ეკონომიკის ზრდასთან ერთად ბუნებრივია მსხვილ კორპორაციებს მოუწევთ საფონდო ბირჟებზე გასვლა, რადგანაც ეს ზრდის მათ საერთაშორისო რეპუტაციას და სანდოობას, - აღნიშნულის შესახებ „იმედის დილაში“ რუბრიკა Business Insider Georgia-ში სტუმრობისას საქართველოს ბიზნეს ასოციაციის აღმასრულებელმა დირექტორმა ლევან ვეფხვაძემ განაცხადა, რომელიც არ გამორიცხავს, რომ ქართული კომპანიების მალე სხვადასხვა საფონდო ბირჟებზე გავიდნენ.

„მე მგონია, რომ ჩვენი ეკონომიკა, მოდი ვთქვათ, რომ საბანკო ეკონომიკაა. თუმცა მეორეს მხრივ მოზიდვა სხვა ალტერნატიული წყაროებიდან, კომპანიები ეძებენ ამ რესურსებს. ეს ეხება, როგორც ფიქსირებული შემოსავლის მქონე ფასიანს ქაღალდებს, ასევე სააქციო კაპიტალის გაზრდას, იმიტომ, რომ ეკონომიკა, რომ იზრდება, კომპანიები, რომ იზრდებიან, მათ ავტომატურად უჩნდებათ მოთხოვნა ამ ტიპის აქტივობა დაიწყონ და მათ შორის საფონდო ბირჟაზე გავიდნენ. ეს მაგალითები, რომელიც უკვე გაქვს არის ძალიან კარგი გზამკვლევი ამ კომპანიებისთვის, რომლებიც ხვალ და ზეგ, როგორც ფასიან ქაღალდებს გამოუშვებენ ასევე კაპიტალის მოზიდვის კუთხით ფასიანი ქაღალდების გამოშვების ნაწილში ექნებათ შესაძლებლობა, რომ გამოიყენონ ეს რესურსი.

ეკონომიკის ზრდასთან ერთად ბუნებრივია ეს გადაწყვეტილებები მსხვილ კორპორაციებს გარდაუვალად მოუწევთ. რადგანაც ეს ზრდის მათ საერთაშორისო რეპუტაციას, სანდოობას, და ისევე როგორც თავის დროზე ბევრი ადგილობრივი, ეროვნული კომპანია გარდაიქმნა მულტინაციონალურ კორპორაციად, მეც ვხედავ შესაძლებლობას, რომ გარკვეული ქართული კომპანიები ხვალ და ზეგ მულტინაციონალურ კომპანიებად გარდაიქმნან, სწორედ ამ ტიპის საფონდო ბირჟებზე გასვლის შემდეგ. როგორც კი ქართული კომპანიების აქციები ჩნდება საფონდო ბირჟებზე ინვესტორების ინტერესი და კითხვა „რა არის ეს ქვეყანა საქართველო“ ჩნდება. თუ წარმატებულია ეს შემთხვევა და კარგად მოხდა საფონდო ბირჟაზე გასვლა, მერე უკვე ხედავენ კონკრეტული მაგალითია, კაპიტალიზაცია იზრდება, ე.ი. საქართველოში ღირს დაბანდება და კომუნიკაცია ქართულ კომპანიებთან და შესაბამისად პროექტები იქნება ეს თუ სხვადასხვა ტიპის ბზინეს აქტივობა. არ დაგვავიწყდეს, რომ ჩვენ ასევე ძალიან კარგად მოვახდინეთ ჩვენი სატრანზიტო დერეფნებისა და ჩვენი ლოგისტიკური შესაძლებლობების წარმოჩენა. აქაც ჩვენ გვჭირდება ინვესტიციები, გვჭირდება ახალი ტექნოლოგიები. შეიძლება ჩამოვრჩებით კიდევ ტექნოლოგიურ ნაწილში და სწორედ ინვესტიცია იმისთვის არის საჭირო, რომ შენ კონკრეტული კაპიტალი მოიზიდო, ასევე ამ კაპიტალს მოჰყვება უკვე კომპეტენცია, ცოდნა. ლოგისტიკური შესაძლებლობების განვითარება უფრო მდგრადი განვითარების ტოლფასი იქნება გრძელვადიან პერსპექტივაში“, - აცხადებს ლევან ვეფხვაძე.

მისივე თქმით, თუ კი გლობალურად ვითარება დასტაბილურება და მაგალითად ირანი და რუსეთი ტრანზიტისთვის გაიხსნება, ის მაინც დარწმუნებულია, რომ საქართველოს დერეფანს ტვირთნაკადი არ მოაკლდება.

„შესაძლოა, ხვალ და ზეგ ირანსა და აშშ-ს შორის გაფორმდეს შეთანხმება და ირანი გაიხსნას როგორც სატრანზიტო ქვეყანა, ან რუსეთში მოხდეს იგივე, მაგრამ ქვეყნებმა ისწავლეს, რომ მათ დივერსიფიცირება უნდა მოახდინონ და არ უნდა იყვნენ ერთ კონკრეტულ გზაზე დამოკიდებულები. ამიტომ ტვირთნაკადის ბრუნვის შემცირებას მე ამ დერეფანში არ ველოდები“, - აღნიშნა ლევან ვეფხვაძემ.