საქართველოში სადაზღვევო სექტორი ზრდას განაგრძობს. 2025 წლის პირველადი მონაცემებით, სექტორის მიერ მიღებულმა მთლიანმა სადაზღვევო პრემიამ 1 მილიარდ 411 მილიონი ლარი შეადგინა, რაც წინა წელთან შედარებით 12%-იანი ზრდაა.

როგორც ტელეკომპანია „მაესტროს“ ეთერში გადაცემა  Business Insider Georgia-ში სტუმრობისას სსიპ საქართველოს დაზღვევის სახელმწიფო ზედამხედველობის სამსახურის უფროსმა დავით ონოფრიშვილმა განაცხადა, ბოლო 10 წელიწადში სექტორი პრაქტიკულად 3,5-ჯერ გაიზარდა, რაც მოსახლეობის მხრიდან დაზღვევის მიმართ ნდობის ზრდაზეც მიუთითებს.

„სექტორის პირველადი მონაცემები უკვე გვაქვს. 20 თებერვალს გვაბარებენ სრულ ინფორმაციას. მცირედი დაზუსტებები ხდება ხოლმე, ამას შემდგომ ერთვის წლიური აუდიტორული დასკვნები და მერე ქვეყნდება უკვე საბოლოო მონაცემები.

ამიტომ ციფრები შეგვიძლია უკვე თამამად ვთქვათ. მთავარი არის მაჩვენებელი - ეს არის მთლიანი პრემიის მაჩვენებელი, ანუ შემოსავალი რა ჰქონდათ კომპანიებს ერთობლიობაში - დაზღვევის სფეროში პრემიას ეძახიან, შეადგინა 1 მილიარდ 411 მილიონი. ეს მაჩვენებლები 2024 წელთან შედარებით გაზრდილია 12%-ით. საკმაოდ კარგი ზრდა არის. წინა წლებში ჩვენ ცოტა მეტიც კი გვქონდა ზრდა, 17-18%-მდე, ორი-სამი წელი ზედიზედ და მთლიანობაში ნებისმიერი ზრდა 8-10%-ის ფარგლებში და მით უმეტეს 10%-ზე მეტი ითვლება კარგ ზრდად. 2015 წლის მონაცემი იყო 393 მილიონი ანუ 400 მილიონზე ნაკლები. 2023-ში პირველად გადაილახა მილიარდიანი ზღვარი და უკვე ორ წელიწადში უკვე 1 მილიარდ 400 მილიონია და საკმაოდ ესე იგი სოლიდური, 10 წელიწადში პრაქტიკულად არის თითქმის სამნახევარჯერ გაზრდილი სექტორი. ეს მოწმობს თავისთავად იმას, რომ მოსახლეობის ნდობაც გაზრდილია. რა თქმა უნდა, აქ სრულ ნდობაზე ჯერ არ არის ლაპარაკი, მაგრამ ზოგადად ნდობა გაზრდილია სადაზღვევო კომპანიების მიმართ, ასევე პროდუქტების მიმართ, რომელსაც ისინი ქმნიან. თუმცა იდეალური ბევრი რამე არ არის“, - აღნიშნა ონოფრიშვილმა. 

როგორც დავით ონოფრიშვილი აღნიშნავს, სადაზღვევო კულტურის განვითარება პოსტსაბჭოთა სივრცეში ეტაპობრივად მიმდინარეობს. მისი თქმით, წარსულში საზოგადოებაში გავრცელებული იყო მოსაზრება, რომ დაზღვევა აუცილებელი არ იყო, თუმცა დღეს სულ უფრო იზრდება გააზრება, რომ სხვადასხვა ტიპის დაზღვევა მოქალაქეებს ეხმარება გაუთვალისწინებელი შემთხვევების დროს ფინანსური რისკების შემცირებაში და დამატებითი ვალდებულებების თავიდან აცილებაში.

საქართველოს დაზღვევის სახელმწიფო ზედამხედველობის სამსახურის უფროსის განცხადებით, სადაზღვევო სექტორში გაზრდილია როგორც აქტივები, ისე კაპიტალი, ხოლო წმინდა მოგება დაახლოებით იმავე დონეზეა შენარჩუნებული

„ზოგადად, გაზრდილია აქტივები და კაპიტალი, წმინდა მოგება კი იმავე დონეზე ნარჩუნდება. თუმცა, სექტორის განვითარების კუთხით, მთავარი მაინც არსებული კონკურენციაა.

ბაზარზე 19 კომპანიაა. შეიძლება ითქვას, რომ საქართველოსთვის ეს ციფრი საკმაოდ დიდია და მიწოდების თვალსაზრისით, იგივე შედეგის მოტანა 10-12 კომპანიასაც შეეძლო. თუმცა, ყველა მოქმედი კომპანია აკმაყოფილებს საერთაშორისო სტანდარტებსა და საზედამხედველო კაპიტალის მიმართ არსებულ მოთხოვნებს. ამ ეტაპზე არ არსებობს საფუძველი იმისა, რომ კაპიტალზე მოთხოვნა მკვეთრად გავზარდოთ. მაგალითად, არსებული 7.2 მილიონიდან ერთ წელიწადში 20 მილიონამდე გაზრდა ბევრი მათგანისთვის მიუწვდომელი აღმოჩნდება, რაც ბაზარზე რყევებს გამოიწვევს. ჩვენი მიზანია სრულად გავაკონტროლოთ პროცესი, რათა კომპანიებმა, რომლებიც მომხმარებლის წინაშე ფინანსურ ვალდებულებებს იღებენ, მათი გასტუმრება შეძლონ. სწორედ ამ სურათს ვაკვირდებით და ვარეგულირებთ“, - აცხადებს დავით ონოფრიშვილი.

დავით ონოფრიშვილის განცხადებით, სადაზღვევო ბაზარზე არსებული კონკურენცია მომხმარებლებისთვის დადებით შედეგს იძლევა. მისი თქმით, კონკურენციის პირობებში კომპანიები ცდილობენ მომხმარებლებს შესთავაზონ უკეთესი ხარისხის პროდუქტები და შედარებით დაბალი ფასები, რადგან მონოპოლიის რისკი პრაქტიკულად არ არსებობს.