რუსთავი ბოლო წლებში ახალი ბიზნესებისთვის უფრო მიმზიდველი ხდება და ქალაქში ინვესტიციების მოცულობა მნიშვნელოვნად გაიზარდა. როგორც ტელეკომპანია „მაესტროს“ ეთერში გადაცემა  Business Insider Georgia-ში სტუმრობისას რუსთავის მერმა ნინო ლაცაბიძემ განაცხადა, თუ 2021 წელს ქალაქში განხორციელებული ინვესტიციები დაახლოებით 116 მილიონ ლარს შეადგენდა, 2024-2025 წლებში ეს მაჩვენებელი 230 მილიონ ლარამდე გაიზარდა და ამ ზრდაში მნიშვნელოვანი წილი სამშენებლო სექტორს უჭირავს.

„მადლობა ძალიან დიდი ამ შესაძლებლობისთვის, რომ ცოტა კიდევ სხვა რაკურსით შეგვიძლია ჩვენი საქმიანობა გავაცნოთ მაყურებელს. ზოგადად მგონია, რომ ძალიან კარგი წამოწყებაა, იმიტომ რომ იმის გარდა, რომ მხოლოდ ინფრასტრუქტურის ჭრილში განიხილება ხოლმე დღეს მუნიციპალიტეტების საქმიანობა, რას ემსახურება და რა გავლენას ახდენს ის ინფრასტრუქტურა, რომელიც როგორც ცენტრალური ბიუჯეტიდან, ასევე ადგილობრივი ბიუჯეტიდან ფინანსდება, ძალიან საინტერესოა, იმიტომ რომ მიზნები აბსოლუტურად სხვა გვაქვს. პირველი მინდა ვთქვა, რომ ჩემი ქალაქი ინდუსტრიული ქალაქი, ალბათ ჰაბი ერთ-ერთი საქართველოს მასშტაბით, რომელსაც ძალიან დიდი წვლილი შეაქვს როგორც რეგიონული ეკონომიკური განვითარების ნაწილში, ასევე ქვეყნის ეკონომიკაში ძალიან დიდ როლს თამაშობს. და დღეს შეგვიძლია ვთქვათ, რომ რუსთავი კიდევ და კიდევ უფრო საინტერესო ხდება ახალი ბიზნესისთვის.

ბოლო ოთხი წლის განმავლობაში ჩვენი მუნიციპალური მიზნები, იმის გარდა, რომ კომფორტული ყოფილიყო ქალაქში ცხოვრება, თვითმყოფადი ყოფილიყო ქალაქი ყველა იმ სერვისით, რაც ყოველდღიურობაში გვჭირდებოდა, მაინც რაც არ უნდა ვთქვათ, ბოლო არის ის, რომ ადამიანს სჭირდება სამუშაო ადგილი, სჭირდება ძლიერი ეკონომიკური სტაბილური გარემო და ამ ყველაფერს ქმნის ახალი ინვესტიცია. და ახალი ინვესტიცია ინტერესდება იქ, სადაც გარემოა კარგი და ოთხი წლის განმავლობაში თუკი რამ პროექტი განვახორციელეთ, აი მთავარი მიზნის გარდა, რომ კარგი გარემო შეგვექმნა, იყო, რომ საინვესტიციოდ საინტერესო გამხდარიყო ჩვენი ქალაქი და მოგვეზიდა ახალი ინვესტიციები. და თუ გადავავლებთ თვალს, საკმაოდ პოზიტიური დინამიკა გვაქვს ინვესტიციების. თუ ავიღებთ, რომ 2021 წელს დაახლოებით 116 მილიონი ლარი თუ იყო ინვესტიციის კუთხით, 2024-25 წლები 230 მილიონ ლარზეა ასული ინვესტიცია. დიდი წილი ბოლო პერიოდში უკვე უკავია სამშენებლო სექტორს, იმიტომ რომ სამშენებლო სექტორი საკმაოდ დაინტერესებულია“, - განმარტავს ნინო ლაცაბიძე.

არსებული სტატისტიკური მაჩვენებლებით სახეზეა, რომ რუსთავში მზარდ საინვესტიციო ინტერესთან ერთად, განსაკუთრებით სამშენებლო სექტორში, მუნიციპალიტეტი ურბანული განვითარების სწორ ბალანსზე აკეთებს აქცენტს. ქალაქის მერის განცხადებით, ახალი ინვესტიციები სამუშაო ადგილებსა და საბინაო ფონდის ზრდას უწყობს ხელს, თუმცა პარალელურად მნიშვნელოვანია, რომ გაზრდილმა სამშენებლო აქტივობამ ქალაქის ურბანული იერსახე არ დააზიანოს და განვითარება ჰარმონიულად გაგრძელდეს.

„ახალი ინვესტიციები, განსაკუთრებით სამშენებლო მიმართულებით, აუცილებელია, ქმნის ახალ სამუშაო ადგილებს, ქმნის უკეთეს გარემოს, საბინაო ფონდი მატულობს, თუმცა ამასთან ერთად სიფრთხილე მუნიციპალიტეტს ნამდვილად მართებს, რომ სწორი ურბანული განვითარება მოხდეს და მომატებულმა სამშენებლო ინტერესმა არ დააზიანოს ქალაქის ურბანული იერსახე. სწორედ ამ პოლიტიკის დაბალანსებაში ვართ, რომ შევუწყოთ ხელი ინვესტიციებს, მათთვის საუკეთესო გარემო იყოს და ამასთან ერთად გავითვალისწინოთ ქალაქის ურბანული სწორი განვითარება, რომ ჰარმონიულად მოხდეს ინვესტიციების შემოსვლა ჩვენს ქალაქში“, - აცხადებს ქალაქ რუსთავის მერი.