ისტორიაში პირველად, სავალუტო ფონდის შეფასებით, საქართველო ერთ სულზე რეალური და მსყიდველუნარიანი ეკონომიკის ზრდით 21-ე საუკუნის საუკეთესო სამეულშია და ამ ლიდერობას 2030 წლის ჩათვლით ინარჩუნებს. აღნიშნულ თემას „იმედის დილაში“ რუბრიკა Business Insider Georgia-ში სტუმრობისას ფინანსთა მინისტრის მოადგილემ მიხეილ დუნდუა გამოეხმაურა და აღნიშნა, რომ სსფ-ს პროგნოზის მიხედვით ირკვევა, რომ საქართველო მსოფლიოში გამოირჩევა წინდახედული, ძლიერი ეკონომიკური პოლიტიკით.

„ძალიან კარგი პროგნოზი გამოაქვეყნა საერთაშორისო სავალუტო ფონდმა. 2030 წლის ჩათვლით მსოფლიო ეკონომიკური ზრდის მაჩვენებლები, როგორც მსყიდველუნარიანობის, ისე რეალურ გამოხატულებაში საქართველოს აქვს ისტორიულად საუკეთესო შედეგი. პირველად ისტორიაში მოხდა ასეთი რამ, რომ სსფ-ს შეფასებით ირკვევა, რომ ერთ სულზე რეალური ეკონომიკის და მსყიდველუნარიანი ეკონომიკის ზრდით საქართველო არის მსოფლიოს საუკეთესო სამეულში. ჩვენი საუკუნის პირველ მეოთხედში ყველაზე მეტად იზრდება გაიანას ეკონომიკა, შემდეგ არის ჯედი და შემდეგ არის საქართველო. საქართველო ამ ლიდერობას ინარჩუნებს 2030 წლის ჩათვლით. ანუ 2030 წელს, ანუ 30 წლიანი ეკონომიკური ზრდით საქართველო იქნება 21-ე საუკუნის საუკეთესო სამეულში.

გაანალიზებულია 2012 წლის შემდგომი პროგრესი. 2012 წლის შემდგომ ერთ სულზე რეალური ეკონომიკის გაუმჯობესებით საქართველო არის საუკეთესო ხუთეულში და როგორც ფონდის მონაცემებიდან ირკვევა 2028 წელს გადავდივართ საუკეთესო სამეულში, 2012 წლის შემდეგ მიღებული პროგრესის შედეგად ერთ სულზე რეალური ეკონომიკის გაუმჯობესების შედეგად. ერთ სულზე მსყიდველუნარიანის ეკონომიკის გაუმჯობესებითაც საუკეთესო სამეულშია საქართველო და ამ ლიდერობას შეინარჩუნებს 2030 წლის ჩათვლით. სსფ-ს პროგნოზის მიხედვით ირკვევა, რომ საქართველო მსოფლიოში გამოირჩევა წინდახედული, ძლიერი ეკონომიკური პოლიტიკით. სხვაგვარად შეუძლებელია მოხვდე საუკეთესო სამეულში. გახსოვთ, რომ 2012 წლამდე პერიოდში საქართველო იყო კავკასიის სამეულში და მას მას ორი ან ერთი ქვეყანა უსწრებდა ეკონომიკური ზრდით. ფაქტობრივად კავკასიაში არ იყო ლიდერი. ასეთ პირობებში კი გაქვს სიტუაცია, რომ მსოფლიო სამეულში ვართ. მეორე ადგილზე ვართ მაგალითად 2024 წელს ერთ სულზე რეალური ეკონომიკის გაზრდით საქართველო მსოფლიოში მეორე ადგილზეა. აღმოსავლეთ ნახევარ სფეროში კი პირველ ადგილზე. მხოლოდ გაიანა უსწრებს, სადაც წიაღისეულის მარაგები აღმოაჩინეს.

საქართველო არ არის ნავთობმომპოვებელი ქვეყანა, არ არის წიაღისეულზე დამოკიდებული ქვეყანა. საქართველო არის ქვეყანა, რომელსაც სჭირდება ძლიერი ეკონომიკური პოლიტიკა მრავალმხრივი ინკლუზიური ეკონომიკური განვითარებისთვის, ტურიზმის განვითარებისთვის, უამრავი სექტორის განვითარებისთვის. საქართველო არის კარიბჭე, გზა შესაყარი ევროპასა და აზიას შორის. და ელექტრომაგისტრალი, შავი ზღვის წყალქვეშა კაბელს ვგულისხმობ, საქართველოს ეკუთვნის ეს პროექტი. შესანიშნავად ვითარდება და დიდი მხარდაჭერაა. ის მნიშვნელოვანია ევროკავშირისთვის, ევროპისთვის, ჩვენი პარტნიორებისთვის. ევროპასა და აზიას შორის ძლიერი ენერგეტიკული კავშირის შექმნისთვის. საქართველოს დიდ პერსპექტივას უქმნის ენერგეტიკული განვითარებისთვის“, - აცხადებს დუნდუა.