16 ივნისიდან „კრისტალი“ საბანკო პროდუქტების შეთავაზებას იწყებს. როგორც მიკრობანკის გენერალური დირექტორი ილია რევია აცხადებს, მიკრობანკის ლიცენზიის მიღების შემდეგ „კრისტალი“ გადამწყვეტი ცვლილებების გზაზეა, რაც ბანკის შესაძლებლობებს ახალ საფეხურზე გადაიყვანს.

„მიკრობანკად ტრანსფორმაციისთვის დიდი ხნის მანძილზე ვემზადებოდით. საკმაოდ ბევრი ვიმუშავეთ და პროცესი ჯერ კიდევ გრძელდება. 16 ივნისიდან უკვე გავუშვებთ ახალ  სერვისებს და ჩვენს მომხმარებელს საკმაოდ საინტერესო და მათზე მორგებულ პროდუქტებს შევთავაზებთ.

ტრანსფორმაციისთვის ფარგლებში ბევრი ცვლილება განვახორციელეთ: შეიცვალა ტექნოლოგიები, მიდგომები, საჭირო გახდა ახალი ცოდნის მიღება, დავიმატეთ გუნდის ახალი წევრები. განსაკუთრებით ბევრი სამუშაო გავწიეთ რისკების მართვის მიმართულებით, ტექნოლოგიური განვითარებისთვის და თამამად შემიძლია განვაცხადო, რომ კრისტალი საბანკო ოპერირების ამ მნიშვნელოვან ეტაპს კარგად მომზადებული ხვდება. ცხადია, აქ ჩვენი გუნდის წევრების დამსახურება ძალიან დიდია. აქვე, მადლობა საქართველოს ეროვნულ ბანკს, რომელიც აქტიურად გვიჭერდა მხარს ამ მნიშვნელოვან პროცესში,

16 ივლისიდან რეალურად ჩვენ ბაზარს შევთავაზებთ დაფინანსების უფრო მეტ შესაძლებლობებს.  მიკრო და მცირე მეწარმეებზე ლიმიტის ზრდა 1 მლნ ლარამდე - ეს საკმაოდ მნიშვნელოვანი ნაბიჯია. ჩვენი კონკურენტული უპირატესობა ყოველთვის იყო მომხმარებელთან სიახლოვე, მომხმარებლების ბიზნესის სწორი აღქმა და გაგება, რისკების შეფასება. ვგეგმავთ სერვისების გაციფრულებას, ახალი სერვისების და პროდუქტების დამატებას და ამ სიახლეებს ეტაპობრივად გავაცნობთ ჩვენს მომხმარებლებს “, - აცხადებს ილია რევია.

მიკრობანკი “კრისტალი” საქართველოში მოქმედი წამყვანი ფინანსური ინსტიტუტია, რომელიც დინამიურად იზრდება და ვითარდება. კომპანია ფიზიკურ და იურიდიულ პირებს მრავალფეროვან, თანამედროვე, ინოვაციურ ფინანსურ პროდუქტებს სთავაზობს.