ონლაინ ვაჭრობა, ტექნიკა და ლოჯისტიკა - კონკურენციისა და მომხმარებლის დაცვის სააგენტოს თავმჯდომარე ირაკლი ლექვინაძე გადაცემა „იმედის დილაში“ რუბრიკა Business Insider Georgia-ში სტუმრობისას იმ სფეროებს ასახელებს, სადაც მომხმარებელთა უფლებები ყველაზე ხშირად ირღვევა. სააგენტოს მონაცემებით, საჩივრების 65%-ზე მეტი სწორედ ელექტრონულ კომერციას ეხება, ბოლო პერიოდში კი მკვეთრად იმატა პრეტენზიებმა სატრანსპორტო და მიტანის სერვისების მიმართ.

„გასული წლის ორ თვესთან შედარებით გაორმაგებულია მომართვიანობა. მიმდინარე წლის ორ თვეში ეს არის დაახლოებით 400-მდე განაცხადი. ანუ ეს რას ნიშნავს? ვინც მოგვმართა და საქმის წარმოება დავიწყეთ კონკრეტულ საკითხებთან მიმართებაში, რომელიც მომხმარებლების მხრიდან იქნა პრეტენზიის სახით გამოხატული. ახლა შედეგებს რომ შევხედოთ, დაახლოებით 90%-ზე მეტი წყდება მომხმარებლის სასარგებლოდ ამ განაცხადების შემთხვევაში. ბოლო პერიოდში გვაქვს ზრდა, თუნდაც დარღვევების დადასტურების კუთხით, იმიტომ რომ ძალიან ბევრი მცირე მეწარმეა, რომელსაც, ასე ვთქვათ, სანამ გაიაზრებს, რომ პირობითი ვალდებულება შეასრულოს, ან დაეთანხმოს იმ პირობებს რასაც ჩვენ ვთავაზობთ მომხმარებლების სასარგებლოდ, გარკვეული დრო სჭირდება. თუმცა მაინც უმრავლესობა შეთანხმებით სრულდება. თუ ვერ თანხმდებიან მხოლოდ მაშინ მოდიან ჩვენთან და კარგია, რომ უმრავლეს შემთხვევებში შეთანხმებით სრულდება. დაახლოებით 65%-ზე მეტი ონლაინ ვაჭრობის შემთხვევებს ეხება ისევ. ბოლო პერიოდში და ყველაზე ისეთი პროდუქტი არის ტექნიკა და ტანსაცმელი. მაგრამ ბოლო პერიოდში გაზრდილია სატრანსპორტო და ლოჯისტიკური მიმართულებები, ეს გულისხმობს ძირითადად ჩამოტანის დროს ამა თუ იმ კომპანიების მიმართ პრეტენზიებს და ასევე მიტანის სერვისის დროს გამოხატულ სხვადასხვა პრეტენზიებს“, - აცხადებს ირაკლი ლექვინაძე.