„დაგროვებითი პენსიის შესახებ“ კანონში განხორციელებულ ცვლილებებთან დაკავშირებით უწყებათაშორისი შეხვედრა საქართველოს ბიზნეს ასოციაციაში (BAG) გაიმართა. უწყებათაშორის შეხვედრის ფარგლებში საქართველოს საპენსიო ფონდის და ფინანსთა სამინისტროს შემოსავლების სამსახურის წარმომადგენლები BAG-ის წევრებს შეხვდნენ.

აღნიშნულ შეხვედრას, BAG-ის წევრებთან ერთად, ესწრებოდნენ საქართველოს საპენსიო ფონდის მმართველობითი საბჭოს თავმჯდომარე გრიგორი (გია) მორჩილაძე და საქართველოს საპენსიო ფონდის გენერალური დირექტორის მოვალეობის შემსრულებელი გიორგი ჭიჭინაძე, რომელმაც „დაგროვებითი პენსიის შესახებ“ კანონში განხორციელებულ ცვლილებებთან დაკავშირებით ვრცელი პრეზენტაცია წარუდგინა დამსწრეებს.

შეხვედრა დიალოგის რეჟიმში წარიმართა. მასში, საქართველოს საპენსიო ფონდის ხელმძღვანელობასთან ერთად, აქტიურ მონაწილეობას იღებდნენ: შემოსავლების სამსახურის უფროსის მოადგილე ლევან წითელაშვილი, მეთოდოლოგიის დეპარტამენტის ხელმძღვანელი ლევან დგებუაძე, BAG-ის აღმასრულებელი დირექტორი ლევან ვეფხვაძე და წევრი კომპანიების ხელმძღვანელები.

BAG-ში გამართულ შეხვედრაზე ბიზნეს სექტორის წარმომადგენლებს შესაძლებლობა მიეცათ უწყებებისგან მათთვის საინტერესო კითხვებზე ამომწურავი პასუხები მიეღოთ. მხარეებმა, გაფართოებული შეხვედრის ფარგლებში, გაცვალეს გამოცდილება და დეტალურად განიხილეს მნიშვნელოვანი საკითხები: ჯარიმა, საურავი, დეკლარირება და კორექტირება.

მსგავსი შეხვედრები საქართველოს ბიზნესმენთა ასოციაციის მხარდაჭერით, საპენსიო თემებზე, პერმანენტულად ტარდება და BAG-ის დახმარებით, დაგროვებითი საპენსიო სქემის შესახებ, ინფორმაციის ხელმისაწვდომობა ბიზნეს სექტორში პროაქტიულად ხორციელდება.