რკინიგზის მოდერნიზაცია ისტორიული პროექტია, - ამის შესახებ გადაცემა „იმედის დილაში“, რუბრიკა Business Insider Georgia-ში სტუმრობისას საქართველოს რკინიგზის გენერალურმა დირექტორმა ლაშა აბაშიძემ განაცხადა. მისი განმარტებით, პროექტის ფარგლებში განხორციელდა მატარებლების დაგრძელებაც.

„ეს საკმაოდ მნიშვნელოვანი, ისტორიული პროექტია, რომლის მიზანიც იყო ახალი წელი ამ პროექტის გახსნით დაგვეწყო. პრაქტიკულად, ჩვენ დავასრულეთ ეს პროექტი - სატესტო მატარებლები უკვე დადის. შესაბამისად, ეს მოგვცემს ძალიან მნიშვნელოვან ეფექტს, გამომდინარე იქიდან, რომ პროექტი გვაძლევს შესაძლებლობას, ყველაზე რთული რელიეფის მონაკვეთი რკინიგზისთვის - უღელტეხილი, სადაც ყველაზე მაღალი ქანობი იყო და ყველაზე მეტი დრო სჭირდებოდა გადაკვეთას სრულიად ახალ ინფრასტრუქტურაზე გადავიყვანოთ.

ამ პროექტის ფარგლებში ავაშენეთ სრულიად ახალი ინფრასტრუქტურა: 40 კმ-იანი ახალი სარკინიგზო ხაზი, 6 გვირაბი, 10 ხიდი, ქვესადგურები, სადგურები და მთლიანად ძველი ხაზიდან ახალ ხაზზე გადავედით. ახალი წლიდან, 1-ლი იანვრიდან, უკვე ახალ მოძრაობის ორგანიზებას ვაკეთებთ, რომელიც გაცილებით ოპტიმალური იქნება, ვიდრე ძველი, გამომდინარე იქიდან, რომ დავაგრძელეთ სატვირთო მატარებლების სიგრძე. მაგალითად, აქამდე სატვირთო მატარებელი 47 ერთეული ვაგონისგან შედგებოდა, ახლა კი 57-მდე დავაგრძელეთ და წონაც გავზარდეთ - 3000 ტონიდან 3600 ტონამდე. ეს გვაძლევს საშუალებას, ერთ გატარებაზე გაცილებით მეტი ტვირთი გავატაროთ.

ასევე, მოდერნიზაციის პროექტიდან გამომდინარე, შევქმნით მოძრაობის ახალ პროტოკოლებს, რაც საშუალებას მოგვცემს, გაცილებით ნაკლებ დროში მოვახდინოთ სატრანზიტო გადაკვეთები. მაგალითად, აქამდე სატვირთო მატარებლების გაჩერება ხდებოდა ხაშურში, შემდეგ ზესტაფონში. ახალი მოძრაობის ორგანიზებით გაჩერებები აღარ იქნება საჭირო, სამთო რეჟიმი აღარ ამოქმედდება და უღელტეხილს სრულიად გაუჩერებლად გადავივლით.

ზოგადად, ჩვენი მიზანია, რომ შუა დერეფნის ფარგლებში, როგორც ქვეყანამ, ვიყოთ ერთ-ერთი კონკურენტუნარიანი აქტორი. აქედან გამომდინარე, ვცდილობთ, მაქსიმალურად შევამციროთ სატრანზიტო დრო გადაკვეთის ნაწილში. ჩვენი მიზანია, სატრანზიტო მსვლელობის დრო გავანახევროთ და ვფიქრობთ, რომ მომავალ წელს ამ შედეგს მივაღწევთ“, - აღნიშნა აბაშიძემ.

საქართველოს რკინიგზის გენერალური დირექტორის თქმით, გარდაბნიდან ფოთი–ბათუმის მიმართულებით მატარებლების სატრანზიტო მსვლელობის დრო მნიშვნელოვნად შემცირდება.

„ასევე მნიშვნელოვანია, რომ ჩვენ ვმუშაობთ საბაჟო მიმართულებით. იმისთვის, რომ მატარებლები საბაჟოზე აღარ გაჩერდეს, ყაზახეთთან უკვე დავასრულეთ საბაჟო პროცედურებზე მუშაობა - პროცესი ელექტრონულად მიმდინარეობს და კონტეინერები აღარ ჩერდება.

შუა დერეფნიდან წამოსული და ზოგადად სატრანზიტო ტვირთები, რომ საბაჟოზე აღარ გაჩერდეს და გაუჩერებლად მოხდეს მათი გადაკვეთა და შავ ზღვაზე გასვლა. ეს პროცედურა ყაზახეთთან უკვე დასრულებულია, აზერბაიჯანთან მიმდინარეობს მუშაობა, შემდეგ კი ვიმუშავებთ უზბეკეთთანაც, რათა შუა დერეფნიდან წამოსული ტვირთების უწყვეტი ტრანსპორტირება უზრუნველვყოთ. საბაჟო პროცედურების „ამოღება“ ფაქტობრივად გამოიწვევს იმას, რომ სატრანზიტო დრო განახევრდება“, - აცხადებს აბაშიძე.