მესამე კვარტალიც მაღალ იზრდით დაიწყო. სარეკორდოდ არის გაზრდილი საერთაშორისო სავალუტო რეზერვები, ეკონომიკის პოზიტიური ტენდენციები აისახა საერთაშორისო სავალუტო ფონდის გადასინჯულ პროგნოზებშიც - გიორგი ცუცქირიძე
2025 წლის მესამე კვარტალიც მაღალ იზრდით დაიწყო. ივლისში საქართველოს ეკონომიკის ზრდამ 6.5 პროცენტი შეადგინა, რაც პირველი 7 თვის (იანვარ-ივლისში) მიხედვით 8.0 პროცენტია. შედარებისათვის, ზრდის ტემპით 1.7-ჯერ ვუსწრებთ როგორც რეგიონის, ისე გლობალური ეკონომიკის ზრდის საშუალო მაჩვენებელს, - წერს ეკონომიკის ექსპერტი, გიორგი ცუცქირიძე, სოციალურ ქსელში.
მისი განცხადებით, საერთაშორისო სავალუტო რეზერვების მაღალი ზრდა, დაბალ ინფლაციასთან, სტაბილურ გაცვლით კურსთან და მშპ-სთან მიმართებით საგარეო ვალის შემცირებასთან ერთად, სებ-ის ზრდაზე ორიენტირებულ მოქნილ მონეტარულ პოლიტიკაზე მიუთითებს. ცუცქირიძე იმასაც აღნიშნავს, რომ ეკონომიკის პოზიტიური ტენდენციები აისახა საერთაშორისო სავალუტო ფონდის გადასინჯულ პროგნოზებში.
"2025 წლის მესამე კვარტალიც მაღალ იზრდით დაიწყო. ივლისში საქართველოს ეკონომიკის ზრდამ 6.5 პროცენტი შეადგინა, რაც პირველი 7 თვის (იანვარ-ივლისში) მიხედვით 8.0 პროცენტია. შედარებისათვის, ზრდის ტემპით 1.7-ჯერ ვუსწრებთ როგორც რეგიონის, ისე გლობალური ეკონომიკის ზრდის საშუალო მაჩვენებელს. ამასთან, 2019 წლის კოვიდ პანდემიურ დონესთან შედარებითაც ზრდა 45%-ს შეადგენს, რაც 2.7-ჯერ აღემატება გლობალური ეკონომიკის ზრდის ანალოგიურ მაჩვენებელს (+16.3%). შედარებისათვის, ევროკავშირში ყველაზე მაღალი ზრდის მაჩვენებელი არის ლიტვასა და ესპანეთში, რაც 3%-ს აღემატება.
წმინდა მაკრო ფაქტორებიდან, მართალია, ინფლაციამ 2025 წლის ივნისში, წინასწარ წლის ანალოგიურ პერიოდთან შედარებით, 4.1 პროცენტი შეადგინა, რაც მეტია მის სამიზნე მაჩვენებელზე (3%). თუმცა, დეფლაციამ ივლისში წინა თვესთან შედარებით 0.02 პროცენტი შეადგინა, რაც ივნისის შემდეგ ზედიზედ მეორე დეფლაციური თვეა ბოლო 11 თვის მანძილზე.
ნიშანდობლივია, რომ სარეკორდოდ არის გაზრდილი საერთაშორისო სავალუტო რეზერვები. ივლისში სებ-მ ინტერვენციების შედეგად, საერთაშორისო სავალუტო რეზერვები 416.9 მლნ აშშ დოლარით შეავსო, ხოლო წლის დასაწყისიდან სავალუტო რეზერვები ანუ მისი ნეტო მაჩვენებელი სარეკორდოდ 1.3 მლრდ აშშ დოლარით არის გაზრდილი და მეტია 2023 წლის პირველ ექვს თვეში რეკორდული რაოდენობის, $1.08 მილიარდის შესყიდვასთან შედარებით. რეზერვების მთლიანი მოცულობამ კი უკვე გადააჭარბა 5 მლრდ აშშ დოლარს.
საერთაშორისო სავალუტო რეზერვების ასეთი მაღალი ზრდა, დაბალ ინფლაციასთან, სტაბილურ გაცვლით კურსთან და მშპ-სთან მიმართებით საგარეო ვალის 36 პროცენტამდე შემცირებასთან ერთად, სებ-ის ზრდაზე ორიენტირებულ მოქნილ მონეტარულ პოლიტიკაზე მიუთითებს.
