„დაზღვევის სისტემა ქვეყნის ეკონომიკური მდგრადობის და მოქალაქეთა კეთილდღეობის ერთ-ერთი საფუძველია. აღნიშნული სექტორი ყოველწლიურად იზრდება, რაც გამოწვეულია ბაზარზე კონკურენციის გაზრდით, ახალი პროდუქტების დანერგვითა და მომსახურების ხარისხის გაუმჯობესებით. 2024 წელი გამორჩეული იყო დაზღვევის ინდუსტრიისთვის - წლის განმავლობაში მოზიდულმა სადაზღვევო პრემიამ პირდაპირი დაზღვევის საქმიანობიდან რეკორდული 1,3 მლრდ ლარი შეადგინა, რაც დაახლოებით 20 პროცენტით მეტია წინა წლის ანალოგიურ მაჩვენებელზე," - განაცხადა ეკონომიკისა და მდგრადი განვითარების მინისტრის მოადგილე ირაკლი ნადარეიშვილმა დაზღვევის დღისადმი მიძღვნილ ღონისძიებაზე სიტყვის გამოსვლისას.

ღონისძიებაზე სიტყვით გამოვიდნენ ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი მიხეილ სარჯველაძე; გარემოს დაცვისა და სოფლის მეურნეობის მინისტრი დავით სონღულაშვილი; პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე შოთა ბერეკაშვილი; ეროვნული ბანკის პრეზიდენტი ნათია თურნავა და კონკურენციისა და მომხმარებლის დაცვის სააგენტოს თავმჯდომარე ირაკლი ლექვინაძე. ღონისძიების მონაწილეებს მიესალმა დაზღვევის სახელმწიფო ზედამხედველობის სამსახურის უფროსი დავით ონოფრიშვილი.
ირაკლი ნადარეიშვილის შეფასებით, სადაზღვევო სექტორი დღეს ფინანსური სისტემის მნიშვნელოვანი შემადგენელი ნაწილია, თუმცა მისი ზრდის პოტენციალი კიდევ უფრო დიდია. ინდუსტრიას აქვს ფართო შესაძლებლობები, როგორც პოლიტიკის ფორმირების და განხორციელების, ასევე სადაზღვევო სექტორის კიდევ უფრო მეტად გაძლიერებისა და განვითარების თვალსაზრისით. მისი თქმით, აუცილებელია თანამედროვე, ხარისხიანი სადაზღვევო პროდუქტებისა და სერვისების განვითარება, რაშიც მნიშვნელოვან როლს თამაშობს კერძო და საჯარო სექტორებს შორის თანამშრომლობა. „ამ პროცესის წარმატება მნიშვნელოვნად არის დამოკიდებული, როგორც თანმიმდევრული პოლიტიკის გატარებაზე, აგრეთვე სახელმწიფო ინსტიტუტებსა და კერძო სექტორს შორის მჭიდრო, ეფექტურ თანამშრომლობაზე," - აღნიშნა მინისტრის მოადგილემ.
ირაკლი ნადარეიშვილმა ჩამოთვალა საკანონმდებლო ინიციატივები, რომელთა ამოქმედება სექტორის კიდევ უფრო სწრაფ განვითარებას შეუწყობს ხელს. მათ შორის, ავტოსატრანსპორტო საშუალებების მფლობელთა სამოქალაქო პასუხისმგებლობის დაზღვევა, რომელიც ნებისმიერ ქვეყნის სადაზღვევო სექტორისათვის ერთ-ერთი საკვანძო პროდუქტია. „2025 წლიდან უკვე სრულად შევიდა ძალაში ნებაყოფლობითი კერძო პენსიის შესახებ კანონი, რაც ახალ შესაძლებლობებს აძლევს როგორც მოქალაქეებს, ისე ფინანსურ ინსტიტუტებს გრძელვადიანი ინვესტიციებს განხორციელების თვალსაზრისით. მოველით, რომ სადაზღვევო სექტორის ჩართულობა ამ პროცესში აქტიურად გაიზრდება," - აღნიშნა მინისტრის მოადგილემ.