა იმით, რომ მაკროეკონომიკური სტაბილურობა იყო შენარჩუნებული და ამ ფონზე გაუმჯობესება გვქონდა ბევრი მიმართულებით“, - განაცხადა ლაშა ქავთარაძემ.