საერთაშორისო გადამზიდავი კომპანია GBN • ჯიბიენი პირველი კომპანიაა, რომელმაც ჩინეთში ქართული ნაყინის ტრანსპორტირება განახორციელა.

როგორც Business Insider Georgia-სთან კომპანიის დამფუძნებელმა თამარ ჯიოშვილმა განაცხადა, მათ პარტნიორობა ჰქონდათ ნაყინის მწარმოებელ ქართულ ბრენდთან - „გურჯანის ნაყინთან“, რომელიც მაღალხარისხიანი და საერთაშორისო სტანდარტების პროდუქციით გამოირჩევა. 

„ეს ნამდვილად იყო პირველი და ძალიან ღირებული გამოცდილება – პროდუქტს სჭირდება მუდმივად განსაზღვრული ტემპერატურა მთელ გზაზე, ასევე დოკუმენტაციის მოწესრიგება ძალიან დეტალურია. საჭირო გახდა ინდივიდუალური ლოგისტიკური გადაწყვეტილებების შემუშავება“, - განმარტავს GBN-ის დამფუძნებელი.

ნაყინის ჩინეთში გადაზიდვას მულტიმოდალური ტრანსპორტირების მეთოდის გამოყენებით, დაახლოებით 20 დღე დასჭირდა.

„პროდუქტი მთელი გზა ინახებოდა -20°C ტემპერატურაზე სპეციალურად აღჭურვილ კონტეინერებში, რაც უზრუნველყოფს მისი თვისებების შენარჩუნებას“, - აცხადებს საერთაშორისო გადამზიდავი კომპანიის დამფუძნებელი თამარ ჯიოშვილი.

აღსანიშნავია, რომ კომპანია GBN მალფუჭებადი პროდუქციის, მათ შორის ხილის ტრანსპორტირებაში საკმაოდ სანდო პარტნიორია. GBN ასეთი ტიპის პროდუქციის საერთაშორისო გადაზიდვებს მაცივარ კონტეინერებით, სრული ტემპერატურული კონტროლითა და უსაფრთხოების უმაღლესი სტანდარტების დაცვით, ახორციელებს. 

„დღეს GBN-ის პორტფელში შედის ხორცპროდუქტები, რძის ნაწარმი, ნატურალური წვენები და სხვა, რომლებიც მიემართება როგორც აზიის, ისე ევროპის სხვადასხვა ქვეყნებში. მათ შორის – ჩინეთი, კორეა, არაბეთის გაერთიანებული საამიროები და ბალტიისპირეთი“, - აცხადებენ კომპანიაში.

საგულისხმოა, რომ GBN-ის გუნდი მალფუჭებადი პროდუქციის ლოგისტიკაში სპეციფიკურ ცოდნას ფლობს.

„ჩვენი მთავარი უპირატესობა ის არის, რომ ვმუშაობთ როგორც სტანდარტულ, ისე ინდივიდუალურად მორგებულ გადაწყვეტილებებზე. ჩვენი გუნდი ფლობს სპეციფიკურ ცოდნას მალფუჭებადი პროდუქციის ლოგისტიკაში, რაც გვაძლევს საშუალებას ვიყოთ მაქსიმალურად ეფექტურები ნებისმიერ ბაზარზე. ჩვენთვის გადაზიდვა მხოლოდ ტრანსპორტირება არაა – ეს არის სერვისი და პასუხისმგებლობა“, - აცხადებს  GBN-ის დამფუძნებელი.