შპს „ფიდელის ველს მენეჯმენტს“ საბროკერო საქმიანობის ლიცენზია გაუუქმდა

ეკონომიკა

მარიამ ქვრივიშვილმა აზერბაიჯანის ეკონომიკის მინისტრ მიქაელ ჯაბაროვთან ორმხრივი ეკონომიკური ურთიერობები განიხილა

11.07.2025.16:20

ეკონომიკისა და მდგრადი განვითარების მინისტრმა მარიამ ქვრივიშვილმა, რომელიც აზერბაიჯანის რესპუბლიკაში ოფიციალური ვიზიტით იმყოფება, აზერბაიჯანის ეკონომიკის მინისტრ მიქაელ ჯაბაროვთან შეხვედრა გამართა.

შეხვედრაზე აზერბაიჯანის ეკონომიკის მინისტრმა მარიამ ქვრივიშვილს მიულოცა საქართველოს ეკონომიკისა და მდგრადი განვითარების მინისტრად დანიშვნა, წარმატება უსურვა საქმიანობაში და იმედი გამოთქვა, რომ ეს იქნება ახალი წარმატებული თანამშრომლობის გაგრძელება.

შეხვედრაზე მხარეებმა განიხილეს ორმხრივი სავაჭრო-ეკონომიკური ურთიერთობების პრიორიტეტული მიმართულებები, აგრეთვე თანამშრომლობის პერსპექტივები რეგიონული მნიშვნელობის ინფრასტრუქტურულ პროექტებში.

ხაზი გაესვა იმ პოზიტიურ დინამიკას, რომელიც ორ ქვეყანას შორის ორმხრივ ვაჭრობაში არსებობს. აღინიშნა, რომ აზერბაიჯანი საქართველოს ერთ-ერთი უმსხვილესი სავაჭრო პარტნიორია - 2025 წლის იანვარი - მაისის მონაცემებით, აზერბაიჯანში საქართველოს ექსპორტი 12 პროცენტით გაიზარდა. ამის მიუხედავად აღინიშნა, რომ საქართველოს აქვს ექსპორტის გაზრდის პოტენციალი აზერბაიჯანის ბაზარზე.

შეხვედრაზე ასევე ხაზი გაესვა თანამშრომლობის გაღრმავების მნიშვნელობას ისეთ სექტორებში, როგორიცაა ინვესტიციები, ტრანსპორტი და ლოგისტიკა, ტურიზმი, სამოქალაქო ავიაცია, სოფლის მეურნეობა, კავშირგაბმულობა და სხვ.

განსაკუთრებული ყურადღება გამახვილდა რეგიონული პროექტების განხორციელების ხელშეწყობაზე.

მხარეებმა ასევე განიხილეს თანამშრომლობის გაღრმავება ტურიზმის სექტორში. აღინიშნა, რომ საქართველოსთვის აზერბაიჯანი ერთ-ერთი ყველაზე მზარდი ტურისტული ბაზარია და 2024 წლისა და 2025 წლის ორი კვარტლის მონაცემებით, მეხუთეა იმ ქვეყნებს შორის, საიდანაც ყველაზე მეტი საერთაშორისო ვიზიტორი შემოდის საქართველოში. შეხვედრაზე ასევე ყურადღება გამახვილდა სამოქალაქო ავიაციის მიმართულებით ურთიერთობების განვითარებასა და სიხშირეებისა და მიმართულებების დამატების შესაძლებლობაზე.

შეხვედრაზე მარიამ ქვრივიშვილმა აზერბაიჯანელი კოლეგა თბილისის აბრეშუმის გზის ფორუმზე მოიწვია, რომელიც მიმდინარე წელს მეხუთედ ჩატარდება.

შეხვედრას დაესწრნენ ეკონომიკისა და მდგრადი განვითარების მინისტრის მოადგილეები გენადი არველაძე და გურამ გურამიშვილი, აგრეთვე საქართველოს ელჩი აზერბაიჯანის რესპუბლიკაში ზურაბ პატარაძე.

როდის ამოქმედდება „შინაურ ბინადარ ცხოველთა შესახებ“ კანონი და რა იცვლება - ექსკლუზიური ინტერვიუ მაია ბითაძესთან 11.07.2025.16:01

„მაღალმთიან დასახლებებში სამეწარმეო საქმიანობის ხელშეწყობის პროგრამაში“ განაცხადების მიღება განახლდება 11.07.2025.15:14