„დღეისათვის ჩვენი დადგმული სიმძლავრე 4600 მეგავატს შეადგენს. საქართველოს ხელისუფლებას აქვს ამბიცია, რომ ეს მაჩვენებელი გააორმაგოს“, - განაცხადა ტელეკომპანია „მაესტროს“ ეთერში გადაცემა Business Insider Georgia-ში სტუმრობისას GREDA-ს აღმასრულებელმა დირექტორმა მაია მელიქიძემ. მისი თქმით, ამ მიზნის მისაღწევად, 2025 წელს ორი მნიშვნელოვანი ნაბიჯი გადაიდგა.

„პირველი, 1  მილიარდი ლარის ჩამოწერა. გამოცემულია სპეციალური განკარგულება - ამ უკანასკნელის თანახმად, ინვესტორებს აქვთ შესაძლებლობა, 2026 წლის 16 მარტის სამუშაო დღის ბოლომდე განაცხადით მიმართონ ეკონომიკისა და მდგრადი განვითარების სამინისტროს, რათა მოხდეს გადახალისება იმ პროექტებისა რომლებსაც აქვთ შესაძლებლობა რომ რეალურად იყოს აშენებული და თუკი რომელიმე პროექტი ვერ აშენდება ინვესტორის გადმოსახედიდან - და ასეთი არსებობს - მაშინ ჩვენ უნდა გავაკეთოთ ის რომ კვალიფიციურ ინვესტორებს მივცეთ შესაძლებლობა იმისა, რომ შემოვიდნენ ბაზარზე. 

ხაზგასმით ვამბობ კვალიფიციურ ინვესტორებს იმიტომ, რომ ბევრი სპეკულაცია ვნახეთ ჩვენ ბაზარზე და უკვე ეს სპეკულაცია უნდა ჩაიკეტოს ფილტრების შემოღებით, დამატებითი ფილტრების შემოღებით იმისათვის, რომ ჩვენ გამოვავლინოთ რეალური ინვესტორი. ეს ერთი ინსტრუმენტი. მეორე ინსტრუმენტი ამასთანავე მოხდა ის, რომ პროექტების გარკვეულ ნაწილს ადმინისტრაციული წარმოება შეუჩერდათ რამდენიმე თვის წინ. ეს იყო გამოწვეული სწორედ იმით, რომ დარეზერვებული იყო ამა თუ იმ რაიონსა თუ რეგიონში სიმძლავრეები და ახალი ინვესტორი ვეღარ შემოდიოდა“, - აღნიშნა​GREDA-ს აღმასრულებელმა დირექტორმა.

მაია მელიქიძის განმარტებით, საქართველოს ენერგეტიკული სექტორი, რომელიც წლების განმავლობაში სტაგნაციას განიცდიდა, ახლა მასობრივი რეფორმის გზაზე დგას

„ახლა ამ პრობლემების გადაჭრა ხდება და ეს გადაჭრა მტკივნეულია ცალსახად ისევე როგორც ნებისმიერი ოპერაცია, მაგრამ ამის გარეშე წარმოუდგენელია სრული გაჯანსაღება იმ სექტორისა რომელიც სტრატეგიულად ნომერ პირველ ადგილზე არის. მე არ ვაკნინებ არცერთ სექტორს, მაგრამ დღეს ენერგეტიკა არის ნომერ პირველ ადგილზე, ვინაიდან ამაზე არის დაფუძნებული მთელი დანარჩენი ეკონომიკური სექტორები. ეს სექტორი წლების განმავლობაში იყო გაჩერებული და სტაგნაციას განიცდიდა და ხდებოდა ხვალ, ზეგ, მაზეგ, ერთი წლის მერე პრობლემების მოგვარების გადატანა.

დღეს აშკარად ვხედავთ რომ ასე აღარ არის და რეალურად ინვესტორებს პირდაპირ ეკითხება სახელმწიფო რომ „შვიდი პროექტი, რომ გაქვს ამ შვიდი პროექტიდან რამდენის აშენების საშუალება გაქვს შენ“. იმიტომ რომ გამოჩნდნენ ისეთი ინვესტორები, რომლებიც ამბობენ რომ შვიდიდან ხუთს ავაშენებ, დანარჩენი ორის მიმართ ინტერესი გამიქრა გარკვეული მიზეზების გამო, დეტალებში რომ აღარ შევიდეთ“, - აცხადებს მაია მელიქიძე.

მისივე თქმით, საქართველოს ენერგეტიკაში ინვესტიციების პერსპექტივები ფართოვდება – მთავრობა საერთაშორისო ფინანსურ ინსტიტუტებთან თანამშრომლობს.

„26 თებერვალს, სულ რამდენიმე დღეში გვაქვს შიდა ე.წ. შეკრება და საერთაშორისო საფინანსო ინსტიტუტებიც გვესტუმრებიან - EBRD, ADB, IFC, World Bank. შესაბამისად, ჩვენ მოვახდენთ უკვე ფინანსებზე ხელმისაწვდომობის განხილვას. მაგრამ მე აქვე დავაანონსებ რა პრობლემა გველოდება მომავალში - ეს იქნება გადამცემ ქსელთან დაკავშირებული სირთულეები. ასე რომ გენერაციის პრობლემას მოვაგვარებთ რა ამის პარალელურად უნდა ვიმუშაოთ გადამცემი ქსელების ინფრასტრუქტურის გაუმჯობესებაზე წინააღმდეგ შემთხვევაში ჩვენ გვექნება გენერაციის ობიექტები და ვერ გამოვიტანთ იქიდან ელექტროენერგიას“, - აღნიშნა GREDA-ს აღმასრულებელმა დირექტორმა.