საქართველოს ეროვნული ბანკის პრეზიდენტი ნათია თურნავა საერთაშორისო კონფერენციას - „ფინანსური ნდობის ეკოსისტემა 2026“ დაესწრო

საქართველოს  ეროვნული ბანკის პრეზიდენტმა ნათია თურნავამ საერთაშორისო პრაქტიკულ-სამეცნიერო კონფერენციაში „ფინანსური ნდობის ეკოსისტემა 2026“ მიიღო მონაწილეობა.

კონფერენციის მიზანი პროფესიონალების, რეგულატორებისა და საერთაშორისო ექსპერტების დიალოგის ხელშეწყობა, საუკეთესო პრაქტიკების გაზიარება და თანამშრომლობის მექანიზმების განვითარება იყო.

ღონისძიებას საქართველოს სახელმწიფო უწყებებისა და საერთაშორისო ორგანიზაციების მაღალი რანგის წარმომადგენლები ესწრებოდნენ.   ევროპის მცირე და საშუალო ბიზნესის ბუღალტერთა და აუდიტორების ფედერაციის (EFAA for SMEs) პრეზიდენტმა სალვადორ მარინიმ და ICB Global-ის პრეზიდენტმა გარი კარტერმა კი კონფერენციაზე მონაწილეობა ონლაინ ფორმატში მიიღეს.

საქართველოს ეროვნული ბანკის პრეზიდენტმა ნათია თურნავამ კონფერენციაზე სიტყვით გამოსვლისას ფინანსური ნდობისა და ხარისხიანი ანგარიშგების მნიშვნელობაზე გაამახვილა ყურადღება.

,, საქართველოს ეროვნული ბანკი, როგორც საფინანსო სექტორის ზედამხედველი და მარეგულირებელი ორგანო, განაგრძობს მუშაობას ანგარიშგების სტანდარტების გაძლიერებისა და გამჭვირვალობის ხელშეწყობის მიმართულებით. ნდობა ყალიბდება ყოველდღიური პროფესიული პასუხისმგებლობითა და ინსტიტუციური თანამშრომლობით და სწორედ ამ პრინციპებზე უნდა იყოს დაფუძნებული ფინანსური სისტემის შემდგომი განვითარება საქართველოში,“-  აღნიშნა ნათია თურნავამ.

ნათია თურნავას თქმით, ფინანსური გადაწყვეტილებების მიღება ზუსტ, დროულ და სრულყოფილ მონაცემებს, თანამედროვე ციფრული ტექნოლოგიების ეფექტიან გამოყენებასა და ძლიერი შიდა კონტროლის სისტემების დაცვას უნდა ეფუძნებოდეს.

კონფერენციის ფარგლებში მონაწილეებმა ასევე განიხილეს ფინანსური ანგარიშგების ხარისხის გაძლიერების საკითხები, ციფრული ტექნოლოგიების გავლენა ფინანსური ნდობის აღქმისა და მხარდაჭერის პროცესზე, პროფესიულ პრაქტიკაში ეთიკური სტანდარტების დანერგვის შესაძლებლობები და ინსტიტუციური დიალოგის მექანიზმების განვითარება.

ღონისძიება საქართველოს ბუღალტერთა კავშირის ორგანიზებითა და საქართველოს ეროვნული ბანკის თანაორგანიზებით გამართა.