ჩვენ ვუყურებთ იმას, რომ ეფექტური თანამშრომლების მიღმა თუ გვქონდა ისეთი მიმართულება, სადაც ოპტიმიზაცია იყო საჭირო, ჩვენ ეს გზა პირველ ეტაპზე უკვე შევასრულეთ, დღეს შემიძლია თამამად ვთქვა, რომ ოპტიმიზაციის მეორე ეტაპზე გადავდივართ, - ამის შესახებ გადაცემა „იმედის დილაში“ რუბრიკა Business Insider Georgia-ში სტუმრობისას ქვეყნის ეკონომიკისა და მდგრადი განვითარების მინისტრმა განაცხადა.

მარიამ ქვრივიშვილის თქმით, ოპტიმიზაციის პირველ ეტაპზე 700 მლნ ლარის დაზოგვა მოხდა. 

„ბევრი კითხვა გაჩნდა ამ თემის გარშემო. პირველ რიგში მოგახსენებთ, რომ ჩვენ ეკონომიკის სამინისტროში გვაქვს ძალიან აქტიური მუშაობა ოპტიმიზაციის კუთხით: ყველა საწარმოში, ყველა სიპ-ში, ყველა შპს-ში მიდის სრულად გადახედვა იმ მიმდინარე პროექტების, მათ შორის შესწყიდვების - ხაზს გავუსვამ ამ მიმართულებას, ისევე როგორც საკადრო პოლიტიკის. ის რაც პრემიერ-მინისტრმა გააჟღერა ეს არის პირველ ეტაპი, იმ დავალების შესრულებისა, რაც ჩვენ პრემიერ-მინისტრისგან მივიღეთ. აღნიშნული ოპტიმიზაციის შედეგად 700 მლნ არის უკვე დაზოგილი. რისგან შედგება ეს 700 მლნ - პირველ რიგში ეს არის საკმაოდ დიდი ნაწილი მიმდინარე პროექტების შესყიდვების ღირებულების შემცირების, და ეს არ მოხდა პროექტების შეჩერების ხარჯზე. ჩვენ შევამცირეთ, ჩვენ ვნახეთ, რომ იყო საკმაოდ დიდი რესურსი გარკვეულ პროექტებში და არა ერთ პროექტში იმისთვის, რომ იგივე სერვისი, იგივე ხარისხით მიგვეღო. იგივე პროდუქტი მიგვეღო, თუმცა ბიუჯეტის დაზოგვის ხარჯზე. მეორეს მხრივ ეს იყო რელევანტური პროექტების დიფერენციაცია, არარელევანტური პროექტებისგან. იქნებოდა ეს დროში, სივრცეში თუ ასე შემდეგ. და მესამე რა თქმა უნდა საკადრო პოლიტიკა. იმისთვის, რომ ჩვენ უზრუნველყოთ გვყავდეს კიდევ უფრო ეფექტური თანამშრომელი, მაგრამ ჩვენ მეორეს მხრივ ვუყურებთ იმას, რომ ეფექტური თანამშრომლების მიღმა თუ გვქონდა ისეთი მიმართულება, სადაც ოპტიმიზაცია იყო საჭირო, ჩვენ ეს გზა პირველ ეტაპზე უკვე შევასრულეთ. დღეს შემიძლია თამამად ვთქვა, რომ ოპტიმიზაციის მეორე ეტაპზე გადავდივართ. 

ახლა თუ როგორ წარვმართავთ ამ 700 მლნ ლარს - ვიტყვი, რომ ეს უფრო მეტად ეხებოდა რკინიგზას, ისევე როგორც ენერგეტიკის სექტორს. იცით, რომ ჩვენთვის მნიშვნელოვანი მიმართულებებია, გვაქვს უამრავი გამოწვევა. შესაბამისად ჩვენ ახალ გუნდთან ერთად, ასევე ბევრი საკადრო ცვლილებაც გვქონდა სამინისტროში, უზრუნველყოფთ იმას, რომ სწორი მიმართულებით, სწორი ხედვით აღნიშნული თანხები მიემართოს უფრო მეტი ეფექტურობისთვის, უფრო სწორი პროექტებისკენ, ისევე როგორც პროგრამებს გაგრძელებაში, რაც პირველ რიგში უზრუნველყოფს სექტორების გაძლიერებას, მაგრამ ამავე დროს უზრუნვეყოფს კერძო სექტორის მხარდაჭერას იმისთვის, რომ ეფექტურად სახელმწიფომ და კერძო სექტორმა განაგრძოს აღნიშნული სექტორების განვითარება“, - განმარტა მინისტრმა.