ფინანსთა მინისტრის განცხადებით, ევროობლიგაციების წარმატებული გამოშვება ქვეყნისთვის სტრატეგიულად მნიშვნელოვან შედეგებს ქმნის. როგორც გადაცემა „იმედის დილაში“ რუბრიკა Business Insider Georgia-ში სტუმრობისას ლაა ხუციშვილმა განმარტა, უკვე დაფიქსირებული პირობები და რისკიანობის შემცირებული მაჩვენებელი არა მხოლოდ მომდევნო სახელმწიფო გამოშვებებისთვის იქნება განმსაზღვრელი, არამედ გააუმჯობესებს სახელმწიფო საწარმოებისა და კერძო სექტორისთვის საერთაშორისო ბაზრებზე ფინანსების მოზიდვის შესაძლებლობებს.

„ეს რა თქმა უნდა, ეს ბევრი მიმართულებით არის საკმაოდ მნიშვნელოვანი. პირველ რიგში, სახელმწიფოსთვის მნიშვნელოვანია იქიდან გამომდინარე, რომ ეს რა თქმა უნდა ერთი კონკრეტული გამოშვება იყო, თუმცა საქართველო აპირებს, რომ აქტიური იყოს საერთაშორისო ბაზრებზე ამ მიმართულებით და ის ნიშნული, რაც უკვე დაფიქსირდა, განმსაზღვრელი იქნება შემდეგი გამოშვებებისთვისაც.

გარდა ამისა, სახელმწიფო საწარმოებს, რომლებსაც იცით, რომ აქვთ გამოშვებული და რეფინანსირების გაკეთების შესაძლებლობა ექნებათ, ისინიც უფრო კარგი პირობებით შეძლებენ გამოშვებას. და ყველა კომპანია, რომელიც საქართველოში ფუნქციონირებს - ეს იქნება საბანკო დაწესებულება თუ არასაბანკო დაწესებულება, რომელიც ახდენს ღია ბაზარზე თავისი ფასიანი ქაღალდების განთავსებას - ერთ-ერთი ყველაზე მნიშვნელოვანი პარამეტრი და ყველაზე მნიშვნელოვანი ნიშნულია სახელმწიფოს მიერ გამოშვებული ფასიანი ქაღალდების რისკიანობის მაჩვენებელი. იქიდან გამომდინარე, რომ მათი რისკიანობა სწორედ აქედან იანგარიშება, შესაბამისად მათ ექნებათ უფრო ხელსაყრელ პირობებში თანხების მოზიდვის შესაძლებლობა ქვეყანაში“, - აცხადებს ფინანსთა მინისტრი.