რეზერვებთან დაკავშირებით წლის დასაწყისიდან გვაქვს ყოველთვიურად მზარდი ტენდენცია, - აცხადებს სებ-ის მაკროეკონომიკისა და სტატისტიკის დეპარტამენტის უფროსი თამთა სოფრომაძე, რომელიც დღეს რადიო „სივრცის“ ეთერში, გადაცემა Business Insider Georgia-ს სტუმარი იყო. მისი თქმით, წელს არის ამის შესაძლებლობა, რომ სებ-მა შეისყიდოს რეზერვები. 

რეზერვებთან დაკავშირებით წლის დასაწყისიდან გვაქვს ტენდენცია, რომ იზრდება ყოველთვიურად როდესაც ეროვნული ბანკი აქვეყნებს ამ სტატისტიკას, რომელიც ყველასთვის ხელმისაწვდომია.  ვხედავთ, რომ არის მზარდი, თავისთავად ეს არის ეროვნული ბანკის პოლიტიკის ასახვა. ჩვენ ყოველთვის ვსაუბრობდით იმაზე, რომ ეროვნული ბანკისთვის ყოველთვის არის პრიორიტეტი ის, რომ რეზერვები დააგროვოს და ჰქონდეს ადეკვატურ დონეზე, როდესაც ბაზარი და მაკროეკონომიკური ფუნდამენტური ფაქტორები ამის შესაძლებლობას გვაძლევს. წელს გვაქვს ამის შესაძლებლობა, რომ შევისყიდოთ რეზერვები, ამ პოლიტიკას მივყვებით და ბოლო მონაცემი რაც გვქონდა გამოქვეყნებული რეზერვი არის 5,4 მილიარდი აშშ დოლარი. რაც საკმაოდ მაღალი მაჩვენებელი არის და დაახლოებით პარასკევს გამოვაქვეყნებთ შემდგომ სტატისტიკას რეზერვების შესახებ.

წლის განმავლობაში ამ მოცულობით შესყიდვა, წინა წლებში არასდროს განხორციელებულა, რეკორდულად მაღალი არის სავალუტო ინტერვენციები, რასაც განაპირობებს ძირითადად ისევ და ისევ მაკროეკონომიკური ფუნდამენტური ფაქტორები.

როდესაც ხდებოდა მსგავსი პროგნოზების გაკეთება, ან თუნდაც კომენტარის გაკეთება გასული წლის ბოლოს, საუბრის დროს, მაშინ ეროვნულმა ბანკმა გაყიდვების მიმართულებით განახორციელა ინტერვენცია. მაშინაც ჩვენი კომუნიკაცია და ჩვენი ანალიზი იყო ის, რომ გაცვლით კურსს საბოლოოდ აყალიბებს ის, თუ როგორი ეკონომიკური მდგომარეობა გვაქვს – ფუნდამენტური ფაქტორები.

დანარჩენი  ეს აჟიოტაჟი, მოლოდინების გაუარესება ან პირიქით, მხოლოდ მოკლევადიან გავლენას ახდენს. შარშან წლის ბოლოს იყო ეს მომენტი, როდესაც გარკვეულ ტიპის აჟიოტაჟი, მოლოდინები ახდენდა კურსზე გავლენას. იმიტომ, რომ ჩვენ ხელთ გვქონდა ანალიზი, მონაცემები იმისა, რომ ფუნდამენტური ფაქტორები იყო საკმაოდ ძლიერი. აქედან გამომდინარეობდა კურსზე ზეწოლა.

შესაბამისად, 2025 წლის დასაწყისიდან თავისთავად, რადგანაც ფუნდამენტური ფაქტორები იყო ძლიერი, კურსი სტაბილურად შენარჩუნდა ამ ნიშნულზე და შესაბამისად მოლოდინებიც შეიცვალა.  მაგალითად, ძალიან კარგი საზომი არის თუ როგორი არის დეპოზიტების დოლარიზაცია. შარშან, წლის ბოლოს საკმაოდ სწრაფად გაიზარდა. დაახლოებით, 54 %-მდეც ავიდა, 53-54 %-მდე, თუმცა როგორც აღვნიშნე რადგანაც ანუ თავისთავად მაკროეკონომიკური მდგომარეობა აყალიბებს კურსს და შემდეგ წამოვიდა ტენდენცია, რომ ეს კურსი არის სტაბილური შემდეგ მოლოდინებიც შეიცვალა და დღეის მდგომარეობით, თუ გასული წლის ბოლოს და 2025 წლის დასაწყისშიც საკმაოდ მაღალი 53% იყო დოლარიზებული - დღეს ეს მაჩვენებელი არის 49.2-ზე ჩამოსული, ისევ ლარის დეპოზიტების მიმართულებით გაიზარდა,“ - აცხადებს თამთა სოფრომაძე.