ექსპორტის საგრძნობი ზრდა, რაც გასული წლის ანალოგიურ პერიოდთან შედარებით 9% არის გაზრდილი, ეროვნული ვალუტის კურსის გამყარების პირობებშიც კი აჩვენებს სებ-ის მონეტარული პოლიტიკის ეფექტურობას და ადასტურებს საქართველოს ეკონომიკის მზარდ პოტენციალს და წარმოებული პროდუქციის გაზრდილ კონკურენტუნარიანობას საერთაშორისო ბაზრებზე.
ნიშანდობლივია, რომ ივლისში ბიუჯეტო შემოსავლებმა პირველად გადააჭარბა 2 მილიარდ ლარს, რაც ახალი ისტორიული მაქსიმუმია.
ამასთან, რაც არანაკლებ მნიშვნელოვანია მოქნილ ფისკალურ პოლიტიკასთან ერთად, მონეტარული პოლიტიკის ეფექტი ასახულია საბანკო დეპოზიტების ზრდაში, რაც საბანკო დაკრედიტების უმნიშვნელოვანესი წყაროა. საქართველოს ეროვნული ბანკის ანგარიშის მიხედვით, საბანკო სექტორში განთავსებული დეპოზიტების მოცულობამ 2025 წლის ივნისის ბოლოსათვის 61.96 მილიარდი ლარი შეადგინა, რაც 1.18 მილიარდი ლარით, ანუ 1.96%-ით მეტია წინა თვის ბოლოს არსებულ მაჩვენებელზე, ხოლო დეპოზიტების წლიურმა ზრდამ, გაცვლითი კურსის ეფექტის გარეშე, 10.96% შეადგინა.
აქვე უნდა აღინიშნოს, რომ დეპოზიტების ზრდა თანხვედრაშია ლარიზაციის ზრდასთან, რაც თავის მხრივ ზრდის რასალარე დაკრედიტების ბაზას და ამცირებს სავალუტო რისკებსაც. დეპოზიტების ლარიზაციამ 2025 წლის ივლისის ბოლოსათვის 50.33 პროცენტი შეადგინა, რაც იმეორებს ივნისის მაჩვენებელს და წინა თვის ივნისთან შედარებით 1.10 პროცენტული პუნქტით არის გაუმჯობესებული.
აღსანიშნავია, რომ ეკონომიკის პოზიტიური ტენდენციები აისახა საერთაშორისო სავალუტო ფონდის გადასინჯულ პროგნოზებში.
მოგეხსენებათ, საერთაშორისო სავალუტო ფონდმა თავისივე სამი თვის წინანდელი პროგნოზი საქართველოს ეკონომიკის 2025 წლის ზრდაზე გაზარდა 6 პროცენტიდან 7.2 პროცენტამდე, რაც გლობალური ეკონომიკის ზრდის მაჩვენებელს 2.3-ჯერ აღემატება“, - წერს გიორგი ცუცქირიძე.
დღის ტოპ 10 სიახლე
სხვა სიახლეები
ხაზარაძე-ჯაფარიძის პარტნიორის მხრიდან თანხის გადახდა მკაფიო დასტურია, რომ ვაშინგტონის არბიტრაჟის გადაწყვეტილებას ეთანხმებიან, თანხა უკვე აისახა ბიუჯეტში - ბექა ძამაშვილი
29.08.2025.20:52
ხაზარაძე-ჯაფარიძის პარტნიორის მხრიდან ვაშინგტონის არბიტრაჟის გადაწყვეტილების შესრულება, დაკისრებული თანხის გადახდა არის მკაფიო დასტური, რომ ისინი ეთანხმებიან არბიტრაჟის გადაწყვეტილებას. ანუ, ეთანხმებიან, რომ ანაკლიის პორტის ვერ განხორციელება მთლიანად იყო მათი ბრალეულობა, - განაცხადა იუსტიციის მინისტრის მოადგილემ, ბექა ძამაშვილმა.
ძამაშვილს კითხვა დაუსვეს გავრცელებულ ინფორმაციაზე, რომლის თანახმადაც, ხაზარაძისა და ჯაფარიძის ჰოლანდიელმა პარტნიორმა, ბობ მეიერმა ანაკლიის პორტის საქმის ფარგლებში ვაშინგტონის არბიტრაჟის მიერ დაკისრებული თანხა გადაიხადა.
