ზაფხულში გავხსნით გუდაურამდე მისასვლელ გზას, რაც უზრუნველყოფს იმას, რომ ზამთრის პერიოდში აღარ მოხდეს შეფერხება, - ამის შესახებ გადაცემა „იმედის დილაში“ რუბრიკა Business Insider Georgia-ში სტუმრობისას ინფრასტრუქტურის მინისტრმა რევაზ სოხაძემ განაცხადა. პროექტი დასრულების შემდეგ  გააერთიანებს ყველაზე დიდი გვირაბს და 166 სიმაღლის ხიდს. 

„ვიტყვი იმ მნიშვნელოვან პროექტზე, რომელიც ახლა ხორციელდება. ეს არის ქვეშეთი-კობის საგზაო ინფრასტრუქტურის მშენებლობა - ეს არის 23 კმ-იანი მონაკვეთი. სწორედ ამ მიმართულებაზე გაქვს დღეს პრობლემები. იცით, რომ ძალიან ხშირად, ზამთრის პერიოდში გუდაურის, მლეთა-გუდაურის და გუდაური-კობის მონაკვეთი ზვავსაშიშროების გამო იკეტება ხოლმე და გუშინაც მაგალითად იყო შეფერხება. რაც გამომდინარეობს ზვავსაშიშროებიდან. ჩვენ ეს მონაკვეთი, რომელსაც ახლა ჩვენ ვაშენებთ აქტიურად და მინდა გითხრათ, რომ ესეც არანაკლებ რთული საინჟინრო პროექტია ვიდრე რიკოთის მონაკვეთი, მოგვცემს იმის საშუალებას, რომ უკვე ზაფხულში გავხსნით გუდაურამდე მისასვლელ გზას, რაც უზრუნველყოფს იმას, რომ ზამთრის პერიოდში აღარ მოხდეს შეფერხება. იმის გარდა, რომ თავისუფლად ჩავალთ და გაცილებით კომფორტულად მოხდება მგზავრობა და უკვე შემდგომში, როცა სრულად დასრულდება ეს მონაკვეთი მინდა გითხრათ, რომ აქ არის 9 კმ-იანი გვირაბი, რომელიც უკვე დასრულებულია და მიმდინარეობს მოპირკეთებითი სამუშაოები - ყველაზე დიდი გვირაბი რეგიონში. და ასევე, არის უნიკალური, ყველაზე მაღალი ხიდი, რომელიც ამ ხეობაში შენდება - ეს არის 166 მეტრი სიმაღლის ხიდი, რომელიც ამ ლანდშაფტში საკმაოდ საინტერესოდ იქნება განთავსებული. და ესეც ერთ-ერთი ყველაზე მნიშვნელოვანი პროექტია, არამხოლოდ ტრანზიტული კუთხით ქვეყნის პოტენციალის გაძლიერების, არამედ ტურისტული კუთხითაც არის ძალიან მნიშვნელოვანი. ჩვენი მოსახლეობა აღმოაჩენს ხადას ხეობას,  ~სადაც მეც ჩემდა სამწუხაროდ აქამდე არ ვყოფილვარ და ახლა სამსახურეობრივი მდგომარეობის გამო მომიწია იქ ჩასვლა და მინდა გითხრათ, რომ ულამაზესი ადგილებია. დარწმუნებული ვარ, რომ ჩვენი ქვეყნის ბევრი მოქალაქე არ არის ამ მხარეში ნამყოფი და ეს გზაც მოგვცემს იმის საშუალებას, რომ ჩვენი კიდევ ერთი ძალიან ლამაზი მხარეს გავეცნოთ და შევისწავლოთ.

მე მინდა მოსახლეობას ბოდიში მოვუხადო ამ შეფერხებებისთვის, რომელიც ზამთრის პერიოდში არსებობს. თუმცა გარკვეულწილად ეს არის ბუნებრივი პირობებიდან გამომდინარე - საავტომობილო გზების დეპარტამენტი 24 საათიან რეჟიმში მუშაობს იმისთვის, რომ რა მომენტშიც საშუალება ეძლევა მას შესაბამისი სამსახურების თანხმობით მოახდინოს ნებისმიერი გზის გაწმენდა საქართველოს მასშტაბით. მუდმივად, ათასობით ადამიანი არის მობილიზებული იმისთვის, რომ გზები რთულ მეტეოროლოგიურ პირობებშიც კი იყოს განვლადი და ამ თვალსაზრისით შეფერხება იყოს მინიმალური“, - აღნიშნა მინისტრმა.