საქსტატის აღმასრულებელი დირექტორის თქმით, 2025 წელი გამორჩეული იყო მონაცემთა ხარისხის გაუმჯობესების, ახალი პროდუქტებისა და დისაგრეგირებული სტატისტიკის წარმოების მიმართულებით.  როგორც გოგიტა თოდრაძემ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას აღნიშნა, უწყებამ კიდევ უფრო გაამდიდრა საერთაშორისო თანამშრომლობა, უმასპინძლა ექსპერტთა მისიებს, ჩაატარა ფორუმები და მომხმარებლებს შესთავაზა მრავალთემატური ინტერაქტიული პლატფორმები. შედეგად, საქსტატის ვებსაიტით მილიონ 270 ათასმა ადამიანმა ისარგებლა, რაც მნიშვნელოვანი ზრდაა წინა წლებთან შედარებით, როცა საიტს მხოლოდ დაახლოებით 120 000 მომხმარებელი ჰყავდა.

„2025 წელი ნამდვილად გამორჩეული იყო იმ თვალსაზრისით, რომ ჩვენ ნამდვილად ქმედითი ნაბიჯები გადავდგით მონაცემთა ხარისხის გაუმჯობესების, ახალი პროდუქტების შექმნის, კიდევ უფრო მეტად დისაგრეგირებული მონაცემების წარმოების და საერთაშორისო სტანდარტებთან დაახლოების თვალსაზრისით.

გვქონდა, რა თქმა უნდა, საერთაშორისო აქტივობებიც, ვუმასპინძლეთ არაერთ საერთაშორისო მისიას, ექსპერტთა მისიას, ჩავატარეთ ფორუმი და რა თქმა უნდა ჩვენი დანაპირების ფარგლებში შევთავაზეთ მომხმარებელს არაერთი ინტერაქტიული პლატფორმა და თემატური ინტერაქტიული პორტალი, რომელიც მათ აძლევს შესაძლებლობას კიდევ უფრო მათზე მორგებული ფორმატით მიიღონ ინფორმაცია, რაც ხდება ხოლმე საფუძველი სხვადასხვა სახის გადაწყვეტილების მიღებისთვის. შედეგიც სახეზე გახლავთ - მილიონ 270 ათასმა ვებგვერდის მომხმარებელმა ისარგებლა საქსტატის ოფიციალური ვებსაიტით და აღნიშნული მაჩვენებელი გახლავთ ზრდადი. თუ მაგალითად 10-12 წლის წინანდელ პერიოდს შევადარებთ, დაახლოებით 120 000 მომხმარებელი ჰყავდა საქსტატის ვებსაიტს ამ თვალსაზრისით“, - აღნიშნა გოგიტა თოდრაძემ.