ძალიან პოზიტიური მოლოდინები გვაქვს, რომ ის სიხშირეები, რაც დღეს გვაქვს ზაფხულის სეზონზე გაიზრდება, - აცხადებს რადიო „სივრცის“ ეთერში გადაცემა Business Insider Georgia-ში სტუმრობისას საქართველოს აეროპორტების გაერთიანების ხელმძღვანელი ლევან მოსეშვილი. მისი თქმით, ამ დროისათვის კვირაში სიხშირეების რაოდენობა, საშუალოდ, 551 ფრენას შეადგენს და  ზაფხულის სანავიგაციო სეზონის განმავლობაში არსებული ფრენების პროგრამა 116 ფრენით გაიზრდება. 

„აღსანიშნავია ის ფაქტი, რომ წელს დავიწყეთ კარგი პოზიტიური ინფორმაციით. საქართველოს ბაზარზე 4 ახალი ევროპული ავიაკომპანია შემოვიდა და ახალი მიმართულებები დაგვემატა. გვაქვს იმის მოლოდინი, რომ სიხშირეებიც გაიზრდება. აღსანიშნავია ის ფაქტიც, რომ გუშინ თბილისის საერთაშორისო აეროპორტში  Air Astana-ს ახალი მიმართულება, ატირაუ დაგვემატა. Air Astana უკვე 2 ქალაქს ფარავს. ატირაუ სრულად ახალი მიმართულებაა. რეისი ჩამოფრინდა საკმაოდ დატვირთული. ძალიან მოთხოვნადი არის ტურისტებისთვის საქართველოს ტურისტული მიმართულებები. გვაქვს იმის მოლოდინი, რომ ზაფხულში კიდევ გაზრდიან არსებული ავიაკომპანიები სიხშირეებს. ახლა კვირაში რაც გვაქვს ჯამურად, რომ ავიღოთ 551 ფრენაა კვირაში და მოლოდინიც გვაქვს და უკვე თითქმის დადასტურებული გვაქვს, რომ 116 ფრენით კიდევ გაიზრდება ზაფხულის სანავიგაციო სეზონზე, რაც იმის მაჩვენებელია, რომ უფრო მეტი ტურისტი შემოვა საქართველოში, უფრო მეტი დაინტერესება არის. ჩვენ ჩვენი მხრივ ახალ სერვისებს ვთავაზობთ მგზავრებს, ტურისტებს. ხელს ვუწყობთ ტურიზმის განვითარებას და მაქსიმალურად ისეთ გარემოს ვუქნით მომხმარებელს, რომ სურვილი გაუჩნდეთ საქართველო კიდევ ერთხელ მოინახულონ“, - აცხადებს საქართველოს აეროპორტების გაერთიანების გენერალური დირექტორი.