საქართველოში 2025 წლის იანვარ-მარტში გაცემულია 2 358 სამშენებლო ნებართვა, რაც 54%-ით ნაკლებია 2024 წლის ანალოგიური პერიოდის მაჩვენებლებთან შედარებით. 2025 წლის პირველ კვარტალში გაცემული სამშენებლო ნებართვები მთლიანობაში 2 591.0 ათასი კვ.მ ფართობის შენობა-ნაგებობების მშენებლობას ითვალისწინებს, რაც 11,9%-ით მერია წინა წლის შესაბამის პერიოდთან შედარებით. საქსტატის ოფიციალური დეკლარირებული მონაცემებით, ნებართვების 75.5% მოდის ქვეყნის 4 რეგიონზე, კერძოდ, ჩასატარებელი სამშენებლო სამუშაოების 47.4% მოდის ქ. თბილისზე, 12.9% - ქვემო ქართლის რეგიონზე, 8.0% - მცხეთა-მთიანეთის რეგიონზე და 7.2% - კახეთის რეგიონზე.

რა ვითარებაა უძრავი ქონების ბაზარზე და როგორ არის თანხვედრაში Galt & Taggart-ის პროგნოზები და 1 კვარტლის მაჩვენებლები, Business Insider Georgia დეტალებზე Galt & Taggart-ის ასოცირებულ მკვლევარს ზუკა თავყელიშვილის ესაუბრა.

„საქსტატმა დღეს გამოაქვეყნა საქართველოს მასშტაბით გაცემული ნებართვების სტატისტიკა, თუმცა ჩვენ ასევე ვუყურებთ კონკრეტულად თბილისში არქიტექტურის სამსახურის მიერ ყოველთვიურად გაცემულ ნებართვებს, სადაც პირველ კვარტალში კლება ფიქსირდებოდა, დაახლოებით 7,4%-იანი. ანუ 2025 წლის პირველ კვარტალში დაახლოებით 7,4%-ით ნაკლებ საცხოვრებელ ფართზე გაიცა ნებართვა, ვიდრე ეს 2024 წლის პირველ კვარტალში მოხდა. ეს სრულად მოსალოდნელი იყო თუ იმასაც გავითვალისწინებთ, რომ 2023-2024 წლებში რეკორდულად დიდი რაოდენობის ნებართვები გაიცა.

7,4%-იანი შემცირება კი ფიქსირდება, მაგრამ ეს შემცირება მაინც არ არის იმხელა, როგორი შენელებაც გვაქვს მოთხოვნის მხარეს. ბოლო თვეებია, წლიურად დაახლოებით 5%-იანი კლება ფიქსირდება როგორც პირველად ისე მეორად ბაზრებზე. მოლოდინი იყო, რომ გაცემული ნებართვები უნდა შენელებულიყო, თუმცა არსებობდა მოლოდინი, რომ უფრო მაღალი ტემპით შენელდებოდა, ვიდრე ეს ახლა ხდება. შესაბამისად, ჯერჯერობით ამ ბალანსის ფონზე ვხედავთ, რომ ფასებშიც შენელებულია ზრდის ტემპი და თვიდან თვემდე უფრო ნაკლებად იზრდება, ვიდრე ეს ხდებოდა მაგალითად 2024 წელს. თუმცა ფასები მცირედით ზრდას ყოველთვიურად მაინც განაგრძობს“.

- მოთხოვნის შემცირება ახსენეთ. ეს გამოწვეულია იმით, რომ ბაზარი გაჯერებულია ანუ მიწოდება იყო მეტი, თუ მეორე, მოსახლეობის მსყიდველუნარიანობაა შემცირებული?

- არც ერთ მიზეზს არ დავასახელებდი. მსყიდველუნარიანობა - ვერ ვიტყოდი, რომ შემცირდა, მიუხედავად იმისა, რომ ფასები გაიზარდა. მაღალ ეკონომიკურ ზრდასთან ერთად ხელფასებიც გაიზარდა და ვერ ვიტყვი, რომ მოსახლეობის მსყიდველუნარიანობა შემცირდა. ასევე ბაზრის გაჯერებაზე საუბარი ჯერ ნაადრევია, რადგანაც ჯერ ზედმეტ მიწოდებასთან არ არის ახლოს. ვიტყოდი, რომ ბაზარზე ნეგატიური სენტიმენტების ფონზე ბაზარი რჩება მოლოდინის რეჟიმში და ყველას ვისაც ბინის შეძენა უნდოდა ამ ტრანსაქციას არ ახორციელებს და ელოდება თუ როდის დასტაბილურება ქვეყნის შიგნით პოლიტიკური სიტუაცია, რათა ასეთი გადაწყვეტილებები მიიღონ.

- 2025 წლის ბოლომდე რა პროგნოზები აქვს Galt & Taggart-ს, როგორც ნებართვების ისე მოთხოვნის კუთხით?

- მოლოდინები სრულიად დამოკიდებულია იმ არასტაბილურობაზე, რომელიც ქვეყნის შიგნით გაქვს, რადგანაც როგორც კი ეს არასტაბილურობა ფუნდამენტურად აღმოიფხვრება მოსალოდნელია, რომ ის მოთხოვნა, რომელიც ამჟამად დაპაუზებულია შესაძლებელია მალევე ამ ყველაფრის შემდეგ რეალიზდეს. ვფიქრობთ, რომ მოთხოვნა არ გამქრალა, რადგანაც ძირითადად თბილისში მოთხოვნა გაქვს საჭიროებაზე დაფუძნებულ შენაძენებზე. რაც შეეხება მიწოდებას, თუ მოთხოვნა ასე შენელებული დარჩება, საჭირო იქნება მიწოდების უფრო მკვეთრი კლება, რათა მოთხოვნა-მიწოდების ბალანსი დარჩეს იმ წერტილში, სადაც ახლა არის. რაც თავის მხრივ შესაძლებლობას აძლევს ბაზარს, რომ უფრო ნელი ტემპით, მაგრამ ყოველთვიურად ფასები გაზარდოს. რაც საინვესტიციოდ მიმზიდველს ხდის ამ ყველაფერს.

- თუ კი თქვენს ხაზს გავაგრძელებ და პოლიტიკური ვითარება იგივე დარჩა, ასევე წლის ბოლოს გაქვს არჩევნები. რა მოლოდინები გაქვთ და ზოგადად როგორია ასეთ დროს მოსახლეობის ქცევა?

- ამის მაგალითად წინა წლის იგივე პერიოდი ავიღოთ, როდესაც ოქტომბერში გვქონდა არჩევნები. უძრავი ქონების ბაზარზე ზაფხულში საკმაოდ აქტიურობა იყო, თუმცა ოქტომბერში მცირედი შენელება ვიხილეთ, რის შემდეგაც ნოემბერში კვლავ აღდგა მოთხოვნა. შესაბამისად ბაზარს სჩვევია, რომ ასეთი მოვლენების წინ უფრო მოლოდინის რეჟიმშია, თუმცა თუ სტაბილურად ჩაიარა ყველაფერმა, უძრავი ქონების ბაზარზეც მოსალოდნელია, რომ სტაბილურობა გვექნება.