ბიზნეს სერვისებისა და პროცესების დისტანციურად მიწოდების მიმართულებით საქართველომ ჰაბის ფუნქციის შესრულება უკვე დაიწყო. ქვეყანაში BPO სექტორი წლიდან წლამდე ვითარდება, რაშიც დიდი წვლილი სააგენტოს „აწარმოე საქართველოში“ შეაქვს. სწორედ სააგენტოს დამსახურებაა ის, რომ საქართველოში უკვე ოპერირებენ BPO ინდუსტრიის მსოფლიოს TOP-5-ში შემავალი კომპანიები.

რა განვითარების ეტაპები გაიარა საქართველოში BPO სექტორმა და რა არის მასში „აწარმოე საქართველოში“-ს კონტრიბუცია, დეტალებზე Business Insider Georgia სააგენტოს „აწარმოე საქართველოში“ დირექტორს მიხეილ ხიდურელს ესაუბრა.

- განვითარების რა გზა გაიარა საქართველოში BPO ინდუსტრიამ, სად ვართ დღეს და როგორია ამ პროცესებში სააგენტოს „აწარმოე საქართველოში“ ჩართულობა?

- BPO სექტორის განვითარება საქართველოში დაახლოებით ათი წლის წინ გადავიდა ახალ ეტაპზე. ეს პროცესი მცირე მოცულობის პროექტებით დაიწყო, დღეს კი თამამად შეგვიძლია ვთქვათ, რომ ჩვენი ქვეყანა ბიზნეს სერვისებისა და პროცესების დისტანციურად მიწოდების მიმართულებით ერთ-ერთ წამყვან რეგიონულ ჰაბად ჩამოყალიბდა. სააგენტოს რამდენიმეწლიანი მუშაობის შედეგად, საქართველოში უკვე ოპერირებენ BPO ინდუსტრიის მსოფლიოს ტოპ ხუთეულში შემავალი კომპანიები, როგორიცაა TP და Concentrix. ისინი საქართველოში ათასობით ადამიანს ასაქმებენ.

„აწარმოე საქართველოში“ აქტიურად ახორციელებს სფეროს მხარდაჭერისა და პოპულარიზაციის პოლიტიკას. სააგენტოს ორგანიზებით მომზადდა არაერთი სექტორული კვლევა და საინვესტიციო ანალიტიკური ანგარიში, ქვეყანაში შედგა BPO სექტორის ლიდერების ვიზიტები, საქართველო წარდგენილი იყო 30-ზე მეტ საერთაშორისო ფორუმზე, სადაც გლობალურმა მოთამაშეებმა გაიცნეს ქვეყნის საინვესტიციო პოტენციალი. ასევე, ამოქმედდა FDI გრანტის პროგრამა, რომელიც დამატებით წამახალისებელი მექანიზმია საერთაშორისო ინვესტორებისთვის. აღსანიშნავია, რომ ამ ინდუსტრიის ინტერესი ჩვენი ქვეყნისადმი სულ უფრო მზარდია.

- რა იყო ის ფაქტორები, რამაც საქართველოთი ბიზნეს სერვისებისა და პროცესების დისტანციურად მიწოდების ინდუსტრიის მსოფლიოს ტოპ ხუთეულში შემავალი კომპანიების დაინტერესება განაპირობა?

- ინვესტორებისთვის საინტერესოა ახალგაზრდა და მრავალი უცხო ენის მცოდნე სამუშაო ძალა, კონკურენტული საოპერაციო ხარჯები, სტაბილური ეკონომიკური გარემო და სტრატეგიული ლოკაცია, რასაც საქართველო სთავაზობს. ამას გარდა, ჩვენი ქვეყანა აერთიანებს რამდენიმე მნიშვნელოვან უპირატესობას: კონკურენტულ შრომით ბაზარს, განვითარებულ სატელეკომუნიკაციო ინფრასტრუქტურასა და ბიზნესისთვის მოქნილ რეგულაციებს. ამასთან ერთად, სააგენტო ინვესტორებს ეხმარება რეგისტრაციის, ოფისების მოძიების, HR და იურიდიული სერვისების ორგანიზების საკითხებში, რაც პროცესს კიდევ უფრო მარტივსა და ეფექტურს ხდის. შედეგად, არაერთმა წამყვანმა გლობალურმა კომპანიამ შეაჩერა არჩევანი საქართველოზე, როგორც, რეგიონულ ჰაბზე.

- რა სარგებელი მოაქვს ქვეყნისთვის BPO ინდუსტრიის განვითარებას?

- BPO ინდუსტრია ერთ-ერთ ყველაზე ეფექტურ მექანიზმად გვევლინება სამუშაო ადგილების სწრაფად შექმნის თვალსაზრისით, განსაკუთრებით ახალგაზრდებისთვის. სექტორი დინამიურად ვითარდება და ქმნის საშუალოზე მაღალანაზღაურებად პოზიციებს - დაწყებული მომხმარებელთა მომსახურებიდან, დამთავრებული ფინანსური, HR ან IT პროცესების აუთსორსინგით. შედეგად, ჩნდება ფართო შესაძლებლობები შრომის ბაზარზე.

ამასთან, BPO სექტორი ეხმარება ქვეყანას ექსპორტის დივერსიფიკაციაში, რადგან მის მიერ მიღებული შემოსავლების უმრავლესობა უცხოური კომპანიებიდან მოდის. ასევე, ასეთი გლობალური კომპანიების შემოსვლა საქართველოში, მათი ბიზნეს კულტურისა და ცოდნის გაზიარებას გულისხმობს ადგილობრივი ბიზნეს გარემოს გაუმჯობესებას და ქმნის საერთაშორისო კომპანიებში მუშაობის გამოცდილებას. სექტორი ასევე ემსახურება რეგიონული ცენტრების განვითარებას. დღეს სულ უფრო მეტი პროექტი ხორციელდება თბილისს მიღმა — მაგალითად, ქუთაისსა და ბათუმში.

- როგორია სააგენტოს გეგმები ამ მიმართულებით, რათა BPO სექტორი კიდევ უფრო გაიზარდოს და დამატებით ახალი კომპანიები გამოჩნდნენ ბაზარზე? ხომ არ გექნებათ ახალი ინიციატივები?

- სააგენტო "აწარმოე საქართველოში" მომავალშიც გააგრძელებს აქტიურ კამპანიებს საერთაშორისო ბაზრებზე — როგორც პირდაპირი მოლაპარაკებების გზით, ასევე, მსოფლიოს წამყვან გამოფენებსა და კონფერენციებში მონაწილეობით. განსაკუთრებულ ყურადღებას ვამახვილებთ იმ კომპანიებზე, რომლებიც ეძებენ ოპერაციულ ჰაბებს ევროპის სიახლოვეს, თუმცა ხარჯების ოპტიმიზაციის საჭიროებით. საქართველო ამ კუთხითაც უნიკალურ შესაძლებლობებს სთავაზობს ინვესტორებს.