„სააქციო კაპიტალისა და რეინვესტიციის მაჩვენებელი გაზრდილია და ეს წლიურ მაჩვენებელზეც აისახა“, - ამის შესახებ „საქსტატის“ აღმასრულებელმა დირექტორმა, გოგიტა თოდრაძემ, გადაცემა „იმედის დილაში“, რუბრიკა Business Insider Georgia-ში სტუმრობისას განაცხადა, როდესაც 2025 წელს ქვეყანაში განხორციელებული პირდაპირი უცხოური ინვესტიციების შესახებ საუბრობდა.

„როგორც მოგეხსენებათ, ჩვენ 2025 წლის მეოთხე კვარტლის ინფორმაცია გამოვაქვეყნეთ, რომლის მიხედვითაც ქვეყანაში განხორციელდა 392 მილიონი ამერიკული დოლარის ინვესტიცია. ეს მაჩვენებელი წინა წლის შესაბამისი პერიოდის მაჩვენებელს მცირედით, დაახლოებით 2.3%-ით ჩამორჩება, თუმცა ეს ჩამორჩენა სწორედ სავალო ვალდებულებების კომპონენტს უკავშირდება, ანუ ინვესტორის მიმართ ვალდებულება შემცირდა, ანუ გადავიხადეთ გარკვეული რაოდენობის სესხი, რამაც განაპირობა ამ 2.3%-იანი შემცირება.

თუმცა, სააქციო კაპიტალის და რეინვესტიციის მაჩვენებელი პირიქით, გაზრდილია და ეს აისახა კიდეც წლიურ მაჩვენებელზე. წლიურ ჭრილში, მილიარდ 688 მილიონი ინვესტიცია მიიღო ქვეყანამ და ეს მაჩვენებელი 7.6%-ით აღემატება 2024 წლის მონაცემებს და აქაც აღსანიშნავია, რომ რეინვესტიციის მაჩვენებელი გაზრდილია მნიშვნელოვნად, მისი წილი მთლიან პირდაპირ უცხოურ ინვესტიციებში 82.8%-ია და გაზრდილია ასევე სააქციო კაპიტალის ნაწილი, რომელიც ერთ-ერთ მთავარ კომპონენტად გვევლინება“, - აღნიშნა გოგიტა თოდრაძემ.

საქსტატის წინასწარი მონაცემებით, საქართველოში განხორციელებული პირდაპირი უცხოური ინვესტიციების მოცულობამ 2025 წელს 1 688.7 მლნ. აშშ დოლარი შეადგინა, რაც 7.6 პროცენტით მეტია 2024 წლის დაზუსტებულ მაჩვენებელზე. ზრდა განპირობებულია პირდაპირი უცხოური ინვესტიციების ორი კომპონენტის: სააქციო კაპიტალისა და რეინვესტიციის მაჩვენებლის ზრდით.