სამოგზაურო დაზღვევა განსაკუთრებით აქტუალურია საზღვარგარეთ გამგზავრებისთვის, რადგან ბევრ ქვეყანაში, მათ შორის ევროკავშირის წევრ სახელმწიფოებში, მსგავსი პოლისი სავალდებულოა ან პრაქტიკულად აუცილებელი. როგორც ტელეკომპანია „მაესტროს“ ეთერში გადაცემა Business Insider Georgia-ში სსიპ საქართველოს დაზღვევის სახელმწიფო ზედამხედველობის სამსახურის უფროსმა დავით ონოფრიშვილმა განაცხადა, მოქალაქეები თანდათან აცნობიერებენ, რომ მცირე ღირებულების მიუხედავად, სამოგზაურო დაზღვევა საზღვარგარეთ გაუთვალისწინებელი შემთხვევებისგან მნიშვნელოვან დაცვას უზრუნველყოფს.

ონოფრიშვილის განმარტებით, ბოლო პერიოდში გაიზარდა ინიციატივები, რომლებიც საქართველოში შემოსულ ტურისტებსაც უბიძგებს მსგავსი დაზღვევის ქონას. ამის მიზანი ის არის, რომ უცხოელი ვიზიტორების სამედიცინო მომსახურების ხარჯები სრულად ჯანდაცვის სისტემაზე არ გადავიდეს, ხოლო თავად ტურისტებიც შესაძლო რისკებისგან დაცულნი იყვნენ. 

„სამოგზაურო დაზღვევის ვალდებულება ჩვენთან ცალმხრივად არსებობდა - გარეთ ვინც გადიოდა ტურისტები - ევროკავშირი სავალდებულოდ ითხოვს, ამერიკის შეერთებული შტატებში და ბევრ ქვეყანაში სავალდებულოა,

ზოგან არ არის სავალდებულო, მაგრამ თვითონ ადამიანიც უკვე ხვდებიან, რომ საზღვარგარეთ რომ მიდიხარ ჯობია სამოგზაურო დაზღვევას ჰქონდეს. უცბად რომ რაღაც შემთხვევა დაგემართოს, მსუბუქი თუ სერიოზული, შენ იქ დაცული იყო, იმიტომ რომ არავინ იქ სერიოზულად არ მოგხედავს თუ არა გაქვს ჯანმრთელობის დაზღვევა. და ეს საზღვარგარეთ წასულებმა უფრო იციან და ხშირად არავის  არ ეკითხებათ საზღვარზე, მაგრამ რომ ჰკითხონ და არა ჰქონდეს შემოგაბრუნებენ უკან, ამიტომ უმეტესობას განსაკუთრებით ევროკავშირის ქვეყნებში ვინც მიდის იმათ აქვთ. სხვა ქვეყნებში ტურისტული სააგენტოები სამოგზაურო დაზღვევას, როგორც წესი, სავალდებულოდ ხდიან, რადგან ჯგუფური ტურების მართვისას რისკების დაზღვევა აუცილებელია. თუ გადავხედავთ მოგზაურობის ხარჯებს, დაზღვევის წილი მასში უმნიშვნელოა. მაგალითად, 10-დღიანი ტურის ფარგლებში, როდესაც სასტუმროს ღირებულება საშუალოდ 80-100 ევროა, რასაც ემატება კვებისა და ავიაბილეთების ხარჯები, სამოგზაურო დაზღვევა დღეში, საშუალოდ, მხოლოდ 2 ლარი ჯდება. ეს არის მინიმალური თანხა იმ უსაფრთხოებისთვის, რომელსაც დაზღვევა მოგზაურს სთავაზობს. მე მგონი ამაზე არგუმენტი არ არსებობს თუ რატომ არ უნდა გააკეთო.

მომხმარებელი სულ უფრო მეტად აცნობიერებს დაზღვევის საჭიროებას. მიმდინარე წელს ჩვენ ვიყავით ერთ-ერთი მთავარი ინიციატორი იმ საკითხისა, რომელიც საქართველოში შემომსვლელ ტურისტებს ეხება. განვითარებული ეკონომიკის მქონე ქვეყნებიდან - ევროპიდან, ამერიკიდან თუ კანადიდან - ჩამოსული სტუმრები, როგორც წესი, ისედაც სარგებლობენ სამოგზაურო დაზღვევით, რადგან მათთვის ეს სტანდარტული პრაქტიკაა.

არსებობენ ე.წ. მესამე ქვეყნები, მათ შორის ყოფილი საბჭოთა კავშირის ზოგიერთი მეზობელი სახელმწიფო, რომელთა მოქალაქეებსაც ხშირად არ ჰქონდათ სამოგზაურო ჯანმრთელობის დაზღვევა. შესაბამისად, გაუთვალისწინებელი შემთხვევებისას, სამედიცინო მომსახურების ხარჯების გაღება ჩვენს ჯანდაცვის სექტორს უწევდა, რადგან ამ თანხების ანაზღაურება ვერ ხერხდებოდა.  ამის შედეგად გარკვეული ზრდა უკვე არის იანვარში. გააქტიურდნენ როგორც ადგილობრივი, ისე უცხოური ტურისტული კომპანიები. ჩვენთვის პრიორიტეტული ბაზარზე თანაბარი პირობების შექმნაა. რეალურად, ამ ნაბიჯმა დამატებითი ბიძგი მისცა სფეროს განვითარებას. უცხოელი ვიზიტორების უმეტესობამ უკვე იცის დაზღვევის აუცილებლობის შესახებ, რაც, რა თქმა უნდა, ჩვენი ქვეყნისთვისაც სასარგებლოა“, - აცხადებს  საქართველოს დაზღვევის სახელმწიფო ზედამხედველობის სამსახურის ხელმძღვანელი.