წელს ვხედავთ, რომ გაყიდვებში არის შენელება, თუმცა ფასში მცირედი ზრდა ფიქსირდება, - ასე აფასებს დეველოპერული ბაზრის ტენდენციებს Galt & Taggart-ის ეკონომისტი ლაშა ქავთარაძე, რომელიც რადიო „სივრცის“ ეთერში გადაცემა Business Insider Georgia-ში სტუმარი იყო. მისივე განმარტებით, ფასების ზრდის ტემპი, რაც გასულ წლებში იყო, 2025 წელს არ იქნება.

„დეველოპმენტის თვალსაზრისით საინტერესო იყო 2022-2023 წლები, როდესაც მაღალი მოთხოვნა იყო და ამ მაღალი მოთხოვნის ფონზე ფასების ზრდის ტემპიც იყო დაჩქარებული. თუმცა ეს მარტო მოთხოვნიდან არ იყო განპირობებული. აქ იყო, მაგალითად სამშენებლო მასალები იყო გაძვირებული, მუშახელი გაძვირდა, ნებართვები მკაცრდება. ყველაფერი ხარჯთან არის დაკავშირებული და შესაბამისად ეს ფასში აისახება. 2024 წელს შენელება იყო ფასების ზრდის ტემპში, თუმცა თბილისში ბინის საშუალო ფასი აშშ დოლარში პირველად ბაზარზე 11.6%-ის ფარგლებში იყო გაზრდილი. თუმცა, თუ 2022-2023 წლებში საშუალოდ თვეში 1.5%-იანი ზრდა იყო, 2024 წელს ზრდა 0.5%-მდე შენელდა. ანუ 2024 წელს ფასები გაიზარდა, ხოლო გაყიდვების ზრდის ტემპი მინიმალური იყო. რეალურად შენელდა გაყიდვები. განსაკუთრებით შენელება დაფიქსირდა, როდესაც საპროტესტო აქციები იყო“, - აცხადებს ქავთარაძე.

მისი თქმით, მაისის საპროტესტო მოვლენების შემდეგ ივნისის გაყიდვებში გამოცოცხლება ფიქსირდებოდა, თუმცა ოქტომბერში ისევ შენელდა და ნოემბერში ისევ გამოცოცხლდა.

„მიმდინარე წელს ჩვენ ვხედავთ, რომ შენელება არის გაყიდვებში, თუმცა ფასში მცირედი ზრდა ფიქსირდება. წლის ჭრილში ჩვენ ვფიქრობთ, რომ ფასების ის ზრდის ტემპი არ იქნება, რაც წინა წლებში იყო. თუმცა ფასების კლება ნაკლებად არის მოსალოდნელი. რაც შეეხება გაყიდვების ნაწილს, გაყიდვების ნაწილი ფაქტობრივად კორექციას განიცდის. თუმცა, ბაზრის ზომა გაზრდილია. მაგალითად, საინტერესო არის 2021 წელს თბილისის ბაზრის ზომა რაც იყო, ის ფაქტობრივად 1 მილიარდი აშშ დოალრით გაიზარდა 2024 წელს. ბათუმში არ იყო ამხელა ზრდა, თუმცა იქაც მნიშვნელოვანი ზრდის ტემპი ფიქსირდებოდა. აქ საინტერესოა კიდევ ნებართვები. ნებართვების პიკური, ძალიან მაღალი ზრდის ტემპი იყო 2022-2023 წლებში. მიმდინარედ, გაცემული ნებართვები შემცირებულია, თუმცა ეს საგანგაშო არ არის, რადგან ეს მაჩვენებელი საკმაოდ მაღალ დონეზე ნარჩუნდება, თუ  2023 წლამდე მაჩვენებლებს შევადარებთ. ამასთან, აღსანიშნავია, რომ იმ პროექტებში, რომელთა დასრულებაც 2025 წლის ბოლომდეა მოსალოდნელი, ბინების 78% უკვე გაყიდულია. ამიტომ აქ მოკლევადიან პერიოდში არანაირი საფრთხე ამას არ გააჩნია. რაც შეეხება გრძელვადიან პერიოდს, აქ ბევრი ფაქტორია როგორც ადგილობრივი, ისე გლობალური ფაქტორი, ასევე როგორი იქნება მოთხოვნა, როგორი იქნება ინტერესი საინვესტიციო მიმართულებითაც“, - აღნიშნა ლაშა ქავთარაძემ.