საქართველოს ეკონომიკისა და მდგრადი განვითარების მინისტრის მოადგილემ ინგა ფხალაძემ ეკონომიკური ფორუმის 25-ე დისკუსია გახსნა. დისკუსიის თემა „საქართველოს ენერგეტიკული პოლიტიკა 2025 - შეჯამება და მოლოდინები“ იყო.

პანელურ დისკუსიაში მონაწილეობდა პარლამენტის ეკონომიკური პოლიტიკის კომიტეტის თავმჯდომარე შოთა ბერეკაშვილი,  სემეკის თავმჯდომარე დავით ნარმანია, საქართველოს ბანკის გენერალური დირექტორი არჩილ გაჩეჩილაძე. ღონისძიებას მოდერაციას უწევდა ბიზნეს ინსაიდერი საქართველოს და საქართველოს ეკონომიკური ფორუმის დამფუძნებელი და ხელმძღვანელი გიორგი აბაშიშილი.

„საქართველო დიდ პოტენციალს ფლობს განახლებადი ენერგიის მიმართულებით - ჰიდრორესურსები, ქარისა და მზის ენერგია წარმოადგენს შესაძლებლობას, რომელიც გონივრულად უნდა იქნეს ათვისებული. აუცილებელია სახელმწიფოს მხრიდან შესაბამისი ინფრასტრუქტურის განვითარება და მიმზიდველი საინვესტიციო გარემოს უზრუნველყოფა. ასევე უმნიშვნელოვანესია ტრანსსასაზღვრო ინფრასტრუქტურისა და ენერგეტიკული ბაზრების კოორდინირებული განვითარება. ამ პროცესში, საქართველო, როგორც სტრატეგიული სატრანზიტო ქვეყანა, მნიშვნელოვან როლს ითამაშებს სამხრეთ კავკასიისა და შავი ზღვის რეგიონების ენერგეტიკული ინტეგრაციის გაღრმავებაში“, - განაცხადა საქართველოს ეკონომიკისა და მდგრადი განვითარების მინისტრის მოადგილემ ინგა ფხალაძემ.

„შევაჯამეთ 2025 წელი, მთავარი ენერგეტიკული მოვლენები, ის სიახლეები, რომლებიც გვაქვს ენერგეტიკის სექტორში. მნიშვნელოვანია ის, რომ ენერგეტიკის სექტორში მარეგულირებელმა კომისიამ უპრეცედენტოდ მაღალი ოდენობის ინვესტიციები შეითანხმა - ჯამში, მომდევნო 5 წლის განმავლობაში, 2 მილიარდ ლარამდე ინვესტიცია განხორციელდება ელექტროენერგეტიკის სექტორში. 300 მლნ ლარზე მეტი განხორციელდება ბუნებრივი გაზის სექტორში და ეს ყველაფერი მოემსახურება იმას, რომ კიდევ უფრო უწყვეტად, კიდევ უფრო ხარისხიანად მიეწოდოს ენერგია ჩვენს თანამოქალაქეებს, კომერციულ სექტორს. გარდა ამისა, ეს საინვესტიციო პროექტები და ინვესტიციის მოცულობა შეფასებულია და შერჩეულია ისეთნაირად, რომ ამან ტარიფებზე არსებითი გავლენა არ მოახდინოს და ჩვენი მარეგულირებელი კომისიის ერთ-ერთი მთავარი ფუნქცია, რაც არის სწორი ბალანსის დაცვა მომხმარებლებსა და მიმწოდებლებს შორის, უზრუნველყოფილი იყოს. ერთის მხრივ, უნდა გაუმჯობესდეს მდგომარეობა სექტორში, მეორეს მხრივ, ეს ყველაფერი არ უნდა დააწვეს ზედმეტ ტვირთად მომხმარებლებს და სექტორი უნდა გაჯანსაღდეს, რაც ყველაზე მთავარი და მნიშვნელოვანია“, - აღნიშნა სემეკის თავმჯდომარემ დავით ნარმანიამ.

„ენერგეტიკულ სექტორს აქვს უნიკალური შანსი, რომ შემდეგი რამდენიმე წლის განმავლობაში მიიღოს უზარმაზარი ინვესტიციები, მაგრამ ამისთვის უმნიშვნელოვანესია, რომ თამაშის წესები სწორად იყოს გაგებული და გასაგები ყველა ინვესტორისთვის. კერძოდ, რა იგულისხმება - ზედმეტობები ზაფხულისა და ზამთრის განმავლობაში, როგორ დაბალანსდება იმპორტ-ექსპორტის ნაწილი. უმნიშვნელოვანესი ამ კუთხით არის წყალქვეშა კაბელი და ორმხრივი ინტერესის აღიარება ევროკავშირსა და საქართველოს შორის, რაც უდიდესი დადებითი იმპულსი იყო.

აქვე უნდა აღინიშნოს, რომ ჯარიმების პატიება, რომელიც განხორციელდა, უმნიშვნელოვანესია, ვინაიდან ეს საშუალებას აძლევს კერძო ინვესტორებს, რომ უკეთ გათვალონ რისკები და განახორციელონ მომავალი ინვესტიციები

ამ კუთხით ძალიან მნიშვნელოვანი არის დაგროვითი ჰესები და ქარის ენერგია, ვინაიდან ამ ტიპის ენერგიები საშუალებას გვაძლევს, რომ დავაბალანსოთ ზამთრის დეფიციტი, რაც საქართველოს ენერგეტიკული სექტორის მთავარი გამოწვევაა“, - აღნიშნა საქართველოს ბანკის გენერალურმა დირექტორმა არჩილ გაჩეჩილაძემ.

