ეკონომიკისა და მდგრადი განვითარების მინისტრი 2025 წლის 6 თვეში ტურიზმიდან მიღებულ რეკორდულ შემოსავლებს სოციალური ქსელის მეშვეობით ეხმიანება. როგორც მარიამ ქვრივიშვილი წერს, რეკორდული მაჩვენებლები სწორი პოლიტიკის, ტურისტული ბაზრების დივერსიფიკაცია და მარკეტინგული კამპანიების წარმოების შედეგია. 

„სახელმწიფოს მიერ გატარებული პოლიტიკა სწორი და ეფექტურია, მათ შორის ახალი ავიაკომპანიების მოზიდვა და პირდაპირი რეისების დამატება, ტურისტული ბაზრების დივერსიფიკაცია და მარკეტინგული კამპანიების წარმოება, რამაც განაპირობა 2025 წლის იანვარ-ივნისში რეკორდული შემოსავლები ტურიზმიდან“, წერს მარიამ ქვრივიშვილი. 

2025 წლის იანვარ-ივნისში საერთაშორისო მოგზაურობიდან მიღებული შემოსავლები წლიურად 3.8%-ით გაიზარდა და რეკორდულ მოცულობას - თითქმის 2 მილიარდ აშშ. დოლარს (1,971.0 მლნ აშშ დოლარს) გაუტოლდა.

2025 წლის ორ კვარტალში ტურიზმიდან მიღებულმა შემოსავლებმა 2019 წლის ანალოგიური პერიოდის დონეს 35.4%-ით გადააჭარბა.

საერთაშორისო მოგზაურობიდან მიღებული შემოსავლები 2025 წლის მეორე კვარტალში წლიურად 5.0%-ით გაიზარდა და რეკორდული მოცულობა - 1,145.0 მილიონი აშშ. დოლარი შეადგინა.

იანვარ-ივნისში ტურიზმიდან მიღებული შემოსავლების მნიშვნელოვანი ზრდა დაფიქსირდა: ისრაელიდან (გაიზარდა 66.4 მლნ. აშშ. დოლარით, 37.9%-ით და 241.9 მლნ. აშშ შეადგინა) ევროკავშირიდან და დიდი ბრიტანეთიდან (გაიზარდა 30.7 მლნ. აშშ. დოლარით, 12.5%-ით და 277.0 მლნ. აშშ. დოლარი შეადგინა), აზერბაიჯანიდან (გაიზარდა 24.1 მლნ. აშშ. დოლარით, 30.7%-ით და 102.6 მლნ. აშშ. დოლარი შეადგინა), საუდის არაბეთიდან (გაიზარდა 6.2 მლნ. აშშ. დოლარით, 18.9%-ით და 38.8 მლნ. აშშ. დოლარი შეადგინა) და სომხეთიდან (გაიზარდა 1.8 მლნ. აშშ. დოლარით, 2.8%-ით და 66.0 მლნ. აშშ. დოლარი შეადგინა).