„ეს არის უნაკლო პროექტი და აქ უარყოფითი ტენდენციები ვერ იარსებებს,“ - აცხადებს საქართველოში Eagle Hills-ის პროექტებთან დაკავშირებით პარლამენტის ეკონომიკური პოლიტიკის კომიტეტის თავმჯდომარე შოთა ბერეკაშვილი, რომელიც დღეს „იმედის დილაში“, რუბრიკა Business Insider Georgia-ს სტუმარი იყო.

კომიტეტის თავმჯდომარე ამბობს, რომ საქართველოს ხელისუფლებას არავითარი საინვესტიციო ვალდებულება არ აქვს, რაც ნიშნავს, რომ პროექტის განხორციელების დროს Eagle Hills-ი არის პასუხისმგებელი საინვესტიციო ნაწილში.

„სახელმწიფოსა და კერძო სექტორის თანამშრომლობის არაერთი მოდელია მსოფლიოში და ეს ცნობილია სახელმწიფო კაპიტალიზმის სახით. ამ მოდელს განვითარებული ეკონომიკები იყენებენ აშშ-დან დაწყებული - ნორვეგია შეგვიძლია მოვიყვანოთ მაგალითად. ასევე სინგაპური არის კარგი მაგალითი. სინგაპურის მაგალითზე სახელმწიფო და კერძო კაპიტალის წარმატებულმა შერწყმამ გამოიწვია ის, რომ ქვეყანაში უმსხვილესი კორპორაციები შევიდნენ და ის აზიის საინვესტიციო ჰაბად გადაიქცა. ახლა სინგაპურის ეკონომიკა დაახლოებით 550 მლრდ დოლარია და ერთ სულ მოსახლეზე შემოსავალი 90 ათასი დოლარია - ჩვენს შემთხვევაში არის 10 ათასი დოლარი. 9-ჯერ დიდია. სახელმწიფო კაპიტალიზმს აღნიშნული ქვეყნებისთვის სიკეთის გარდა არაფერი მოუტანა.

აქაც ასეთ მოდელთან გვაქვს საქმე, როდესაც სახელმწიფო და კერძო სექტორი ერთიანდება, რომ მსხვილი საინვესტიციო პროექტი განახორციელონ. რისკების თვალსაზრისით, საქართველოს ხელისუფლებას არავითარი საინვესტიციო ვალდებულება არ აქვს, არავითარი ოპერირების ვალდებულება არ აქვს. ეს ნიშნავს, რომ პროექტის განხორციელების დროს Eagle Hills-ი არის პასუხისმგებელი საინვესტიციო ნაწილში - ანუ კაპიტალით სრულად დაფინანსებაზე, ხოლო ოპერირების ნაწილში ასევე ის არის პასუხისმგებელი, რომ წარმატებით განახორციელოს ოპერირება. ამ შემთხვევაში სახელმწიფოს ზედამხედველობის ფუნქცია გააჩნია და ასევე დივიდენდების სახით მოგებიდან მიიღოს შემოსავალი. ეს არის უნაკლო პროექტი და აქ უარყოფითი ტენდენციები ვერ იარსებებს,“ - აღნიშნა შოთა ბერეკაშვილმა.