„სახელმწიფოს რაიმე კუთხით მათთვის ხელი არ შეუშლია, ფაქტობრივად, მათ ამ პროცედურული მოქმედებით, ეს ყველაფერი თვითონ დაადასტურეს. ადამიანმა როდესაც იცის, რომ მართალია, ყველა შესაძლო სამართლებრივ მექანიზმს იყენებს. აუცილებლად გაასაჩივრებდა და ბოლომდე შეეცდებოდა საკუთარი სიმართლის დაცვას. არბიტრაჟის გადაწყვეტილების მყისიერად შესრულება ადასტურებს, რომ თავიდანვე იცოდნენ, ამ საქმეში სახელმწიფო იყო მართალი, უბრალოდ, ეს საქმეები გარკვეული პოლიტიკური დივიდენდების მიღების მიზნით გამოიყენეს. ორ სხვადასხვა არბიტრაჟში შეიტანეს საქმე. ნიშანდობლივია, რომ გასულ წელს, როდესაც პარიზის არბიტრაჟმა მიიღო ანაკლიის კონსორციუმის წინააღმდეგ გადაწყვეტილება, მაშინაც არ გაასაჩივრეს. ერთობლიობაში ყველაფერი აჩვენებს, რომ მათ ეს საქმეები უბრალოდ პოლიტიკური ნიშნით სჭირდებოდათ. იცოდნენ, სახელმწიფო მართალი იყო და ამ პროცედურული მოქმედებით, რაც დაკისრებული თანხის გადახდაში გამოიხატა, ყველაფერი მკაფიოდ დადასტურდა“,- განაცხადა ბექა ძამაშვილმა.
ძამაშვილის ინფორმაციით, ბობ მეიერმა დაკისრებული თანხა რამდენიმე დღის წინ გადაიხადა.
„რამდენიმე დღის წინ გადაიხადა და თანხა უკვე ასახულია ბიუჯეტში. შესაბამისად, დღეს თამამად შეგვიძლია ამაზე საუბარი“, – განაცხადა ძამაშვილმა.
ბექა ძამაშვილმა დავის წარმოებისას ქართული სახელმწიფოს მიერ გაწეულ ხარჯებთან დაკავშირებითაც ისაუბრა.
„ყურადღება უნდა გავამახვილოთ ჩვენი სახელმწიფოს მიერ გაწეულ ხარჯებზე. მათი პოლიტიკური პარტია და ტელევიზიები ნიშნისმოგებით მიანიშნებენ ხოლმე, რომ რამდენიმე ათეული მილიონი დახარჯა სახელმწიფომ ამ დავის წარმოების დროს. ბუნებრივია, როდესაც სახელმწიფოს ედავები ოთხ მილიარდზე მეტი ზიანის ანაზღაურებას, სახელმწიფო ვალდებულია, თავი დაიცვას და ამისთვის შესაბამისი ხარჯები გაწიოს. ფაქტობრივად, შეიძლება ითქვას, რომ რამდენიმე ათეული მილიონი, რომელიც სახელმწიფოს დასჭირდა დავის საწარმოებლად, მათ კისერზეა, რადგან დავის პროცესში ბევრი შეთავაზება გავუკეთეთ, რათა ეს ხარჯები ყველასათვის დაზოგილი ყოფილიყო. შევთავაზეთ, მხოლოდ ერთ არბიტრაჟში წარმართულიყო დავა, მაგრამ მათ უნდოდათ პარალელურად ამ დავების წარმოება. აქაც ძალიან მკაფიოა, რა იყო მათი მიზანი – მაქსიმალური ზიანი მიეყენებინათ სახელმწიფოსთვის. ახლა, როდესაც ყველაფერი წააგეს, ერთადერთი ისღა დარჩენიათ, ნიშნის მოგებით მიუთითონ, რაღაც თანხა მაინც დაგახარჯვინეთ ბიუჯეტიდანო. მათ პარალელურად დაიწყეს ორი დავა ვაშინგტონის და პარიზის არბიტრაჟებში. მთლიანად ხარჯები იყო 63 მლნ ლარის ოდენობით და ამ ხარჯებით მათ სახელმწიფო ბიუჯეტს მიაყენეს ზარალი. გარდა იმისა, რომ პორტი ვერ ააშენეს, წლები დააკარგვინეს. ამდენი წელი ცდილობდნენ, სიცრუე შემოეტანათ პოლიტიკურ ველში. ამ ყველაფრის წაგების შემდეგ, ერთადერთი, რაზეც ახლა მიუთითებენ, არის ის, რომ სახელმწიფო ბიუჯეტს მილიონობით ზარალი მიაყენეს და თითქოს ეს უხარიათ“,- აღნიშნა ძამაშვილმა.
