ტექნოლოგიების განვითარებიდან გამომდინარე, მზის და ქარის სადგურების მშენებლობის ღირებულება დროთა განმავლობაში იკლებს, - აცხადებს Galt & Taggart-ის სექტორის უფროსი მარიამ ჩახვაშვილი, რომელმაც 20 ივნისს Galt & Taggart-ის ახალი კვლევის პრეზენტაცია წარმოადგინა.

Galt & Taggart-მა ელექტროენერგიის სექტორის კონფერენცია გამართა, რომელიც დარგის წამყვანი კომპანიებისა და მარეგულირებელი სტრუქტურების ჩართულობით წარიმართა და 400 მონაწილეს უმასპინძლა. ღონისძიების ფარგლებში  Galt & Taggart-მა წარმოადგინა ახალი კვლევა, რომელიც მიმოიხილავს ელექტროენერგიის გენერაციის, მოხმარებისა და ფასების ტენდენციებს, ექსპორტის შესაძლებლობებს და ყველა იმ ძირითად საკითხს, რაც სექტორში ინვესტირებისას გათვალისწინებული უნდა იყოს.

„ჩვენ დეტალურად გავაანალიზეთ მშენებლობის ღირებულება და კვლევა დეველოპორების გამოკითხვის საფუძველზე შევადგინეთ. ძირითადად, ქარისა და მზის სადგურების მთავარი კომპონენტი არის ელექტრო მექანიკური მოწყობილობები და ამის გამო მისი მშენებლობის ვადა არის შედარებით მოკლე და გადახარჯვის ალბათობა გვაქვს ნაკლები, ხოლო ჰიდროსადგურების  მშენებლობის ღირებულება ბევრი კომპონენტისგან შედგება. გვაქვს მაღალი წილი ადამიანური რესურსის, რის გამოც ეს პროექტი შედარებით დროში იწელება და გადახარჯვის ალბათობაც მაღალი არის. ტექნოლოგიების განვითარებიდან გამომდინარე, მზისა და ქარის სადგურების მშენებლობის ღირებულება იკლებს, ხოლო ჰიდროსადგურების შემთხვევაში დიდი არის წილი სამშენებლო მასალების, რომლის ფასიც ბოლო წლების განმავლობაში გაზრდილი არის და შესაბამისად მომატებული არის ჰიდროსადგურების მშენებლობის პირობები“, - აცხადებს მარიამ ჩახვაშვილი.

მისივე განმარტებით, Galt & Taggart-ის კვლევის ერთ-ერთი მიგნება არის სწორედ ის, რომ რეზერვუარების მქონე ჰიდროებისთვის დადგენილი ტარიფი არ არის საკმარისი და გადახედვას საჭიროებს.

„დანარჩენ შემთხვევებში ცოტა დაბალი არის ჰიდროსადგურების  უკუგება და კარგი იქნებოდა წახალისების მექანიზმის გაზრდა. ქარისა და მზის სადგურებისთვის სავსებით საკმარისია და ეს კარგად ჩანს სამინისტროში შესული განაცხადების რაოდენობაში. დღეის მდგომარეობით, 8.8 გეგავატის განაცხადები არის შესული და აქედან უმეტესობა, 90% არის ქარის და მზის სადგურები“, - განმარტავს მარიამ ჩახვაშვილი.

ღონისძიებაზე ასევე წარმოდგენილი იყო თემატური პრეზენტაციები ქსელის განვითარებასა და შავი ზღვის გადამცემი ხაზის პროექტზე, რომელზეც საქართველოს სახელმწიფო ელექტროსისტემის დირექტორთა საბჭოს წევრებმა ისაუბრეს, ხოლო ბაზრის რეფორმის მიმდინარეობაზე ეკონომიკისა და მდგრადი განვითარების სამინისტროს წარმომადგენელმა ისაუბრა.

კონფერენციის ფარგლებში გაიმართა პანელური დისკუსია სექტორის აქტუალურ საკითხებზე, გამოწვევებსა და პერსპექტივებზე. ამ დისკუსიაში მონაწილეობდნენ პირველი ვიცე-პრემიერი - ეკონომიკისა და მდგარი განვითარების მინისტრი, სემეკ-ის თავმჯდომარე, საქართველო-ურბან ენერჯის გენერალური დირექტორი და საქართველოს ბანკის გენერალური დირექტორი.