Galt & Taggart-ის ეკონომისტი ლაშა ქავთარაძე ტელეკომპანია „მასეტროს“ ეთერში გადაცემა Business Insider Georgia-ში სტუმრობისას აცხადებს, სოფლის მეურნეობის განვითარების ინდექსი ეფექტიანი პოლიტიკის დაგეგმვასა და მონიტორინგს ამარტივებს, რადგან ცხრა ძირითადი ინდიკატორის მიხედვით შესაძლებელი ხდება პროგრესის, გამოწვევებისა და როგორც სახელმწიფო, ისე ბიზნესის როლის შეფასება.

მისი თქმით, ინდექსი უზრუნველყოფს მონაცემებზე დაფუძნებულ გადაწყვეტილებებს და სექტორის შედარებას როგორც დროში, ისე საერთაშორისო ჭრილში.

„ინდექსი იძლევა შესაძლებლობას კარგი მონიტორინგი გავაკეთოთ. პირდაპირ შევხედოთ კომპონენტებს, რომელ კომპონენტებში გვაქვს პროგრესი. ეს პროგრესი დამაკმაყოფილებელია თუ არ არის დამაკმაყოფილებელი. უფრო მეტად არის სახელმწიფოს როლის გაზრდა თუ ბიზნესის მიმართულებით უფრო მეტი აქტივობა არის საჭირო იმისათვის, რომ პროდუქტიულობა კიდევ უფრო გაიზარდოს და მერე შევადაროთ სხვა ქვეყნებს - მაგალითად ერთწლიანი კულტურების მოსავლიანობის გაუმჯობესება ჩვენთან რამდენად უფრო სწრაფად ხდება, ვიდრე სხვა ქვეყნებში. ამ კუთხით არის ასე ვთქვათ გამოყენებადი ეს ინდექსი. ასევე შევხედოთ მაგალითად შუალედური დანახარჯები, რომლითაც უნდა იწარმოო ეს პროდუქცია - როგორ არის საერთაშორისო ბაზრებზე ფასები. არის თუ არა მიმართულებები, სადაც შეიძლება უფრო ეფექტურად იყოს გამოყენებული ნაკლები ამ დანახარჯებით მივიღოთ უფრო მაქსიმალური სარგებელი მოსავლიანობის კუთხით, წარმადობის კუთხით და ასე შემდეგ. ამ თითოეულ ინდიკატორს შეიძლება დავაკვირდეთ. დავაკვირდეთ მაგალითად სახელმწიფო პროგრამების მიმდინარეობას. ეს პროგრამები  შენელდა, რატომ შენელდა? გაჯერდა ეს მიმართულება თუ მაგალითად სხვა პრობლემები არის. ამისი ანუ იდენტიფიცირება უკვე ამ ინდექსიდან გამომდინარე შეგვიძლია მარტივად გავაკეთოთ და ამიტომაც არის, რომ ინდექსი თვითონ შინაარსობრივად ძალიან მარტივი არის - ცხრა ძირითადი ინდიკატორი არის. სიმარტივე არის, შეუძლიათ პოლიტიკის გამტარებლებს, ასევე კერძო ბიზნესის წარმომადგენლებს თითოეული ინდიკატორის მიხედვით გარკვეული შეფასებები და გადაწყვეტილებები მიიღონ. და მოგეხსენებათ დროული და მაღალხარისხიანი მონაცემები რაოდენ მნიშვნელოვანი არის ზოგადად არა მარტო ამ დარგის წარმომადგენლებისთვის, არამედ სხვა სფეროებისთვის. ამიტომაც ვისურვებდით, რომ კიდევ უფრო გაუმჯობესდეს მონაცემები და დაიხვეწოს და შესაბამისად ჩვენ ამას ავსახავთ ინდექსში. ასევე არ გამოვრიცხავთ, რომ მეთოდოლოგიის გაუმჯობესებაც ვიხილოთ, უფრო მეტი ინდიკატორები მოვიცვათ - ეს ყველაფერი გამომდინარეობს თუ რა ტიპის მონაცემებზე გვექნება ხელმისაწვდომობა“, - აღნიშნა ლაშა ქავთარაძემ.