იანვარში საქართველოს აეროპორტები 613 933 მგზავრს მოემსახურა - GCAA
2026 წლის იანვარში საქართველოს აეროპორტებში მგზავრთნაკადი 16%-ით გაიზარდა. აღნიშნულის შესახებ ინფორმაციას სამოქალაქო ავიაციის სააგენტოს (GCAA) ავრცელებს. სააგენტოს ცნობით, ამავე პერიოდში ქვეყნის აეროპორტებში შესრულებულმა ავიარეისების ჯამურმა მაჩვენებელმა 2873 შეადგინა, რაც გასული წლის იანვრის მონაცემს 16.17%-ით აღემატება. ხაზგასასმელია 2026 წლის იანვარში გადაზიდული ტვირთების მოცულობაც, რომლის ზრდამ 2025 წლის ანალოგიურ პერიოდთან შედარებით, 38%-ს გადააჭარბა.
რაც შეეხება მგზავრთა ოდენობას, მიმდინარე წლის პირველ თვეში საქართველოს აეროპორტები 613 933 მგზავრს მოემსახურა. ქვეყნის საერთაშორისო აეროპორტების ჭრილში ჩაშლილი მაჩვენებლები ასეთია: თბილისის საერთაშორისო აეროპორტი მოემსახურა 430 034 მგზავრს, ქუთაისის საერთაშორისო აეროპორტმა მიიღო 138 028 მგზავრი, ხოლო ბათუმის საერთაშორისო აეროპორტი 44 894 მგზავრს მოემსახურა.
2026 წლის იანვარში გადაზიდული ტვირთების მოცულობამ 3147.16 ტონა შეადგინა - ზრდა 2025 წლის ანალოგიურ პერიოდთან შედარებით, 38.75%-ია. გასული წლის იანვართან შედარებით, 9.56%-ით გაიზარდა საქართველოს საჰაერო სივრცის გამოყენების მაჩვენებელი. სულ, 2026 წლის პირველი თვის განმავლობაში 24 387 ერთეული ფრენა (აფრენა, დაფრენა, გადაფრენა) დაფიქსირდა.
აღსანიშნავია, რომ 2025 წელს საავიაციო სექტორმა საჰაერო მიმოსვლის ყველა ძირითადი მიმართულებით რეკორდული ზრდა აჩვენა. გასულ წელს საქართველოს აეროპორტები 8 494 640 მგზავრს მოემსახურნენ, რაც მგზავრთნაკადის რეკორდული მაჩვენებელი იყო ქვეყნისთვის. 2025 წელი რეკორდული იყო განხორციელებული ფრენების თვალსაზრისითაც - წლის განმავლობაში საქართველოს აეროპორტებში 38 218 რეისი განხორციელდა, რაც 17.5%-ით აღემატებოდა 2024 წელს განხორციელებულ ფრენებს. საჰაერო სატვირთო გადაზიდვების კუთხით კი, ტვირთების მოცულობამ 38578.379 ტონა შეადგინა, რაც ასევე რეკორდული შედეგი იყო საქართველოს აეროპორტებისთვის, რადგან 2024 წელთან შედარებით, ტვირთბრუნვის ზრდამ 50% შეადგინა.
დღის ტოპ 10 სიახლე
სხვა სიახლეები
საავიაციო სექტორში რეკორდული ზრდის ტენდენცია გრძელდება, რაც საქართველოს მთავრობის კოორდინირებული და თანმიმდევრული პოლიტიკის შედეგია - თამარ იოსელიანი
09.02.2026.11:56
„საავიაციო სექტორში რეკორდული ზრდის ტენდენცია გრძელდება, რაც ცალსახად განპირობებულია საქართველოს მთავრობის კოორდინირებული და თანმიმდევრული პოლიტიკით" - ამის შესახებ ეკონომიკისა და მდგრადი განვითარების მინისტრის მოადგილემ, თამარ იოსელიანმა სტატისტიკური მაჩვენებლების შეფასებისას განაცხადა, რომლის მიხედვით, 2026 წლის იანვრის თვეში საქართველოს აეროპორტები 600 000-ზე მეტ მგზავრს მოემსახურა და ზრდა, წინა წლის ანალოგიურ პერიოდთან შედარებით, 16 პროცენტს აჭარბებს.
მინისტრის მოადგილის ინფორმაციით, რეკორდული იყო ამავე პერიოდში განხორციელებული ავიარეისების რაოდენობა, რომელიც ასევე 16 პროცენტით არის გაზრდილი. მისი შეფასებით, ხაზგასმით აღსანიშნავია საქართველოს აეროპორტებში ტვირთბრუნვის მაჩვენებლებიც, რომელიც ასევე რეკორდულია, რადგან დაახლოებით 40 პროცენტიანი ზრდა ფიქსირდება.
„ზოგადად, უნდა აღინიშნოს, რომ 2025 წელს საავიაციო სექტორში ყველა მიმართულებით რეკორდული წელი გვქონდა, ეს ტენდენცია გრძელდება მიმდინარე წლის პირველივე თვეში და დარწმუნებულები ვართ, რომ მომდევნო თვეებიც რეკორდული იქნება" - განაცხადა თამარ იოსელიანმა.
