ეკონომიკისა და მდგრადი განვითარების მინისტრმა მარიამ ქვრივიშვილმა ქვეყნის ენერგეტიკული სექტორის განვითარების 10-წლიან გეგმაზე ისაუბრა. როგორც ტელეკომპანია „იმედის" ეთერში გამართულ დებატებში მონაწილეობისას მინისტრმა აღნიშნა,  10-წლიანი გეგმა უკვე დასრულდა, შემუშავებულია და გულისხმობს ელექტროენერგეტიკული თვალსაზრისით ქვეყნის თვითკმარობას. 

„2036 წელს დადგმული სიმძლავრე უნდა შეადგენდეს 11,500 მგვტ-ს, როდესაც დღეს გვაქვს 4,700 მგვტ. ყველა ის პროექტი, რომლებიც უნდა განვითარდეს ჩვენს ქვეყანაში, უნდა ექვემდებარებოდეს გონივრულ ვადებს, ისევე როგორც უნდა ეფუძნებოდეს იმ მნიშვნელოვან კვლევებს, რომლებიც საჭიროა უსაფრთხოდ და მდგრადად, ასეთი მნიშვნელოვანი და სტრატეგიული ინფრასტრუქტურის მოსაწყობად", - განაცხადა მარიამ ქვრივიშვილმა.

ამასთან, ეკონომიკისა და მდგრადი განვითარების მინისტრის ინფორმაციით, გეგმაზე მუშაობის პროცესში არაერთი შეხვედრა და დისკუსია გაიმართა კერძო სექტორთან. 10-წლიანი გეგმა ორ ფაზად დაიყო -  მომდევნო 5 წლის განმავლობაში შეიქმნება დამატებით 4,000 მგვტ, რომელიც  განაწილებულია მზის, ქარის, ისე როგორც ჰიდრორესურსის სწორ ბალანსზე. შემდგომი 5 წლის განმავლობაში კი ქვეყნის ენერგეტიკულ სისტემას კიდევ 2,700 მგვტ დაემატება, რომლის უმეტესი წილიც  მსხვილ ჰიდროენერგეტიკულ პროექტებზე მოდის. 

„ენერგეტიკული რესურსების კვლევა მუდმივი პროცესია და ძალიან მნიშვნელოვანია, ჩვენ ერთი მხრივ სექტორის განვითარებასთან ერთად ვიზრუნოთ და უზრუნველვყოთ ამომწურავი კვლევების ფორმირება იმისთვის, რომ კიდევ უფრო მეტად და სწორად შევაფასოთ ის საკმაოდ დიდი რესურსი, რომელიც ჩვენს ქვეყანას ჰიდროენერგეტიკაში აქვს. ამასთანავე, ჩვენ გვაქვს ძალიან თანმიმდევრული პოლიტიკა, რადგან ერთია - ინვესტორების სურვილი და მოტივაცია, მეორე მხრივ კი ასევე გონივრულად ვაფასებთ იმ გამოწვევებს, რომლებიც ენერგეტიკული ინფრასტრუქტურის კუთხითაა დღეს საქართველოში", - აღნიშნა ეკონომიკის მინისტრმა. 

მარიამ ქვრივიშვილის ინფორმაციით, 10-წლიანი გეგმის ფარგლებში შემუშავებულია სახელმწიფოს გეგმა, თუ რა პროექტები უნდა განხორციელდეს, მათ შორის - გადამცემი ქსელების, ისევე როგორც ქვესადგურების განვითარების კუთხით იმისთვის, რომ თანაბრად გადანაწილდეს ელექტროენერგია და ქვეყნის ენერგეტიკულმა სისტემამ ახალი დადგმული სიმძლავრეები მიიღოს. მინისტრმა ხაზი გაუსვა, რომ საუბარია მზის, ქარისა და ჰიდრორესურსების ძალიან მნიშვნელოვან, სწორ ბალანსზე.

„ძალიან მნიშვნელოვანია სახელმწიფოს, კერძო სექტორის, ისევე როგორც სამოქალაქო საზოგადოების, ჩვენი მოსახლეობის გაერთიანება მთავარი იდეის გარშემო, რაც გულისხმობს ჩვენი ქვეყნის უსაფრთხოების - ენერგეტიკული უსაფრთხოების, ეკონომიკური აღორძინების და რაღა თქმა უნდა, იმპორტზე დამოკიდებულების ერთობლივი ძალისხმევით შემცირებას", - განაცხადა მარიამ ქვრივიშვილმა.