ბიზნესის დამოკიდებულება მსგავს საკითხებთან მიმართებით ყოველთვის კონსტრუქციულია და მოიცავს კონკრეტულ ინიციატივებს,- ამის შესახებ რადიო „სივრცეში“, გადაცემა Business Insider Georgia-ში სტუმრობისას, საქართველოს კონკურენციისა და მომხმარებლის დაცვის სააგენტოს ხელმძღვანელმა ირაკლი ლექვინაძემ ფასების შემსწავლელეი კომისიის მუშაობისა და მასში ბიზნესის ჩართულობასთან დაკავშირებით განაცხადა.

მისი თქმით, ფასებთან დაკავშირებული ყველა შეხვედრა იყო საქმიანი და ბიზნესის მხრიდან ჟღერდებოდა კონკრეტული ინიციატივები და წინადადებები.

„ყველა შეხვედრა იყო აბსოლუტურად საქმიანი, ბიზნესის მხრიდან კი წარმოდგენილი იყო კონკრეტული ინიციატივები და წინადადებები, სადაც შესაძლებელია შესაბამისი რესურსების მოძიება. საკითხმა კომპლექსური ხასიათი მიიღო და ვფიქრობ, ამ შეხვედრებიდან კომისიამ მნიშვნელოვანი დასკვნები გააკეთა. დარწმუნებული ვარ, ეს პროცესი გაგრძელდება საპარლამენტო ფორმატშიც და საბოლოოდ მიიღებს იმ სახეს, რაც კონსტრუქციული თანამშრომლობის შედეგად სასარგებლო იქნება ყველა მოქალაქისთვის“, - განაცხადა სააგენტოს ხელმძღვანელმა.

ირაკლი ლექვინაძის განცხადებით, კონკურენციისა და მომხმარებლის დაცვის სააგენტო განსაკუთრებულ ყურადღებას უთმობს ბიზნესის განვითარების და მომხმარებლის ინტერესების სწორ ბალანსს.

მისი განმარტებით, მნიშვნელოვანია, რომ მწარმოებლები, დისტრიბუტორები და სხვა სექტორები იქნება ეს ფარმაცია თუ საწვავი, მოქმედებდნენ ისე, რომ მათი გაფართოება მომხმარებლის ხარჯზე არ ხდებოდეს. ამ მიმართულებით კი მხოლოდ მოქმედი კონკურენციის კანონმდებლობა საკმარისი არ არის.

„ყოველთვის ხაზგასმულია სწორი ბალანსის მოძიების მნიშვნელობა, სადაც ყველა მხარე - მწარმოებელი, დისტრიბუტორი, მიმწოდებელი, ფარმაციისა თუ საწვავის სექტორში მოქმედი კომპანია იმოქმედებს მკაფიო ჩარჩოებში, რაც საბოლოოდ მომხმარებელზე პოზიტიურად აისახება.

არ უნდა ხდებოდეს ისე, რომ ბიზნესის ექსპანსიური განვითარება მომხმარებლის ხარჯზე მიმდინარეობდეს. ამას სჭირდება სწორი რეგულირება, რასაც დღეს, სამწუხაროდ, მხოლოდ კონკურენციის კანონმდებლობა ვერ უზრუნველყოფს.

ამ საკითხზე ჯერ კიდევ 2020 წელს ვსაუბრობდით, როდესაც რითეილის ბაზრის პირველი კვლევა ჩავატარეთ და დავინახეთ ძალაუფლების მარდი ტენდენცია ერთ მხარეს. მაშინვე აღვნიშნეთ, რომ საჭიროა შესაბამისი რეგულაციის ჩარჩოს შექმნა.

არსებობა ევროკავშირის დირექტივა, რომელიც 2019 წელს იქნა მიღებული და ბევრ ქვეყანაში, ქვეყნის სპეციფიკის გათვალისწინებით მიღებული. ის უზრუნველყოფს სამართლიანი ვაჭრობის პირობებს,“– აღნიშნა ირაკლი ლექვინაძემ.