„ენერგეტიკის სექტორი საქართველოსთვის სტრატეგიული მნიშვნელობისაა. ჩვენ ვიმყოფებით ისეთ რეალობაში, როდესაც ქვეყნები, რომლებიც ხელმისაწვდომ ენერგორესურსებს ფლობენ და ენერგოდამოუკიდებლები არიან, კონკურენტული უპირატესობით სარგებლობენ. ამ კონტექსტში განსაკუთრებით საინტერესოა როგორც საქართველო, ისე მთლიანად კავკასიის რეგიონი, რომელსაც რეალური შესაძლებლობა აქვს, ჩამოყალიბდეს ხელმისაწვდომი ენერგიის ერთ-ერთ წამყვან ცენტრად და მნიშვნელოვანი საექსპორტო პოტენციალი შეიძინოს. ამ მხრივ, განსაკუთრებით აღსანიშნავია ევროკავშირის ბაზარი. შავი ზღვის წყალქვეშა კაბელის პროექტი კიდევ უფრო გაამყარებს საქართველოს პოზიციას, რადგან დივერსიფიცირებული საექსპორტო არხები შიდა გენერაციის ზრდისთვის ქმნის პირობებს და ენერგეტიკით ვაჭრობის კონკურენტუნარიან შესაძლებლობებს“, - აღნიშნა პარლამენტის ეკონომიკური პოლიტიკის კომიტეტის თავმჯდომარემ შოთა ბერეკაშვილმა.

„მას შემდეგ, რაც სახელმწიფოს მხრიდან დაანონსდა ერთი მილიარდი ლარის უპრეცედენტო პატიება, ჩამოწერა იმ დაგროვებული ვალდებულებებისა და პირგასამტეხლოს ენერგოსექტორში მოღვაწე კომპანიებისთვის, ეს იყო უმაღლესი დონის პირველი დიალოგი, სადაც ეკონომიკისა და მდგრადი განვითარების მინისტრის მოადგილემ, სემეკის თავმჯდომარესთან და პარლამენტის ეკონომიკური პოლიტიკის თავმჯდომარესთან ერთად, ბიზნესსექტორს ძალიან დეტალურად გააცნო ჯამური ხედვა შემდგომი წლების ენერგეტიკული პოლიტიკისა და იმ რეფორმების შესახებ, რომლებიც სექტორში უნდა განხორციელდეს.

დისკუსიაზე ასევე მთავარი სპიკერი ბიზნესსექტორის მხრიდან იყო საქართველოს ბანკის გენერალური დირექტორი, რომელმაც ასევე მიმოიხილა სექტორი - რა, სად და როგორი გამოწვევებია ინვესტიციებისთვის უფრო მეტად მიმზიდველი გარემოს შესაქმნელად.

ჯამში ჩვენ ვხედავთ, რომ როგორც სახელმწიფო, ისე სექტორში მოქმედი კომპანიები საერთო ხედვაზე სრულად თანხმდებიან და ვხედავთ ძალიან კოორდინირებულ მუშაობას იმისათვის, რომ სახელმწიფოს მთავარი მიზანი - ენერგოსექტორი გაძლიერდეს, რათა უზრუნველყოფილ იქნას, ერთის მხრივ, თვითკმარობა, მეორეს მხრივ კი ენერგოდამოუკიდებლობა და, რაც კიდევ უფრო მთავარია, საექსპორტო პოტენციალის ზრდა. აქ ხედვა საერთოა“, - განმარტა ეკონომიკური ფორუმისა და Business Insider Georgia-ს დამფუძნებელმა გიორგი აბაშიშვილმა.
 
 „ეკონომიკური ფორუმის“ ფარგლებში მიმდინარე დისკუსიების მთავარი მიზანია სახელმწიფო, ანალიტიკური და ბიზნეს სექტორის მხრიდან გაანალიზებული იყოს საქართველოს წინაშე მდგარი აქტუალური გამოწვევები ეკონომიკური პოლიტიკის, განათლებისა და ევროინტეგრაციის მიმართულებით. მნიშვნელოვანია, რომ მიმდინარე დისკუსიების მთავარი საერთაშორისო პარტნიორია ცენტრალური და აღმოსავლეთ ევროპის უმსხვილესი ეკონომიკური ფორუმის ორგანიზატორი Foundation Institute for Eastern Studies. აღნიშნული ორგანიზაციის მიერ დაფუძნებული „ეკონომიკური ფორუმი“ პოლონეთში შეხვედრების ყველაზე დიდი პლატფორმაა ეკონომიკური განვითარების პერსპექტივებზე, თანამედროვე გამოწვევებსა და კრიზისების დაძლევაზე სასაუბროდ. ამასთანავე, ფორუმი წარმოადგენს კონკრეტული გადაწყვეტილებებისა და ინოვაციური იდეების სივრცეს. ავტორიტეტული საერთაშორისო გამოცემების მიერ პოლონეთის „ეკონომიკური ფორუმი“ ხშირად დასახელებულია, როგორც „პოლონური დავოსი“. მიმდინარე წელს პარტნიორობის ფარგლებში ასევე იგეგმება ერთობლივი დისკუსიების ორგანიზება საქართველოსა და პოლონეთში.