საქართველოს ელექტრონული კომერციის ბაზარი ზრდას განაგრძობს. 2025 წლის 9 თვეში ბაზარი წლიურად 35%-ით გაიზარდა და 7.62 მილიარდ ლარს მიაღწია. აღნიშნულის შესახებ თიბისი კაპიტალის პუბლიკაციაშია აღნიშნული. 

2024 წელს ელექტრონული კომერციის ბაზრის 38%, 3 მილიარდი ლარი, ადგილობრივ მოვაჭრეებზე მოდის. ადგილობრივი სექტორი 2025 წელსაც განაგრძობს ზრდას და 9 თვეში 3.1 მილიარდ ლარს აღწევს.

საგრძნობი ზრდა ფიქსირდება საქართველოდან საერთაშორისო ელ-კომერციის ბაზარზე დანახარჯებში, რომელიც 2025 წლის 9 თვეში 4.5 მილიარდ ლარს გაუტოლდა, თუმცა, ზრდის ტემპი ადგილობრივი ბაზრის მაჩვენებელს ჩამორჩება.

საქართველოს ელექტრონული კომერციის ბაზრის ზრდა ამანათების რაოდენობაშიც აისახა. მონაცემები გვაჩვენებს, რომ ქართული წარმოშობის ამანათების წილი ჯამურ ამანათებში 2020 წელთან შედარებით 13 პროცენტული პუნქტითაა გაზრდილი.

ელექტრონული კომერციის საერთაშორისო ბაზარზე განხორციელებული ტრანზაქციების საშუალო ზომა დაახლოებით 3-ჯერ აღემატება საქართველოს ადგილობრივი ბაზრის შესაბამის მაჩვენებელს.

ელექტრონული კომერციის ბაზარზე საქონლისა და მომსახურების წილი, შესაბამისად, 40% და 60%-ია. საქონელი მეტწილად ელექტრონიკის კატეგორიაზე მოდის, ხოლო სერვისებში ტრანსპორტი და მოგზაურობა ლიდერობს. უკანასკნელი, ზოგადად, საკმაოდ გაციფრულებული სეგმენტია და უნაღდო ტრანზაქციების დაახლოებით 90%-ს ელ-კომერციის არხებით იფარება.

ქართული ელექტრონული კომერციის ბაზრის განვითარება მნიშვნელოვანი პოტენციალის მქონეა - კომპანიების მხოლოდ 5% იყენებს ელექტრონული კომერციის არხებს საკუთარი საქონლისა და მომსახურების გასაყიდად. მეორე მხრივ, მაღალია ინტერნეტთან წვდომის მაჩვენებელი (შინამეურნეობების 92%) და, ასევე, ნომინალური ხელფასების ზრდა კვლავ ინფლაციაზე მაღალია.